یارادیلیش 32
32
یعقوبون عئسو ائله گؤروشه حاضیرلاشماسی
1یعقوب یولونا داوام وردی. تارینین ملکلری اونا راست گلدئلر. 2یعقوب اونلاری گؤرنده ددی: «بو، تارینین اوردوگاهی‌دیر.» او یرئن آدینی مَخه‌نایئم#32:2 «مَخه‌نایئم» - عئبرانی دئلئنده «ائکی اوردوگاه» قویدو.
3یعقوب اؤزوندن قاباق اِدوم چؤلونه، سِعئر تورپاغینا، قارداشی عئسونون یانینا قاصئدلر گؤندَ‌ردی. 4اونلارا بو امری وردی: «آغام عئسویا دیئن کی، قولون یعقوب بله دیئر: ”من لابانین یانیندا قالیب ائندئیه قدر یاشادیم. 5اؤکوزلرئم، اششَکلرئم، سورولرئم، قوللاریم و کنئزلرئم اولدو. من آغاما خبر ورمک اوچون یانینا قاصئدلر گؤندَ‌ردئم کی، سنئن گؤزونده لوطف تاپیم.“» 6قاصئدلر یعقوبون یانینا قاییدیب ددئلر: «قارداشین عئسونون یانینا گتدئک. اؤزو ده سنئن پئشوازین اوچون گلئر و یانیندا دؤرد یوز نفر وار.» 7یعقوب چوخ قورخوب پرئشان اولدو. یانیندا اولان آداملاری، سورولری، مال-حیوانی و دوه‌لری ائکی دسته‌یه آییریب ددی: 8«اگر عئسو بئر دسته‌یه هوجوم ادئب اونلاری قیرسا، آرخادا قالان دسته قاچا بئلسئن.»
9سونرا یعقوب ددی: «ای آتام ائبراهئمئن تاریسی، آتام ائسحاقین تاریسی! یارب، سن منه دمئشدئن: ”اؤز اؤلکه‌نه و قوحوملارینین یانینا قاییت. من سنه یاخشیلیق اده‌جیم.“ 10قولونا گؤرستدئیئن بوتون خیئرخاهلیق و وفایا لایئق دیئلم؛ بو اوردون چایینی تَکجه دَیَنَکئمله کچدئم، و ائندی ائکی دسته کؤچوم وار. 11یالواریرام، منی قارداشیم عئسونون اَلئندن قورتار. چونکی قورخورام گلئب منه و اوشاقلاریملا آنالارینا هوجوم اتسئن. 12سن ددئن: ”قطعن سنه یاخشیلیق اده‌جیم، نسلئنی ساییسیز-حسابسیز دهنز قومو قدر چوخالداجاغام.“»
13یعقوب او گجه‌نی اورادا کچئرتدی. مالئک اولدوغو هر شیدن قارداشی عئسویا هدئیّه اولاراق 14ائکی یوز دئشی کچی، ائیئرمی اِرکَک کچی، ائکی یوز قویون، ائیئرمی قوچ، 15بالالاری ائله بئرلئکده اوتوز دئشی دوه، قیرخ ائنَک، اون گامیش، ائیئرمی دئشی اِششَک و اون اِرکَک اِششَک گؤتوردو. 16سورولری آیری-آیری قوللارینا تاپشیردی و اونلارا ددی: «منئم قاباغیمدا گدئن و بئر سورو ائله او بئری سورو آراسیندا آرا ساخلایین.» 17یعقوب بئرئنجی قولا امر ادئب ددی: «قارداشیم عئسو سنه راست گلئب سوروشاندا کی، ”کئمئن آدامیسان، هارا گدئرسن، قاباغینداکی بو حیوانلار کئمئندئر؟“ 18اونا دِه: ”بونلار قولون یعقوبوندور، بو دا آغام عئسویا گؤندَ‌رئلمئش هدئیّه‌دئر. اؤزو ده بئزئم دالیمیزجا گلئر.“» 19سونرا یعقوب، ائکئنجی و اوچونجو قولونا و سورولرئن دالینجا گدن هر کسه همن امری وردی: «عئسویا راست گلنده همن شیلری دئیه‌جکسئنئز. 20دئیه‌جکسئنئز: ”قولون یعقوب دا دالیمیزجا گلئر.“» چونکی او، اؤز-اؤزونه دیئردی: «اوّلجه گؤندَردئیئم هدئیّه ائله اونو یومشالدیب، سونرا اونونلا گؤروشه‌رم. بلکه اوندا منی قبول ادر.» 21هدئیّه‌لر یعقوبون قاباغیندا گتدی، آمّا او گجه‌نی اوتوراق اتدئیی یرده کچئرتدی.
یعقوبون تاری ائله راستلاشماسی
22یعقوب او گجه قالخیب ائکی آروادینی، ائکی کنئزئنی و اون بئر اوشاغینی گؤتوروب یَبّوق چایینین داهاز یرئندن کچدی. 23اونلاری گؤتوروب چایی کچئرتدی و وار-یوخونو دا کچئرتدی. 24سونرا یعقوب تک قالدی. سحر آچیلانا قدر بئر آدام اونونلا گولَشدی. 25یعقوبا قالئب گله‌بئلمه‌دئیئنی گؤرنده، اونون بودونون اویناغینا ضربه ووردو. اله کی، او آداملا گولَشَرکن یعقوبون بودونداکی اویناغی ضربه‌لَندی. 26او شخص ددی: «بوراخ، گدئم، چونکی سحر آچیلیر.» یعقوب ددی: «منه برکت ورمه‌یه‌سن، سنی بوراخمارام.» 27او شخص سوروشدو: «آدین نه‌دئر؟» یعقوب ددی: «یعقوب.» 28شخص ددی: «آرتیق سنه یعقوب یوخ، ائسرایئل#32:28 «ائسرایئل» - عئبرانی دئلئنده «تاری ائله گولَشئر.» دیئله‌جک، چونکی سن تاری و ائنسانلارلا گوله‌شئب قالئب گلدئن.» 29یعقوب سوروشدو: «خاهئش ادئرم، آدینی دِه.» او ددی: «آدیمی نئیه سوروشورسان؟» او شخص اورادا یعقوبا برکت وردی. 30یعقوب او یِرئن آدینی پِنی‌اِل#32:30 «پِنی‌اِل» - عئبرانی دئلئنده «تارینین اوزو» قویدو، چونکی ددی: «تارینی اوز-اوزه گؤردوم و سالامات قالدیم.» 31یعقوب پِنی‌اِلی کچن واخت گونش دوغدو. او، بئر بودوندان آخساییردی. 32اونا گؤره بو گونه قدر ده ائسرایئللی‌لر بود اویناغینین اوستونده‌کی وَتَری یمزلر. چونکی گوله‌شَن شخص یعقوبون بود اویناغینین وَتَرئنئه توخونموشدو.
Currently Selected:
یارادیلیش 32: موقدس کتاب
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Elam Ministries 2013. All rights reserved.