ከ{{ምዕራፍ}} ታዋቂ የመጽሐፍ ቅዱስ ጥቅሶች

ያጋሩ

Judá ayllullapitam imaypis mandakuq reykuna kayanqa. Manam pipis rey kanqanta qechuyanqatsu. Tsaynö kanqa llapanpaq poderyuq rey chämunqanyaqmi. Tsay reytam maytsay nación runakunapis cäsuyanqa.

<<Josépita miraqkunam yaku kuchunchö wiñämuq jachanö kayanqa. Paykunam atska wayuq jachanö kayanqa. Jachapa räman perqa jananpa päsaqnöraqmi kayanqa. Paykunatam alläpa chikir flëchankunawan atacayanqa. Tsaynöllam imaypis rabyatsiyanqa.

Tsaynö kaptinpis Josépita miraqkunapam rikrankuna alläpa kallpasapa kayanqa. Flëchananpaq flëchankunatapis chachakmi aptaräyanqa. Tsaynö kallpasapa kayanqa poderösu Dios Yaya yanapaptinmi. Paymi Israel runakunata imayka mitsiqnö poderninwan imaykapitapis tsapan. Creyikunqä Dios Yaya yanapaykulläshuy. Llapanpaq poderyuq Dios Yaya ciëlupita kay patsaman bendicionninta churaykallämutsun. Patsa rurinpitapis yakuta pashtaykatsillämutsun. Wamraykikuna y wätaykikuna atska kananpaq bendicionninta churaykallämutsun.

<<Judá, qampita miraqkunatam llapan Israel majinkuna kuyayanqa. Chikiqninkunatam poderninchö katsiyanqa. Llapan Israel majinkunapis respitarmi puntanman qonqurpakuyanqa. Hïju, mallwa león wätata achkuqnömi kanki. Wätata achkunanpaq patsaman pelataykur tsinkaraq leonnömi kanki. Tsaynö mantsaypaq kaykaptikiqa ¿piraq wajupäshunkiman?

Rubén, qammi mayor tsurï kanki. Jövinllaraq kaykaptïmi qam yurirqayki. Llapan wawqikikunam respitayäshurqayki. Paykunapita mas poderyuqmi karqayki. Mayu alläpa jeqaptin pipis tsapayta mana puëdinqannömi qamtapis jutsata rurayta munaptiki ni pï tsapayta puëdishunkitsu. Concubïna warmïwan puñurmi alläpa penqakuyman churamashkanki. Tsaymi mayor kaq derëchuykita perdishkanki.