Génesis 9
9
Yus Noéjai Chicham Najanamu
1Yus Noén tura uchiri ainauncha pengker awajsatas chicharak: —Uchi yajutmakrum tura nawantrumraram nukap yujartaram. 2Mash nungkanam kuntin ainau, tura kuntinchau ainausha, tura nanamtin ainausha, tura entsanam yujainausha nepetkatin asakrumin, atumin shamraminak kurartin ainawai. 3Yamaikia kuntinu namangke tura árak ainausha wakerakrumka pachitsuk yuwamnawaitrume, tusan tsangkatkatatjarme. 4Antsu kuntinu namangke numpentuk pengké yuwashtinuitrume.
5Aints chikichan maamtaikia, tura yukartin aintsun maamtaisha, wi yapaijkiatatjai. 6Kame, wiiya numamtinak aintsnaka najanamiajai. Tura asamtai aints chikichan maamtaingkia, niisha nunisang maamai atinuitai. 7Antsu atumka nukap yujaarum mash nungka ainaun netkataram, —Yus timiayi.
8Nunia Noén tura uchiri ainauncha chicharak: 9—Anturtuktaram. Atumjai tura atumi weari ainaujai yamai chichaman najanatjai. 10Nunia juun kanunmaya atumjai jiinkiarmia nujaisha nanamtin ainaujai, tura namangken yuchau ainaujaisha, tura namangken yu ainaujaisha, mash nungkanam yujaina nujaisha chichaman najanatjai. 11Wi tajarme nunaka pengké yapajiashtatjai. Mash nungkanam pujuinaunka nujangjaingkia ataksha pengké amukchatnuitjai. 12-13Nekasan tajarme tusan, atumjai tura mash nungkanam iruna nujai chichaman najanamunka pengké yapajiashtinuitjai tusan, tungkiangkun yurangminam pujsatatjai. Tura asamtai tungkiang jiisrum, pengker nintimsaram pujustaram tajarme.
14Tura wi tajarme nuka kajinmatkiram tusan, yurangminam tungkiangkun pujsatatjai. 15Wi turau asan, ju chichamnaka pengké kajinmakchatnuitjai. Tura mash nungkanam matsatina nusha ju chichamnaka nintimrartinuitai: Wikia ataksha nujangjaingkia nungkanka pengké mesrashtinuitjai tajarme. 16Tungkiang yurangminam pujamtaikia, nuna jiisan, mash aints ainaujai tura mash nungkanam yujau ainaujaisha chichaman najanamiajana nunaka kajinmakchatnuitjai, —Yus timiayi.
17Ayu, wi tuke —pengké turashtinuitjai tusan, mash aints ainaujai, tura mash nungkanam matsatina nujaisha chichaman najanaja juka kajinmatkirap tusan, tungkiangkun yurangminam pujsatatjai tusan, Yus asan nekasan tajarme, —tusa Yus Noén timiayi.
Noé Ni Uchiri Ainaujai
18Noé ni uchiri ainaujai juun kanunmaya jiinkiarmia nuka ju armiayi: Sem, Cam, tura Jafet. Camka Canaánka apari ayayi. 19Noé uchiri tres armia nuka ni weari ainaujai mash nungkanam yujartin armiayi.
20Tura Noéka arakan arakmatan nangkama uvancha arakmakmiayi. 21Tura nu arakmaunumia uva ainaun juuk, uva yumirin kariaun umur nampek, nii jeen nuwap najanamunam japen misu kanur tepesmiayi. 22Turamtai Canaánka apari, Cam naartin aa nuka, apari misu tepaun wainak, aanam jiinki yachii ainaun ujakmiayi. 23Tura ujakam Sem Jafetjai apari misu tepaun jiitan nakitinau asar, tarachin jukiar yakajin awangkeasar jukiar, yajá jiimsar aparin nukukarmiayi.
24Nunia Noé nampekmaurin tsaar nantaki, uchiri Cam misu tepau wainkamun nekaamiayi. 25Turamtai Canaánkan pachis chichaak: —¡Canaánka yumingkramuitai! Nuka chikich inati nangkamasang ni yachii ainaun inatiri atinuitai, —timiayi. 26Nunia chichaak: —Semnaka wina Yusur yaingti. Antsu Canaánka ni inatiri ati —timiayi. 27Tura Jafetan pachis chichaak: —Jafetnaka Yus pengker awajsati, tura Sem pujamunam apujsati. Turamtai Canaánka ni inatiri ati, —tusa Noé timiayi.
28Nu juun nujang nangkamaramtai Noéka trescientos cincuenta musach iwiaaku pujusmiayi. 29Kame, mash irumram novecientos cincuenta musach pujus jakamiayi.
Currently Selected:
Génesis 9: acu
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2019, Wycliffe Bible Translators, Inc. All rights reserved.
