Jenesis-Agafa 3
3
Ana vene a'mo'ene Anumzamofo ke rutagrena'a naneke
1Ra Anumzamo tmage huno maka zgagfa mopafi trohu zamante'nefintira, osifave'mofo antahi'zamo zamagatere'ne, hozafima me'nea zafa rgagura, Anumzamo tmagerfa huno mika one'o huranante'nefi? 2A'mo osifavemofo kenona hu'ne, hozafinti mika zafa rga knare ne'o huno hurante'ne. 3Hu'neanagi mago zafa hoza amunompi me'nea zafa rgagura avako osuta one'o, nesnuta'a frigaha'e huno Anumzamo tasmi'ne. 4Osifavemo'a a'mofonkura amanage hu'ne, tanagra ofrigaha'e. 5Na'ankure Anumzamo'a keno antahino hu'neankino nesna'ana tanavumo'a hari hina Agri kna hutna antahi antahi tani'amofona eriama hanigetna, knare zanki havi zanki hutna kegaha'e. 6Hanki a'mo ana zafa rgama keana nezama ne'amo'a knare higeno, avuma keazamo enena knare hu'neankino, avesizamo'a ana zafa rga'ama mago'mo'ma nesniana knare antahi antahiza erigahie. Hanki ana zafa rga tagino neneno, neve ene mani'negukino amigeno ne'ne. 7Netake'no znavumo'a hari hige'ne znavufga znavapa mani'nene, znagazegu nehune zafa (fik) anina anakike kena masina'e.
Anumzamo Adane, Ivikizni hanavege huznante'nea naneke
8Kinaga zasi antegeno Anumzamo hozafi ne'egeno agasasanke nentahi'ne hozafi zafa asoka fraki'ne mni'na'e. 9Anumzamo'a kezatino vemofonku, iga mni'nane? huno higeno, 10Hozafi neanke'na kagasasanke nentahi'ne, na'ankure navufga navapa mani'nena koro hu'na fraki'noe. 11Ra Anumzamo huno, iza hugantegenka kavufga kvapara mani'nane? Nagrama ono hu'noa zafa rga'a taginka ne'nampi? 12Higeno vemo'a huno Kagrama nami'nana a'mo ana zafa rga tagino neneno namige'na ne'noe. 13Anante Ra Anumzamo ana a'ku huno, kagra e'izana naza hu'nane? Huno antahigegeno a'mo kenona hu'no, osifavemo renavatga hige'na tagi'na ne'noe. 14Anumzamo amanage huno osifavemofo asmi'ne,
Osifavemoka e'inama hana nona'a kumate afu'ene, trampi zgagfane mani'nafinti tusi (kes) hugantoe. Kagra zamageterenka rankna erinka kasguregati vano nehunka, kugusopa nenenka mika zupa manigahane.
15Nagra kagrira kazeri'na a'mofo ha' vahe'a antesugeno, a'mo kagri ha' vahe manigahie. Hanigena Nagra tanagigomokizmi amunopina ha'za antesugeno a'mo ksentesia mofavremo kaseni reproro vazina, kagra agamerumpafi amprigahane.
16A'mofonkura amanage hu'ne, Nagra kagrira rama'a kata kamisugenka, ana katafi maninenka mofavrea ksentegahane. Ana nehunka negave avesintenka kva huntegahue hunka hnananagi, agra kagri kegva krigantegahie.
17Hianagi Adamuna amanage huno asmi'ne, a'kamofo ke antahinka Nagrama kase huganteno'a zafa rga ne'nanku mopamofo
tusi huntoe, kata negrinkenka maka zupa hozaka'a enerisankeno nezanka'a fore hinkenka negahane.
18Hozafina ne'zana ave'ave zane agaso tra'zamo mopafi fore huno refinetena nezana anampinti erinka negahane.
19Kavugosafinti kamunasisi hute'sigenka nezanka'a erinka negahane. Ana hume vunka kugusopare tro hugante'nogu ete mopafi ufregahane.
20Ana nemo'a nenaro agi'a Ivi'e #Ivi'e huno Hibru kefi hu'nea agafa'a hakare zamasimu nentaza zgamokizmi nezmarera kna hu'ne huno ante'ne. Na'ankure mika vahe'mokizmi zamarera'zama hanigure huno antemi'ne. 21Hanki Ra Anumzamo'a zgagfa akru'a tavrofeno Adane, Ivigizni kukena masizanante'ne. 22Ra Anumzamo amanage hu'ne, ama ne'mo'a tagri kna huno knare zane havi zanena hago antahi'ne. E'igu manivava hu'mofo zafa rga'a mago'ene tagino nesnuno'a manivava hu'zanku, 23Ra Anumzamo'a Ideni hozafintira huntegeno fegi'a agri'ma tro hu'nea mopare, hoza erizama erisnigu huntegeno vu'ne. 24Anumzamo ana ne'ma Ideni hozafinti ahenatigeno vigeno'a, zge hnatitega hanvenentike ankero zgane tevenefa tagivazu nehia bainati kazimo kagigagi nehuno ana manivava zafa mofona kegva hu'naze.
Currently Selected:
Jenesis-Agafa 3: kbq
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2014, Wycliffe Bible Translators, Inc. All rights reserved.
