Bagri

फेर पवितर आत्मा यीसू नै बन उजाड़ में लेगी कै सैतान बिंगी परख कर सकै। अर यीसू गो चाळीस दिन अर रात गो बरत राखेड़ो जद बिनै भोत तकड़ी भूख लागी। जद परखण आळो बिंगै कनै आयो अर केयो, “जे तूं परमेसर गो बेटो है तो आं पथरां नै के रोटी बणज्यै।” यीसू केयो, “आदमी रोटी ऊं जींवंतो कोनी रेवै, पण परमेसर गै मूं ऊं निकळेड़ै बचन ऊं जींवंतो रेवै।”
फेर सैतान बिनै यरुसलेम गै पवितर नगर में ले जा'गे मिन्दर गै गुमट पर खड़यो कर'गे केयो। “जे तूं परमेसर गो बेटो है तो नीचै छाळ मारज्या।” क्यूंकै पवितर सासतर में इंया लिखेड़ो है,
“बो तनै संभाळण खातर सुरगदूतां नै घालैगो
कै तेरै पगां गै पथर गी नां लागै
अर बे तनै हातो हात चक लेवैगा।”
यीसू उतर दियो कै, “पवितर सासतर में इंया बी लिखेड़ो है कै तूं आपगै प्रभु परमेसर गी परख ना करी।” फेर सैतान बिनै ऊंचै प्हाड पर ले जा'गे सारो संसार दिखायो कै देख कितो सुणो अर मोटो है। जे तूं मेरै आ'गै झुकगे मनै प्रणाम करै तो ओ सारो संसार तनै दे देऊंगा। यीसू बोल्यो, “सैतान दूर होज्या मेरूं।” पवितर सासतर केवै, “तूं आपगै प्रभु परमेसर गी सेवा अर आराधना कर।” ओ सुणगे सैतान बठूं उड़ग्यो अर सुरगदूत आगे बिंगी देखभाळ करण लागग्या।


यीसू नै जद ठा लागग्यो कै यूहना पकड़िजग्यो तो पाछो गलील परदेस आ'ग्यो। अर बो नासरत छोडगे कफरनहूम में आ'ग्यो। झिको झील गै किनारै जबलून अर नपताली गै देस में है। ओ इंया होयो कै परमेसर गी बात बताण आळै यसयाह गै द्वारा केयेड़ो बो बचन पूरो करयो।
“जबुलून अर नपताली गै देस,
झील गै रा ऊं यरदन नदी गै पार,
गेर यहुदियां गै देस गलील में।
झिका लोग अंधेरै में रेंवता हा
बां एक म्हान जोती देखी।
अर मोत होण आळी जिग्यां में रेण आळा लोगां पर
चानणो होयो।”
बिं टेम ई यीसू मसी परचार करणो सुरू करयो कै मन बदळो क्यूंकै सुरग गो राज नेडै़ ई है।


जद यीसू गलील झील कनूं जाण लागरयो तो बो दो भाईयां समौन झिको पतरस कुहावै अर बिंगै भाई अंद्रियास नै झील में जाळ फेंकता देख्यो। बे मछली पकड़ण आळा हा। यीसू बानै केयो, “मेरै लारै आओ। मैं थानै आदमियां नै किंया भोळा करणा है मैं थानै सिखाऊंगा।” बे हातो हात जाळ छोडगे बिंगै लारै चाल पड़या। फेर बो आ'गै चाल पड़यो अर बण देख्यो कै जबदी गो बेटो याकूब अर बिंगो भाई यूहना आपगै पिता सागै जाळ ठीक करै हा। यीसू बानै बी हेलो मारयो अर बे बिं टेम ई आपगी किस्ती अर आपगै पिता नै छोडगे बिंगै लारै चाल पड़या।


यीसू सारै गलील परदेस गै सतसंग घरां में सुब समाचार गो परचार करतो अर बीमार लोगां नै ठीक करतो फिरतो हो। अर सारै सीरिया परदेस में बिंगी बडाई होण लागगी अर लोग सारै बीमार लोगां नै झिका हरेक तरियां गी बीमारी ऊं अर ओपरी आत्मा ऊं दुखी हा अर लकवै गै मारेड़ा अर दोरां गा मरीज हा बानै बिंगै कनै ल्याण लागग्या अर यीसू बानै ठीक कर देवंतो हो। ईंखातर गलील अर दिकापोलिया, यरुसलेम अर यहुदिया अर यरदन नदी गै पार ऊं लोगां गी मोटी भीड़ बिंगै लारै होगी।

ያዳምጡ मत्ती 4