Mateo 2
2
Nekeuma ke Menge Etew ne riyà ebpuun te Edsilaan su Ebpengarap ki Hisus
1Diyà in-anak si Hisus te inged ne Bitlihim lusud te Hudiya te gewii te iyan egkamal te inged ne datù ne ed-ingeranan ki Hirudis. Warà meuhet ne ruen menge etew ne metau te bituen riyà ebpuun te Edsilaan ne nekeuma riyà te Hirusalim. 2Nekeuma ran ne mid-insà dan se egkahi te, “Endei ke behu pà ne in-anak ne vatà ne midtendù ne edetuen te menge etew ne Hudiyanen? Su nekita rey ke bituen ne edlepew riyà te inged dey ne rapit te Edsilaan ne tuus te in-anak en sikandin, tembù be mibpengkayi key su ebpengarap key kandin.”
3Guna su nerineg ni Hirudis ini ne warà meupiya ne itungan din, ne iring ded dema ketà ke langun ne menge etew te inged ne Hirusalim. 4Ketà ne miburun din ke langun ne menge mepurù te terebpelengesa te menge Hudiyanen wey ke menge meyterù te penduan dan ne mid-insaan din sikandan te, “Endei igkeanak ke Impasad te Eleteala rengan ne Ebperetuen te langun?”
5“Diyà te inged ne Bitlihim lusud kayi te Hudiya,” ke sikandan, “su ini ke impesurat dut te ebpelambas te Lalag te Eleteala rengan se egkahi te,
6‘Sikiyu ne menge etew te inged ne Bitlihim lusud te Hudiya,
misan deisek ke inged niyu ne kenà sikiyu ke mewri
dut te menge inged ketà;
su riyà te keniyu ne ruen edlepew
ne ebpeneheewit dut te menge sakup ku
ne menge kevuwaran ni Israyil.’ ”
7Guna su nerineg ni Hirudis ini ne midtawag din ke behu pà ne nekeuma ne riyà ebpuun te Edsilaan te in-eles din ne mid-insaan din sikandan ke keenu medlepew ini se bituen ne nekita ran, ne netuenan din ketà te kandan. 8Ketà ne impependiyà din en sikandan te Bitlihim se egkahi te, “Pendiyà kew en ne ey-eyari niyu te ebpemengà arà se vatà. Ne embiya egketuen niyu ne lived kew kayi ne peketueni niyu kedì su apey a mekependiyà su ebpengarap a rema.”
9Nerineg den dà ini ne mid-ipanew ran en. Ne gewii te ed-ipanew ran ne ketà en maa ke bituen ne nekita ran te riyà dan pà te Edsilaan su mid-una kandan taman te edrenged en ketà te neubpaan te batà. 10Nekita ran dà ke bituen ne nehalew ran nevenar. 11Midlusud dan ketà te valey ne nekita ran ke vatà wey ke iney rin ne si Maria ne midlumpeng dan se ebpengarap kandin. Ne ketà ne mibukaan dan ke midtehuan te ibehey ran kandin ne indenà dan diyà te kandin ke bulawan, mepurù ne rukut, wey periyemut ne ed-ingaranan te mira.
12Ne guna su ed-ulì dan en ne impesabut kandan te Eleteala impepevayà te tehinep te kenà dan en medlived diyà te ki Hirudis. Ne ketà ne riyà dan en mibpevayà te seveka ne ralan te kineulì dan en.
Impelahuy ni Jose wey si Maria ke vatà Diyà te inged ne Ihiptu
13Guna su migenat en ke menge meama ne riyà ebpuun te Edsilaan ne mibpetehinep en ke suluhuen te Kerenan ki Jose se egkahi te, “Enew ke en ne kua nu ke vatà wey ke iney rin ne pelahuy kew riyà te inged ne Ihiptu. Ne kenà kew awà diyà taman te kenà ku ebpeulien sikiyu su ebpemengaan ni Hirudis ayan se vatà su ed-imetayan din.”
14Ne arà dà ne mid-enew si Jose ne mid-ewit din ke vatà wey ke iney rin te arà dà ne kerukileman te ebpendiyà te inged ne Ihiptu. 15Ne riyà dan mid-ubpà taman te minatey en si Hirudis.
Ned-ulaula ini su apey metuman ke impekahi te Kerenan rengan dut te ebpelambas te Lalag din ne si Husiyas ne egkahi te, “Impeulì ku ke Anak ku riyà ebpuun te inged ne Ihiptu.”
Mibpeimetayan ni Hirudis ke menge Batà ne Meama Diyà te Bitlihim
16Guna su netuenan ni Hirudis te negaga rà sikandin te itungan dut te menge meama ne riyà ebpuun te Edsilaan ne neregreg sikandin te langet din. Ne insuhù din te ebpeimetayan ke langun ne menge vatà ne meama diyà te inged ne Bitlihim wey ketà te nekelingut ne menge inged ne egenat te deruwa pà ne rahun taman te behu pà ne in-anak su mid-antap din dut te nerineg din ketà te menge etew ne riyà ebpuun te Edsilaan ne nekederuwa en ne rahun igenat dutun te nekita ran ke bituen.
17Ne ketà ne netuman en ke impekahi rut te ebpelambas te Lalag te Eleteala rengan ne si Jeremias ne egkahi te,
18“Duen nerangkub ne egkerineg diyà te inged ne Rama,
ne edsinehew wey ebpenderawit.
Su ebpenderewitan ni Raquel ke menge anak din,
ne kenè en egkelangan ke hinawa rin
su warè en ke menge anak din.”
Ke Kineulì en en ni Jose Riyà Ebpuun te Ihiptu
19Guna su minatey en si Hirudis ne mibpetehinep en maa ke suluhuen te Kerenan ki Jose diyà te inged ne Ihiptu, 20ne migkahi te, “Enew ka ne kua nu ke vatà wey ke iney rin ne ulì kew en diyà te inged ne Israyil su minatey en ke menge etew ne egkiyug ne ebpeimatey rut te vatà.”
21Ne mid-enew si Jose ne migkuwa rin ke vatà wey ke iney rin ne mid-ulì dan en diyà te inged te Israyil. 22Ugaid ne guna su nerineg ni Jose te si Arkilew se egkamal dut te inged ne Hudiya nekesambì dut te amey rin ne si Hirudis ne neandek sikandin ne ed-ulì ketà. Ne mibpetehinep ma ke Eleteala ne mibaag kandin ne ketà ne riyà dan mibpesinaru te lusud te Geliliya, 23ne mid-ubpà dan ketà te inged ne ed-ingaranan te Nesarit. Ned-ulaula rin ini su apey metuman ke impekahi rut te ebpelambas te Lalag te Eleteala rengan ne egkahi te, “Ed-ingeranan sikandin te etew te Nesarit.”
Currently Selected:
Mateo 2: mbi
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 1989, Wycliffe Bible Translators, Inc. All rights reserved.
