ከ{{ምዕራፍ}} ታዋቂ የመጽሐፍ ቅዱስ ጥቅሶች

ያጋሩ

ಅನಬದಲ್, ತುಮೆ ಪಹಿಲೆ ದೇವ್ನು ರಾಜ್ಯನಖ್ಹಾಜೆ ಅಜು಼ ಇನಿ ನೀತಿನ ಖ್ಹಾಜೇಬಿ ತರ್ಖ್ಹೊ. ತದೆ ಅನಜೋ಼ಡೆ ಯೋ ಖ್ಹಾರೂಸ್ ಮಳ್‌ಶೆ.

ಇನಖ್ಹಾಜೇಸ್, ಕಾಲ್ನಿ ಬಾರೇಮ ಫಿಕರ್ ನಕೊ ಕರೊ; ಕಾಲ್‌ನೊ ದನ್ ಇನಿ ಬಾರೇಮ ಯೋಸ್ ಫಿಕರ್ ಕರಿಲಿಶೆ. ಯೋ ದನ್ನಿ ಖ್ಹತಾಪ್ಣಿ ಯೋ ದನ್‌ಮಾಸ್ ಬಶ್‌.

ಇನಖ್ಹಾಜೇಸ್ ಮೇ ತುಮೂನ ಬೋಲುಸ್ಕಿ, ಜಿವಾನಖ್ಹಾಜೆ ಶಾತ್‌ ಖಾಣು ಅಜು಼ ಪೀಣು ಕರಿ ಬೋಲಾನಿ ಬಾರೇಮರ‍್ಹವೊ, ನತರ್‌ಕಿ ಶರೀರ್‌ನ ಹೋಣುತೆ ಲುಂಗ್ಡಾವ್‍ನಿ ಬಾರೇಮರ‍್ಹವೊ ವೇಚ಼್‌ಣೆ ನಕೊ ಕರೊ. ಖಾಣಥೀಬಿ ಜಾನ್‌, ಅಜು಼ ಲುಂಗ್ಡಾವ್‍ಥೀಬಿ ಶರೀರ್ ಮಹಾನ್ ಕಾಹೆಕಿ ಶು?

ಕತೋಬಿ ತೂ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತಾರ ಮಹಿನಕೋಣಾಮ ಜೈ಼ನ್, ಬಾಕಲ್‌ ಲಗಾಡಿನ್, ದಿಲ್ಮ ಛಾ಼ತೆ ತಾರ ಬಾನ ಪ್ರಾರ್ಥನೆ ಕರ್‌. ತದೆ ದಿಲ್ಮ ಚಾ಼ಲಾಸ್ತೆ ಇನ ದೇಖವಾಳೊ ತಾರೊ ಬಾ, ತುನ ಇನಾಮ್ ದಿಶೆ.

ಇನಖ್ಹಾಜೇಸ್, ತುಮೆ ಸೊರ್ಗಾನ ಬಾನ ಅಮ್ ಪ್ರಾರ್ಥನೆ ಕರ‍್ನು: ಸೊರ್ಗಾಮ ಛಾ಼ತೆ ಮಾರೊ ಬಾ: ತಾರು ನಾಮ್ ಪರಿಶುದ್‌ಕರಿ ಗಣ್ತಿ ಹುವಾದೆ. ತಾರಿ ರಾಜ್ಯ ಆವಾದೆ; ತಾರಿ ಮರ್ಜಿ ಸೊರ್ಗಾಮ ಚಾ಼ಲಾಸ್ತೆ ಇಮ್ಮಸ್, ಧರ್ತಿಪರ್‌ಬಿ ಚಾ಼ಲಾದೆ.

ಹಮ್ಕೆ ಹಮೂನ ದನ್‌ಪರೋಜ಼್‌ನು ಖಾಣು ದೇ.

ಹಮಾರ ವಿರೋದ್ ಗಲತ್‌ ಕರಾವಾಳನ, ಹಮೆ ಮಾಪ್‌ ಕರೇಸ್ತೆ ಇಮ್ಮಸ್, ಹಮಾರಿ ಗಲ್ತಿನ ತೂ ಮಾಪ್‌ಕರ್‌.

ಹಮೂನ ಶೋದನೆಮ ನಕೊನಾಕ್‌, ಕತೋಬಿ ಶೈತಾನ್‌ಥಿ ಹಮೂನ ಛೋ಼ಡಾವ್.’

ತುಮೆ ಅದ್ಮಿಖ್ಹಾರನಿ ಗಲತ್‌ನ ಮಾಪ್‌ ಕರ‍್ಯಾತೊ, ಪರಲೋಕ್‍ಮ ಛಾ಼ತೆ ತುಮಾರೊ ಬಾಬಿ ಜಿನು ತುಮಾರಿ ಗಲತ್‍ನಾಬಿ ಮಾಪ್‌ ಕರ್ಶೆ.

ಆಕಾಶ್‌ಪರ್ ಉಡಾಸ್ತೆ ಜಿನಾವರ್‌ನ ದೇಖೊ, ಯೋ ಪಿಕಾವಕೊಯ್ನಿ, ವ್ಹಾಡಕೊಯ್ನಿ, ಕಣ್ಗಿ ಭರಿನ್ ಮ್ಹೇಲಾಕೊಯ್ನಿ. ಇಮ್‌ ರ‍್ಹಯುತೋಬಿ, ಸೊರ್ಗಾಮ ಛಾ಼ತೆ ತುಮಾರೊ ಬಾ, ಯೋ ಖ್ಹಾರಾನ ಪಾಳಿನ್ ಪರ್ವೇಶ್ ಕರಾಸ್. ಇವ್ಣೆಥಿಬಿ ತುಮೆ ಕೆತ್ರೇಕ್ಕಿ ಊಚ಼ ಹುಯಿರ‍್ಹಾಸ್ನಿ?

“ಜಗತ್‌ಪರ್ ತುಮಾರಖ್ಹಾಜೆ ಧನ್‌ದೌಲತ್‌ನ ನಕೊ ಜ಼ಮಕರಿಲೇವೊ, ಹಜ್ಜಾ಼ ಇನ ಕಿಲಪ್‍ಧರೀನ್‌, ಕೋರ‍್ಹಖೈನ್‌, ನಾಶ್ ಹುಯಿಜಾ಼ಸ್ ಅಜು಼ ಚೋ಼ರ್ ಖ್ಹಾರು ಘರ್‌ನ ಫೋಡಿನ್, ಇನ ಚೋ಼ರಿ ಕರಿಲಿಶೆ. ಕತೋಬಿ ಸೊರ್ಗಾಮ ಶೊತ್‍ ಕರಿರಾಖೊ. ಹಿಜ್ಜಾ಼ ಯೋ ಕೋರ‍್ಹ ಖೈನ್‌, ಕಿಲಪ್‍ ಧರೀನ್ ಲುಕ್ಷಾನ್ ಕೋ ಹುವಾನಿ, ಅಜು಼ ಚೋ಼ರ್ ಖ್ಹಾರು ಘರ್‌ಫೋಡ್‍ಶೇಬಿ ಕೊಯ್ನಿ. ಚೋ಼ರೀಬಿ ಕರಾಕೊಯ್ನಿ. ಶನಕತೊ ತುಮಾರಿ ಶೊತ್‌ ಕಿಜ್ಜಾ಼ ರ‍್ಹೇಸ್ಕಿ, ಹಿಜ್ಜಾ಼ಸ್ ತುಮಾರೊ ದಿಲ್‌ಬಿ ರ‍್ಹೇಸ್‌.

“ಕೋಣ್‌ಬಿ ಬೇ ಯಜಮಾನ್ನ ಸೇವೆಕರಾನ ಕೊಹೊಯ್ನಿ. ಯೋ ಏಕ್‌ನ ವಹೇರ್‌ ಕರೀನ್, ಬಿಜೇಕ್‌ನ ಪ್ಯಾರ್ ಕರ್ಶೆ; ನತರ್ ಏಕ್‌ನ ಜೋ಼ಡೆ ಅಛ್ಛಿಂತ್ರ ರ‍್ಹೀನ್, ಬಿಜೇಕ್‌ನ ಫಿಕ್ಕರ್‌ಕೊಕರ್ಷೇನಿ. ತುಮೆ ದೇವ್‍ನಾಬಿ, ಪೈಶಾನಾಬಿ ಭೇನಾ ಏಕ್‌ದಮ್ ಸೇವೆ ಕರಾನ ಕೋಹುವ್ವಾನಿ.

ಅಲಾ, ದರ್ರಾಶಿ ವಿಶ್ವಾಸ್‌ವಾಳ, ಹಮ್ಕೆರ‍್ಹೀನ್‌ ಕಾಲ್‌ ಚು಼ಲ್ಹಾಮ ಬಳಿಜಾ಼ವಾನ ಜ಼ಂಗ್‌ಳಿ ಘಾಖ್ಹ್‌ನ ದೇವ್ ಅಮ್ ಪೇರ‍್ಹಾಯೋತೊ, ಅನೇಥಿಬಿ ಜಾ಼ಖ್ಹತ್ ತುಮೂನ ಹೋಡಾವ್‌ಶೆ, ಫೇರಾವ್‌ಶೆ ಕೊಯ್ನಿಕಿಶು?

ಕತೋಬಿ ತುಮೆ ಧರಮ್ ದ್ಯವಾನಿ ವಖ್ಹತ್‌ಮ, ತಾರೊ ಖಾವಹಾತೆ ದಿದೋತೆ ಧರಮ್, ತಾರೊ ಡಾವ ಹಾತ್‌ನಾಬಿ ನಾ ಮಾಲುಮ್‌ ಪಡ್‌ಣೂತೆ ಇಮ್‌ ದೇ. ಅಜು಼ ದಿಲ್ಮ ಚಾ಼ಲಾತೆ ಇನ ದೇಖವಾಳೊ ತಾರೊ ಬಾ, ತುನ ಇನಾಮ್ ದಿಶೆ.

ಅದ್ಮಿ ದೇಖಾದೆ ಕರಿ ತುಮೆ ಇವ್ಣ ಖ್ಹಾಮೆ ತುಮಾರು ಅಛ್ಛು಼ಕಾಮ್ನ ನಾ ಕರ‍್ನು. ಇಮ್‌ ಕರ‍್ಯಾತೊ, ಸೊರ್ಗಾಮ ಛಾ಼ತೆ ತುಮಾರ ಬಾಕನ ತುಮೂನ ಶಾತ್ಬಿ ಇನಾಮ್ ಕೋ ಮಳ್‌ಶೇನಿ.

“ತುಮೆ ಉಪವಾಸ್ ಕರಾನಿ ವಖ್ಹತ್‌ಮ, ಖೋಟ್ ದಿಲ್‌ವಾಳನಿಘೋಣಿ ಮ್ಹೋಡು ನಾ ಮುರ್‌ಝೈ಼ಲೇಣು. ಇವ್ಣೆ ಉಪವಾಸ್ ಛಾ಼ ಕರಿ ಅದ್ಮಿಯೇನ ವತಾಳಿಲೆವಾನಖ್ಹಾಜೆ ಇವ್ಣು ಮ್ಹೋಡಾನ ಇಮ್‌ ಕರಿಲೇಸ್, ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಇವ್ಣುನ ಮಳ್‌ಣುತೆ ಇನಾಮ್ ತದೇಸ್‌ ಮಳಿಗಯು. ಕತೋಬಿ ತೂ ಉಪವಾಸ್ ಕರಾನಿ ವಖ್ಹತ್‌ಮ, ಮುಡ್‌ಕ್ಯಾನ ತೇಲ್ ಲಗಾಡಿಲೀನ್‌, ಮ್ಹೋಡು ಧೊಯಿಲೆ. ಅಮ್ ಕರ‍್ಯೋತೊ, ತೂ ಉಪವಾಸ್ ಛಾ಼ ಕರಿ ಅದ್ಮಿಯೇನ ಮಾಲುಮ್‌ ಕೋ ಪಡ್‌ಶೇನಿ, ಕತೋಬಿ ದಿಲ್ಮ ರ‍್ಹವಾಳ ತಾರ ಬಾನ ಯೋ ಮಾಲುಮ್‌ಪಡ್‍ಶೆ. ದಿಲ್ಮ ಚಾ಼ಲಸ್ತೆ ಇನ ದೇಖವಾಳೊ ತಾರೊ ಬಾ, ತುನ ಇನಾಮ್ ದಿಶೆ.