یارادیلیش 26
26
ائسحاق و اَبئمِلِک
1ائبراهئمئن یاشادیغی گونلرده اولان آجلیقدان ساوایی، اؤلکه‌ده داها بئر آجلیق اولدو. بونا گؤره ائسحاق گِرارا، فئلئسطلی‌لرئن پادشاهی اَبئمِلِکئن یانینا گتدی. 2رب اونا گؤرونوب ددی: «مئصئره گتمه؛ سنه دئیه‌جَیئم اؤلکه‌ده ساکئن اول. 3بو تورپاقدا قال. من سنئنله اولاجاغام و سنه برکت ورئب بوتون بو اؤلکه‌لری سنه و سنئن نسلئنه وره‌جیم؛ آتان ائبراهئمه ائچدئیئم آندی یرئنه یتئره‌جیم. 4نسلئنی گؤیده‌کی اولدوزلار قدر چوخالداجاغام و بوتون بو اؤلکه‌لری سنئن نسلئنه وره‌جیم. یِر اوزونون بوتون مئلّتلری سنئن نسلئن واسئطه‌سی‌ائله برکت آلاجاقلار. 5چونکی ائبراهئم مندن ائطاعت ادئب فرمانلاریما، امرلرئمه، قایدالار و قانونلاریما عمل اتدی.»
6بله‌جه ائسحاق گِراردا قالدی. 7اورانین ساکئنلری ائسحاقین آروادی باره‌ده سوروشاندا، ائسحاق ددی: «او منئم باجیمدیر.» چونکی قورخوردو دسئن: «او منئم آروادیمدیر.» و دوشونوردو کی، «رئبقادان اؤتری بو یِرئن آداملاری منی اؤلدوررلر، چونکی او گؤزلدئر.» 8ائسحاق اورادا اوزون مودّت قالدی. بئر گون فئلئسطلی‌لرئن پادشاهی اَبئمِلِک پنجره‌دن باخیب گؤردو کی، ائسحاق آروادی رئبقانی عزئزله‌یئر. 9اَبئمِلِک ائسحاقی چاغیریب ددی: «باخ، یَقئن او سنئن آروادیندیر! بس نئیه ددئن کی، ”او منئم باجیمدیر؟“ ائسحاق اونا ددی: «چونکی دوشوندوم اوندان اؤتری مومکوندور جانیمی اَلدن ورئم.» 10اَبئمِلِک ددی: «بو نه ائشدئر باشیمیزا گتئردئن؟ خالقدان بئری راحاتجا سنئن آروادینلا یاتا بئلردی و بله‌جه باشیمیزی خاطایا سالا بئلردئن.» 11سونرا اَبئمِلِک بوتون خالقا امر ورئب ددی: «اونا و اونون آروادینا توخونان هر کس قطعن اؤلومه ورئله‌جک.»
12ائسحاق او تورپاقدا توخوم اَکدی و او ائل یوز قات محصول آلدی. بله‌جه رب اونا برکت وردی. 13ائسحاق بؤیوک آدام اولدو. گت-گده واری آرتدی اِله کی، چوخ وارلی بئر آدام اولدو. 14اونون چوخلو سورولر، رَمه‌لر و خئدمتچئلری اولدوغونا گؤره، فئلئسطلی‌لر اونا پاخیلّیق ادئردئلر. 15فئلئسطلی‌لر آتاسی ائبراهئمئن گونلرئنده آتاسینین قوللارینین قازدیغی بوتون قویولاری قاپاییب، تورپاقلا دولدورموشدولار. 16اَبئمِلِک ائسحاقا ددی: «یانیمیزدان گت، چونکی بئزدن چوخ گوجلو اولوبسان.» 17ائسحاق اورادان گدئب گِرار دره‌سئنده چادیر قوردو و اورادا ساکئن اولدو.
18ائسحاق آتاسی ائبراهئمئن گونلرئنده قازیلمیش سو قویولارینی گئنه قازدی، چونکی فئلئسطلی‌لر ائبراهئمئن اؤلوموندن سونرا اونلاری قاپامیشدیلار. او، آتاسینین قویدوغو همن آدلاری اونلارا وردی. 19آمّا او زامان کی، ائسحاقین قوللاری دره‌ده تورپاغی قازاندا بئر ائچمه‌لی سو قویوسو تاپدیلار، 20گِرار چوبانلاری «سو بئزئمدئر» دیئب، ائسحاقین چوبانلاری ائله موباحئثه اتدئلر. بونا گؤره ده ائسحاق قویونون آدینی عِسِق#26:20 «عِسِق» - عئبرانی دئلئنده «موباحئثه» قویدو، چونکی اونون اوستونده موباحئثه اتمئشدئلر. 21اونلار آیری بئر قویو قازدیلار. اونون اوستونده ده داعوالاشدیلار. ائسحاق بو قویونون آدینی سئتنا#26:21 «سئتنا» - عئبرانی دئلئنده «دوشمنلئک» قویدو. 22ائسحاق اورادان کؤچوب، آیری بئر قویو قازدی. لاکئن اونون اوستونده موباحئثه اتمه‌دئلر، بونا گؤره ده ائسحاق اونون آدینی رِخوبوت#26:22 «رِخوبوت» - عئبرانی دئلئنده «گِنئشلئک» قویوب ددی: «نهایت رب بئزه گنئشلئک وردی و بئز بو تورپاقدا ثمره‌لی اولاجاغیق.»
23ائسحاق اورادان بئرشئبایا گتدی. 24او گجه رب اونا گؤرونوب ددی: «من آتان ائبراهئمئن تاریسی‌یام. قورخما، چونکی من سنئنله‌یم. قولوم ائبراهئمئن خاطئری اوچون سنه برکت وره‌جیم و نسلئنی چوخالداجاغام.» 25ائسحاق اورادا بئر قوربانگاه دوزَلتدی و ربّه سئتایئش اتدی. او اورادا چادیر قوردو. ائسحاقین قوللاری اورادا بئر قویو قازدیلار.
26بو آرادا اَبئمِلِک مصلحتچئسی اَخوزّات و قوشون باشچیسی فئکوللا بئرلئکده گِراردان ائسحاقین یانینا گلدی. 27ائسحاق اونلارا ددی: «نه اوچون یانیما گلئبسئنئز؟ سئزئن کی مندن آجیغینیز گلئر و منی یانینیزدان قوووبسونوز.» 28اونلار ددئلر: «بئز آیدینجا گؤروروک کی، رب، سنئنله اولوب. اونون اوچون ده ددئک کی، قوی ائندی آرامیزدا، بلی، سنئنله بئزئم آرامیزدا بئر آند اولسون و قوی سنئنله بئر عهد باغلایاق 29کی، سن بئزه هچ پئسلئک اتمَیه‌سن، نجه کی، بئز سنه توخونمادیق و یاخشیلیقدان ساوایی هچ بئر شی سنه اتمه‌دئک و سنی صاغ‌سالامات یولا سالدیق. ائندی سن ربّئن برکت وردئیی آدامسان.» 30ائسحاق اونلارا ضئیافت وردی و اونلار یِیئب ائچدئلر. 31سحر تزدن قالخیب، بئربئرلرئنه آند ائچدئلر. ائسحاق اونلاری یولا سالدی و اونلار صاغ-سالامات اونون یانیندان گتدئلر. 32او گون ائسحاقین قوللاری گلدئلر و قازدیقلاری قویو باره‌ده اونا خبر ورئب ددئلر: «سو تاپدیق.» 33ائسحاق بو قویونون آدینی شئبا#26:33 «شئبا» - عئبرانی دئلئنده «آند» قویدو، بونا گؤره ده شهرئن آدی بو گونه قدر بئرشئبادیر.#26:33 «بئرشئبا» - یعنی «آند قویوسو» و یا «یِدّئنئن قویوسو»
عئسونون آروادلاری
34عئسو قیرخ یاشیندا اولاندا خئتلی بئعئرئنئن قیزی یودئتی و خئتلی اِلونون قیزی باسمَتی آرواد آلدی. 35اونلار ائسحاق و رئبقایا اورَک آجیسی گتئردئلر.
Currently Selected:
یارادیلیش 26: موقدس کتاب
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Elam Ministries 2013. All rights reserved.