Matta 10

Almaajiri'en Yeesu sappo e ɗiɗo

(Markus 3.13-19 ; Luka 6.12-16)

1Yeesu noddi almaajiri'en muuɗum sappo e ɗiɗo, o hokki ɓe baawɗe vurtingo *ginnaaji e yamɗitingo koo iri nguye nyawu e liddaari. 2Raa inɗe almaajiri'en sappo e ɗiɗo ɓeen : arano maɓɓe ɗum Simon noddirteeɗo Biiturus, e minyum Anndaraawus, e Yaakuubu ɓii Jabadi, e minyum Yahayya, 3e Filibus, e Bartalamaawus, e Tooma, e Matta jaɓoowo ceede janngal, e Yaakuubu ɓii Alfaa, e Taddiyus, 4e Simon kaɓaneyɗo rimɗingo lenyol muuɗum, e Yahuuda Iskariyooti nyaameyɗo amaana Yeesu.

Yeesu lilii almaajiri'en sappo e ɗiɗo

(Markus 6.7-13 ; Luka 9.1-6)

5Yeesu lili sappo e ɗiɗo ɓeen, o vi'i ɓe :

— To' on njah to *yimɓe ɓe laataaki Yahuudu'en, to' on nattu ci'e *Samaariya boo. 6Ammaa njahee to *Isiraa'iila'en nannduɓe e baali kalkuɗi. 7To njahaɗon fuu, nga'ajinee ɓe mbi'on : « *Laamu Allah ɓadake ! » 8Njamɗitinee ɓe njamɗaa, ummitinee maayɓe, njamɗitinee ɓe *kuturta, mburtinanee yimɓe *ginnaaji. Caahu kokkaaɗon, kokkee caahu. 9To' on kooy jiinaariya, koo ajurfaari, koo ceede nder jiibaaji mooɗon. 10To' koo moye mooɗon hooy jikaare koo toggooje ɗiɗi koo paɗe ɗiɗi koo sawru, gam kuwoowo fotii heɓgo nyaamdu muuɗum.

11To on ngarii si'ire koo wuro, ndaaree jaɓɗo veernugo on, mbeeron wuro ma'ako faa nde ndilluɗon. 12To on ngarii nattugo wuro, cilminee, mbi'on : « Jam wondu e mooɗon. » 13To wuro ngoon jaɓɓake on, jam mooɗon no laatoto dow maɓɓe. Ammaa to ɓe njaɓɓaaki on, jam mooɗon no so''oyto to mooɗon. 14To wonɓe si'ire ndeen koo wuro ngoon njaɓɓaaki on, koo calii yewanaago ka mbiiɗon, mburtee si'ire ndeen koo wuro ngoon, piɗɗon faa e sollaare kosɗe mooɗon.#10.14 Fiɗɗugo sollaare paɗe e holla yimɓe ɓeen calake jaɓgo almaajiri'en. Kadima e ɗum holla almaajiri'en lootii juuɗe mu'en, ɓe itti alhaki yimɓe ɓeen dow ko'e maɓɓe. 15Emi vi'a on goonga : *nyannde-darngal, ceri'a si'ire ndeen no ɓurey ka Sodoma e Gomora naawgo.#10.15 Sodoma e Gomora ɗum ci'e ɗiɗi ɗe Allah halki, gam ɗuuɗal hakkeeji yimɓe cie ɗeen. Fuɗɗoode 19.1-29

Torraaji gareyɗi

(Markus 13.9-13 ; Luka 21.12-17)

16— Ngewee nanon ! Mi lilii on kama baali nder cayaakiije. Gam ma'ajum, sey laatooɗon hakkilɓe kama bo'ole, e ɓe ngalaa layfi kama pooli. 17Kakkilee e yimɓe, gam ɓe njaharey on yeeso sernooɓe, ɓe piyey on nder *cuuɗi-ga'ajorɗi maɓɓe. 18Ɓe njaharey on yeeso mawɓe lesdi e laamiiɓe sabu am, gam faa caaydanooɗon yam yeeso maɓɓe e yeeso *ɓe laataaki Yahuudu'en. 19To ɓe njaharii on yeeso sernooɓe, to' on ngaanno dow ko mbi'oton, gam wakkaci ɗuum Allah no hokkey on ka mbi'oton. 20Ka mbi'oton kaan ivataa nder mooɗon, ammaa Ruhu *Baabiraawo mooɗon kam volvata nder konnduɗe mooɗon. 21Banndiraawo no hokkitirey banndum gam waree, baaba boo no hokkitirey ɓiyum kama noon. Ɓiɓɓe no ummanto danyooɓe mu''en faa mbaɗa ɓe mbaree. 22Yimɓe fuu no nganyey on gam am. Ammaa munyɗo faa timmoode no hisnete. 23To on torraama nder woɗnde si'ire, nyaardee si'ire feere. Emi vi'a on goonga : ko hokka ngiilodooɗon nder ci'e *Isiraa'iila fuu *Ɓii-Neɗɗo no vittoyey.

24Janngoowo ɓurataa moodibbo muuɗum manngu, maccuɗo boo ɓurataa jawmu wuro muuɗum. 25Ɗum belɗum to janngoowo laatake kama moodibbo muuɗum, maccuɗo boo kama jawmu wuro muuɗum. To ɓe noddirii jawmu wuro Ba'aljabul,#10.25 Ba'aljabul ɗum innde Ceyɗaan laamiiɗo ginnaaji. ndeen noye ɓe noddirta ɓiɓɓe ma'ako ?

Kaanɗo huleego

(Luka 12.4-7)

26— Gam ma'ajum, to' on kul yimɓe, sabu ko suuɗii fuu no suuɗtoto, sirrijum boo no anndete. 27Ko mbi'imi on nder niɓre, mbannginee ɗum nder jayngol. Ko metanaaɗon e noppi, anndinee ɗum dow ƴellel gure. 28To' on kul baawɗo wargo ɓanndu neɗɗo, ammaa o waawataa wargo yonki muuɗum. Sey nii kulon Allah baawɗo halkugo ɓanndu e yonki fuu nder yiite jahannama.

29Naa e ɗum soorra colon ɗiɗon hoboore wo'ore naa ? Ammaa koo go'otel ma'akon waatataa, sey e anndaangal *Baabiraawo mooɗon. 30Onon faa e gaasa ko'e mooɗon no limaaka. 31Gam ma'ajum, to' on kul, sabu on ɓurii colli ɗuuɗɗi darajja.

32Koo moye jaɓi yam yeeso yimɓe, miin boo mi jaɓey mo yeeso Baaba am gonɗo toon dow asama. 33Ammaa koo moye vi'i anndaa yam yeeso yimɓe, miin boo mi vi'ey mi anndaa mo yeeso Baaba am gonɗo toon dow asama.

Yeesu waddii ceedal

(Luka 12.51-53)

34— To' on tammo jo'onde jam ngaddumi nder duuniyaaru. Wanaa jo'onde jam ngaddumi, ammaa haɓre. 35Mi warii gam mi sennda ɓiɗɗo gorko e baaba muuɗum, ɓiɗɗo debbo boo e inna muuɗum, mi sennda debbo e esum debbo. 36Rimdaaɓe neɗɗo no laatoto wanywanyɓe ma'ako. 37Ɓurɗo yiɗgo inna muuɗum koo baaba muuɗum dow e am, fotaay laataago almaajiriijo am. Noon boo, ɓurɗo yiɗgo ɓiyum gorko koo debbo dow e am, fotaay laataago almaajiriijo am. 38Mo wanyaay hoore muuɗum, vakkii *gaafagal muuɗum tokki yam fuu, fotaay laataago almaajiriijo am. 39Giɗɗo hisnugo yonki muuɗum fuu, no dulley ki. Ammaa dulluɗo yonki muuɗum gam am fuu, no hisney ki.

Kuugal laada

(Markus 9.41 ; Luka 10.16)

40— Jaɓɓiiɗo on fuu jaɓɓake yam, jaɓɓiiɗo yam boo jaɓɓake liloyɗo yam. 41Koo moye jaɓɓii annabiijo gam o annabiijo, no heɓey laada baka annabiijo oon. Jaɓɓiiɗo goongaajo boo gam o goongaajo, no heɓey laada baka goongaajo oon. 42Emi vi'a on goonga : koo moye hokki go'oto nder ɓurɓe famɗugo ɓe'e jardugel ndiyam peewɗam gam o almaajiriijo am, o heppataa laada ma'ako.

Currently Selected:

Matta 10: fuq

ማድመቅ

Copy