یارادیلیش 24
24
ائسحاق و رئبقا
1ائبراهئم قوجالیب یاشلی اولموشدو. رب هر شیده اونا برکت ورمئشدی. 2بئر گون ائبراهئم اِوئنده‌کی لاپ یاشلی قولونا کی، بوتون ائشلری ائداره ادئردی، ددی: «اَلئنی بودومون آلتینا قوی. 3ائسته‌یئرم گؤیون و یرئن تاریسی ربّئن آدینا منه آند ائچه‌سن کی، اوغلوما آرالاریندا یاشادیغیم کَنَعانلی‌لارین قیزلاریندان آرواد آلمایاجاقسان، 4لاکئن منئم اؤلکه‌مه، قوحوملاریمین یانینا گدئب، اوغلوم ائسحاق اوچون اونلاردان آرواد آلاجاقسان.» 5نؤکر اونا ددی: «بلکه قیز راضی اولمادی کی، منئمله بئرلئکده بو اؤلکه‌یه گلسئن؟ آیا او واخت اوغلونو سنئن چیخدیغین اؤلکه‌یه آپاریم؟» 6ائبراهئم اونا ددی: «باخ، مبادا اوغلومو اورایا آپاراسان. 7گؤیلرئن تاریسی رب کی، منی آتامین اِوئندن و دوغولدوغوم یردن چیخارتدی و منئمله دانیشیب آند ائچدی کی ”بو تورپاغی سنئن نسلئنه وره‌جیم“، اؤز مَله‌یئنی سنئن قاباغیندا گؤند‌ره‌جک و سن اورادان اوغلوما آرواد آلیب گتئره‌جکسن. 8اگر او آرواد ائستمه‌سه کی، سنئنله گلسئن، سن بو آنددان آزاد اولورسان. آمّا منئم اوغلومو اورایا آپارما.» 9نؤکر اَلئنی آغاسی ائبراهئمئن بودو آلتینا قویوب بو ائشه گؤره اونا آند ائچدی.
10نؤکر آغاسینین دَوه‌لرئندن اون دوه گؤتوروب آغاسینین لاپ یاخشی هدئیّه‌لری‌ائله گتدی و اَرام نَخه‌رایئمه، #24:10 «اَرام نَخه‌را‌یئم» - همن بِینولنَهرِین. ناخورون شهرئنه گلدی. 11نؤکر آخشام دوه‌لری شهرئن اشئیئنده اولان قویونون یانیندا یاتیرتدی. آروادلار بو واخت سو چکمَک اوچون بورایا گلردئلر. 12سونرا دوعا اتدی: «یارب، آغام ائبراهئمئن تاریسی، یالواریرام، بو گون ائشئمی آواند اِله و آغام ائبراهئمه محبّت گؤرسد. 13باخ، من بو بولاغین یانیندا دورورام؛ شهر ساکئنلرئنئن قیزلاری سو چکمَک اوچون بورایا گلئرلر. 14قوی اِله اولسون کی، او قیزا کی، دیئرم ”خاهئش ادئرم، سهنگئنی اندئر، سو ائچئم“، و او دا دیئر کی، ”ائچ، دوه‌لرئنه ده وره‌رم.“، قوی او قیز قولون ائسحاق اوچون تعیئن اتدئیئن آرواد اولسون؛ بوندان بئله‌رم کی، آغاما محبّت ادئرسن.»
15او، سؤزونو بئتئرمه‌مئشدی کی، بِتوعِلئن قیزی رئبقا کی، ائبراهئمئن قارداشی ناخورون آروادی مئلکادان دوغولموشدو، چئینئنده سهنگ اورایا گلدی. 16قیز چوخ گؤزل و باکئره ائدی. هچ کس اونونلا یاخینلیق اتمه‌مئشدی. او، بولاغا اِندی و سهنگئنی دولدوروب یوخاری قالخدی. 17نؤکر اونون پئشوازینا قاچیب ددی: «خاهئش ادئرم، سهنگئندن بئر آز سو ور، ائچئم.» 18قیز ددی: «آغام، بویور ائچ.» قیز تز سهنگئنی اَلی اوستونه اِندئردی و اونا سو وردی. 19اونا سو ورندن سونرا ددی: «دوه‌لرئن اوچون ده سو چکه‌رم کی، ائچئب دویسونلار.» 20قیز تز سهنگئنی تَکنه‌یه بوشالتدی، سو چکمَک اوچون قویونون یانینا گری قاچدی و نؤکرئن بوتون دوه‌لری اوچون سو چکدی. 21بو آرادا او آدام ساکئت دوروب دئقّتله قیزا باخیردی کی، بئلسئن آیا رب اونون یولونو راست گتئرئب یا یوخ.
22دوه‌لر سو ائچئب قورتاراندا او آدام بئر قیزیل بورون حالقاسی کی، چکئده بئر بِکا#24:22 تقرئبن ۶ گرم اولوردو، قیزین قوللاری اوچون ده ائکی قولباق کی، چکئده اون شِکِل#24:22 تقرئبن ۱۱۵ گرم اولوردو، گؤتوروب ددی: 23«لوطفن منه دِه گؤروم، سن کئمئن قیزی‌سان؟ آیا آتانین اِوئنده بئزه گجه‌نی قالماق اوچون یِر تاپیلار؟» 24قیز اونا ددی: «من مئلکانین ناخورا دوغدوغو بِتوعِلئن قیزی‌یام.» 25گئنه ددی: «بئزده سامان دا، یِم ده چوخدور و قالماق اوچون یِر ده وار.» 26او آدام اَیئلئب ربّه سجده اتدی. 27سونرا ددی: «آغام ائبراهئمئن تاریسی رب موبارک اولسون کی، محبّت و وفاسینی آغامدان قییمادی: رب منی بئرباش آغامین قارداشینین اِوئنه گتئردی.»
28قیز قاچیب، آناسینین طایفاسیندا بو باره‌ده دانیشدی. 29رئبقانین بئر قارداشی وار ائدی، آدی لابان ائدی. لابان چیخیب او آدامین یانینا، بولاغین باشینا قاچدی. 30او، باجیسینین بورون حالقاسینی و قوللارینداکی قولباغی گؤرنده، باجیسی رئبقانین «بو آدام منئمله بله دانیشدی» سؤزلرئنی اشئدنده او آدامین یانینا گلدی. او، بولاق باشیندا دوه‌لرئن یانیندا دایانمیشدی. 31لابان ددی: «ای ربّئن برکت وردئیی آدام، ائچه‌ری گئر. نه اوچون اشئکده دورورسان؟ من سنه اِوی و دوه‌لره یِر حاضیرلامیشام.» 32او آدام اِوه گئردی. لابان دوه‌لرئن یوکونو بوشالتدی، اونلارا سامان و یِم وردی، و سو گتئردی کی، او و اونونلا بئرلئکده اولانلار آیاقلارینی یوسونلار. 33اونلارین قاباغینا یِمک گتئرئلدی، لاکئن بو آدام ددی: «مقصدئمی دانیشمایینجا یمیه‌جیم.» لابان ددی: «دانیش.»
34او ددی: «من ائبراهئمئن نؤکرئیم. 35رب آغاما چوخلو برکت ورئب، اِله کی، وارلی بئر آدام اولوب. اونا سورولر و رَمه‌لر، قیزیل و گوموش، نؤکرلر و کنئزلر، دوه‌لر و اششکلر ورئب. 36آغامین آروادی سارا قوجا ائکن آغاما بئر اوغول دوغدو. آغام اؤزونه مخصوص اولان هر شیی بو اوغولا وردی. 37سونرا دا منی آند ائچدئرئب ددی: ”اؤلکه‌لرئنده یاشادیغیم کَنَعانلی‌لارین قیزلاریندان اوغلوما آرواد آلمایاجاقسان، 38لاکئن آتامین طایفاسینا، قوحوملاریمین یانینا گدئب، اورادان اوغلوما بئر آرواد آلاجاقسان.“ 39من آغاما ددئم: ”بلکه او آرواد منئمله گلمه‌دی.“ 40او منه ددی: ”یولونو گتدئیئم رب سنئنله اؤز مَله‌یئنی گؤند‌ره‌جک، او دا سنه یول آچاجاق و قوحوملاریمین آراسیندان، آتامین طایفاسیندان اوغلوما بئر آرواد آلاجاقسان. 41طایفامین یانینا گتدئیئن زامان، منه ائچدئیئن آنددان آزاد اولاجاقسان. اگر او قیزی سنه ورمسه‌لر، ائچدئیئن آنددان آزاد اولاجاقسان.“
42من ده بو گون بولاغین یانینا گلئب ددئم: ”ای آغام ائبراهئمئن تاریسی رب، یالواریرام، گتدئیئم یولو آچ. 43باخ، ائندی من بولاغین یانیندا دورورام؛ او قیز کی، سو چکمه‌یه گلئر و من اونا دیئرم: خاهئش ادئرم، منه سهنگئندن بئر آز سو ور، ائچئم، 44او دا منه دیئر: سن ده ائچ، دوه‌لرئنه ده سو چکئم، قوی او قیز آغامین اوغلو اوچون ربّئن تعیئن اتدئیی آرواد اولسون.“ 45من اوره‌یئمده دوعا اتمه‌یی قورتارمامیشدیم کی، رئبقا سهنگی چئینئنده گلدی و بولاغا اِنئب سو چکدی. اونا ددئم: ”خاهئش ادئرم، منه سو ور.“ 46او تز سهنگئنی چئینئندن اِندئرئب ددی: ”سن ائچ، گدئم دوه‌لرئنه ده سو ورئم.“ من ائچدئم، او دا دوه‌لره سو وردی. 47اوندان سوروشدوم: ”سن کئمئن قیزی‌سان؟“ او ددی: ”مئلکانین ناخورا دوغدوغو بِتوعِلئن قیزی‌یام.“ من ده اونون بورنونا حالقا، قوللارینا دا قولباق تاخدیم. 48سونرا اَیئلئب ربّه سجده اتدئم. ربّه، آغام ائبراهئمئن تاریسینا شوکور اتدئم کی، آغامین قارداشی نوه‌سئنی اوغلونا آلماق اوچون منه دوغرو یولو گؤرستدی. 49اگر منئم آغاما محبّت و صداقتله رفتار اده‌جکسئنئز، ائندی منه دیئن. اگر اتمیه‌جکسئنئز ده، منه دیئن. اِله کی، من ده نه یولا گده‌جیئمی بئلئم.»
50لابان و بِتوعِل اونا بله جاواب وردئلر: «بو ائش ربدن اولدو؛ سنه نه یاخشی، نه ده پئس سؤز دئیه بئله‌رئک. 51باخ، رئبقا حوضوروندادیر: اونو گؤتور گت و قوی او، ربّئن ددئیی کئمی آغانین اوغلونا آرواد اولسون.» 52ائبراهئمئن نؤکری اونلارین سؤزلرئنی اشئدنده یِره قاپانیب ربّه پرستئش اتدی. 53نؤکر قیزیل-گوموش شیلر و پالتارلار چیخاردیب رئبقایا وردی. اونون قارداشینا و آناسینا دا قئیمتلی شیلر وردی. 54اؤزو و اونونلا بئرلئکده اولان آداملار ییئب-ائچدئلر و گجه‌نی سحر اتدئلر. سحر اونلار قالخاندا نؤکر ددی: «منی آغامین یانینا گؤندَ‌رئن.» 55قیزین قارداشی ائله آناسی ددئلر: «قوی قیز بئر نچه گون، هچ اولماسا اون گون قالسین، سونرا گدر.» 56نؤکر اونلارا ددی: «ائندی کی، رب منه یول آچدی، منی یوباتمایین، بوراخین آغامین یانینا گدئم.» 57اونلار ددئلر: «قوی قیزی چاغیریب اؤز دئلئندن اشئدک.» 58رئبقانی چاغیریب اوندان سوروشدولار: «آیا بو آداملا گدئرسن؟» او دا «گدئرم» ددی. 59اونلار باجیلاری رئبقانی، اونون دایه‌سئنی، ائبراهئمئن نؤکرئنی و اونونلا اولان آداملاری یولا سالدیلار. 60رئبقایا برکت ورئب ددئلر:
«ای باجیمیز،
مئنلرجه، اون مئنلرجه اؤولادا آنا اولاسان!
قوی نسلئن عاصئلرئن یوردونا صاحئب اولسون!»
61رئبقا و قوللوقچولاری قالخیب دوه‌لره مئندئلر و او آداملا بئرلئکده گتدئلر. بله‌جه، نؤکر رئبقانی گؤتوروب گتدی.
62بو واخت ائسحاق بئرلَخایی رویئدن گلمئشدی، چونکی او، نِگِب تورپاغیندا یاشاییردی. 63آخشام دوشَنده ائسحاق گزمک اوچون چؤللویه گتدی. باشینی قالدیریب باخاندا گؤردو کی، دوه‌لر گلئر. 64رئبقا دا باشینی قالدیریب ائسحاقی گؤرنده دوه‌دن دوشدو. 65او، نؤکردن سوروشدو: «بو آدام کئمدئر کی، بئزئم پئشوازیمیز اوچون چؤللویه گلئر؟» نؤکر ددی: «آغامدیر.» رئبقا روبندئنی اوزونه چکئب اؤرتوندو.
66نؤکر باش ورمئش بوتون ائشلر باره‌ده ائسحاقا دانیشدی. 67ائسحاق رئبقانی آناسی سارانین یاشادیغی چادیرا آپاردی و رئبقانی آرواد آلدی و ائسحاق اونو سِودی. بله‌جه ائسحاق آناسینین اؤلوموندن سونرا تسلّی تاپدی.
Currently Selected:
یارادیلیش 24: موقدس کتاب
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Elam Ministries 2013. All rights reserved.