یارادیلیش 20
20
ائبراهئم و اَبئمِلِک
1ائبراهئم مَمرِه‌دن نِگِب تورپاغینا کؤچدو و قِدِشله شور آراسیندا ساکئن اولدو. سونرا بئر مودّت گِراردا قالدی. 2ائبراهئم آروادی سارا باره‌سئنده ددی: «بو منئم باجیمدیر.» گِرار پادشاهی اَبئمِلِک آدام گؤندَ‌رئب سارانی آپاردی. 3لاکئن گجه یوخودا تاری اَبئمِلِکه گؤرونوب ددی: «باخ، آپاردیغین آروادا گؤره، سن اؤله‌جکسن، چونکی او، اِولی بئر آرواددیر.» 4اَبئمِلِک آروادا توخونمامیشدی. او ددی: «یارب، مگر سن گوناهسیز خالقی اؤلدوره‌جکسن؟ 5مگر او آدام منه دمه‌دی کی ”بو منئم باجیمدیر“؟ آرواد اؤزو ده ددی کی ”او منئم قارداشیمدیر.“ من بونو قوصورسوز اورَک و اَللرله اتدئم.» 6تاری یوخودا اونا ددی: «من ده بئلئرم کی، سن بونو قوصورسوز اورَکله اتدئن. من ده سنی قویمادیم کی، منئم ضئدّئمه گوناه اده‌سن؛ بونا گؤره ده قویمادیم کی، اونا توخوناسان. 7ائندی آروادی اَرئنه قایتار، چونکی او، بئر پیغمبردئر. سنئن اوچون دوعا ادر، سالامات قالارسان. آمّا اگر آروادی قایتارمایاسان، بئل کی، هم سن، هم ده سنئن اولان هرکس قطعن اؤله‌جک.»
8اَبئمِلِک سحر تزدن قالخیب، بوتون نؤکرلرئنی چاغیردی و بو سؤزلری اونلارین حوضوروندا ددی. آداملار چوخ قورخدولار. 9اَبئمِلِک ائبراهئمی چاغیریب اونا ددی: «بئزه نه اتدئن؟ سنه نه گوناه اتدئم کی، اؤزومون و پادشاهلیغیمین اوستونه بله بئر بؤیوک گوناهی گتئردئن؟ منه اتدئیئن ائش گرک ادئلمَیدی.» 10اَبئمِلِک گئنه ائبراهئمه ددی: «بو ائشی گؤرَ‌نده نه دوشونوردون؟» 11ائبراهئم ددی: «دوشونوردوم کی، بورادا تاری قورخوسو یوخدور و آروادیما گؤره منی اؤلدوره‌جکلر. 12او، دوغرودان دا، منئم باجیمدیر: آتامیز بئردئر، آمّا آنامیز آیریدیر. او، منئم آروادیم اولدو. 13تاری منی آتا اِوئمدن قوربَته آپاردیغی واخت، آروادیما ددئم: منه محبّتئنی بو جور گؤرسده‌جکسن؛ گده‌جیئمئز هر یرده منئم باره‌مده ده: بو منئم قارداشیمدیر.»
14او واخت اَبئمِلِک سورو، مال-حیوان، نؤکرلر و کنئزلر گؤتوروب ائبراهئمه وردی. آروادی سارانی دا اونا قایتاردی. 15اَبئمِلِک ددی: «باخ، منئم اؤلکَم سنئن قاباغیندادیر: ائسته‌دئیئن یرده یاشایا بئلرسن.» 16سونرا سارایا ددی: «باخ، قارداشینا مئن پارچا گوموش وردئم. بو گوموش سنئن یانینداکی‌لارا گوناهسیزلیغینی گؤرسه‌دن بئر ثوبوت اولسون و هر کس سنئن گوناهسیز اولدوغونو بئله‌جک.» 17ائبراهئم تارییا دوعا اتدی، تاری دا اَبئمِلِکه، اونون آروادینا و کنئزلرئنه شفا وردی، اِله کی، اونلارین اوشاقلاری اولدو. 18چونکی رب ائبراهئمئن آروادی سارادان اؤتری، اَبئمِلِکئن اِوئنده اولان بوتون آروادلارین بطنئنی باغلامیشدی.
Currently Selected:
یارادیلیش 20: موقدس کتاب
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Elam Ministries 2013. All rights reserved.