Matiu 1
1
Iesus Labu Nanaritakadi
(Luk 3:23-38)
1Ngaedi nge Iesus Kristus labu rangaka: Iesus nge Debiti labunao ka ipura. Be Debiti nge Abaram labunao ka ipura.
2Be Abaram nge Aisak tama.
Aisak nge Zekop tama.
Zekop nge Zuda taritoka zaiza tamadi.
3Zuda nge Perez be Zera tama-diaru. Tina-diaru ara Tema.
Perez nge Ezron tama. Ezron nge Ram tama.
4Ram nge Aminadab tama.
Aminadab nge Nason tama.
Nason nge Samon tama.
5Samon nge Boaz tama. Boaz tina ara Reab.
Boaz nge Obed tama. Obed tina ara Rut.
Obed nge Zesi tama.
6Zesi nge anuatanepoa biabia ara Debiti nge tama.
Debiti nge Solomon tama. Solomon tina matamata nge Iuraia roa.
7Solomon nge Reoboam tama.
Reoboam nge Abaiza tama.
Abaiza nge Asa tama.
8Asa nge Zeosapat tama.
Zeosapat nge Zeoram tama.
Zeoram nge Uzaia tama.
9Uzaia nge Zotam tama.
Zotam nge Eaz tama.
Eaz nge Ezekaia tama.
10Ezekaia nge Manase tama.
Manase nge Emon tama.
Emon nge Zosaia tama.
11Zosaia nge Zekonaia taritoka zaiza tamadi. Dia-lo be ungguma aradi Babilon dipura be ungguma Iuda diundi be diuauridi be kaba nedia-lo dibagadialako.
12Uaura-lo be dimule nge nanaritakadi bokai dieno:
Zekonaia nge Sealtiel tama.
Sealtiel nge Zerubabel tama.
13Zerubabel nge Abaiud tama.
Abaiud nge Eliakim tama.
Eliakim nge Azo tama.
14Azo nge Zadok tama.
Zadok nge Akim tama.
Akim nge Eliud tama.
15Eliud nge Elieza tama.
Elieza nge Matan tama.
Matan nge Zekop tama.
16Zekop nge Iosep tama. Iosep roa Maria. Be Maria Iesus inekiaki. Iesus ka Kristus.#1:16 Ara Kristus Ibru pile-lo nge Mesaia.
17Abaram-lo be imai Debiti-lo nge tubu kulemoa-be-oati moarunga. Debiti-lo be imai ramani ungguma Babilon dipura be Iuda diundi be diuauridi be dibagadi nge tubu kulemoa-be-oati moarunga. Babilon-lo be dimule be imai Kristus puraianao nge tubu kulemoa-be-oati moarunga.
Kristus Ba Be Nekiaka Ipura
(Luk 2:1-7)
18Iesus Kristus bokainatuka be nekiaka ipura. Tina Maria nge Iosep dirauamani. Ata tago isi disoaki-buduru be Maria ambe Oli Spirit kaiboang nena-lo be itine. 19Maria roa rarauam Iosep nge tamoata iauia be muzinga moarunga nge adoadodi be tago irere lili-be-matao Maria ngaruku-goalai. Bokaibe ilo ilelenaki be zugumaba-lo be Maria ngasegeaki kana.
20Ata Iosep isi ilo ilelelenakia-la be Tanepoa Nanaranga ‘enzel’ ne teke rai-o ipura be bokai irai, “Iosep, Debiti tubu! Maria gobagai be gouati kana nge moaki taburim ira, bakara nge Oli Spirit kaiboang nena-lo ka itine. 21Masa natu moane teke nganekiaki be ara ‘Iesus’ gobuleakini. Natu ngae ka tamoata be aine ne moarunga muzigoala nedia-lo be ngauketidi kana.”
22Kana ngaedi bokainatuka dipura be Tanepoa pilenga tekedi toira ‘propet’ teke aoa-nalo dipusika nge dikalingo. 23Toira be Tanepoa pilenga bokai dieno, “Aine teke moane zaiza tago sesu isi dieno-budu masa ngatine be natu moane teke nganekiaki ara Imanuel.”#Ais 7:14 Ara Imanuel nge labu bokai: “Nanaranga marada isoaki.”
24Bokaibe Iosep imarang nge Tanepoa ‘enzel’ ne pilenga itagadi be Maria ibagai be iuati. 25Ata tago sesu dieno-buduru nibe natu-ba moane ngae nekiaka ipura, be ara Iesus ibuleakini.
Currently Selected:
Matiu 1: mva
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 1996, Wycliffe Bible Translators, Inc. All rights reserved.
