 If you would like a copy of this version please contact info@davaraudiobibles.org

Text: Noiri New Testament, CC-BY-SA-4.0, The Love Fellowship. Audio: Noiri New Testament, CC-BY-SA-4.0, Davar Partners International, The Love Fellowship, 2023

Noiri New Testament

Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.

तेहलाम येशु तियाआ विषयामे हमेशा प्रार्थना कोईली अने खचू कायना ओ दृष्टांतमे कोयू. कोडु होमला नगरामेहे न्यायधीश रोत ओतु, तो परमेश्वरोओ बित ने ओतू अने कोडलाज माहांआ पोरोधीही कोईत ने ओतू. तिया नगरामेहे एक रोंडाली रोत ओती, जी तियाआ जागे आवीत-आवीत कोयु ओती, माआ न्याय सुकाडीत माहु माआ कर्जदाराप रोत वासाडा. किबी वेल पर्यंत तो ते मान्यु नाहा परंतु आखरी मोनामे विचार कोईत कोयु, जर आय परमेश्वरोओ बित नाहा, अने माहांआ फिकीर न कोअता; तेबी ए रोंडाली माहु त्रास आपित रोनारे, याआ याकोअता आयतीई न्याय कोअही, केधी एहलो न ओवो का घडी-घडी आवीत माहु त्रास आपे. प्रभूऊ कोयु, होमला ओ अधर्मी न्याय कोअनारा नाहाकोत कोत्लू? याआ याकोअता नाहाकोत परमेश्वर आपाआ निवाडीत मेकल्या न्याय तो कोअनारू नाहा काहा, जो रातदीही तिया गुगदा कोअता? नाहाकोत तो आपाआ विषया माय वेल लागाडे? आय तुमामे कोत्लू, तो लागेज तिया न्याय कोआ तेबी पण माअहा पोऱ्या धोरती उपो आवे तेहलाम तियाहा धोरतीपो विश्वास रोही नाहाकोत.

तिये तियाआ त्यापोरोत जे तियापो विश्वास मेकीत ओते, का आमाहा धोर्मी होय अने दिहराहा तुच्छ मानीत ओते, ओच दृष्टांतमे कोयू. बेन मांहु मंदिरोम प्रार्थना कोइला कोअता गोये; एक परुसी अने दिहरू जाकात लेणारू. परुसी उबुरोत तियाआ मोनामे प्रार्थना कोहू लाग्यू, ओ परमेश्वर आयताआ धन्यवाद कोअत्लू का आय याआ महांआ सारखु ठोगनारू जारकर्म कोअनारो, अने व्यभिचारी नाहा अने नाहा जकात बाअनो सारखु होय. आय हाप्तामरोत बेनवा उपास मेकोहो आय आपाआ कोमायाई दहावू भाग पण आपोहो. परंतु जकात लेणारू सेठुज उबुरोत होर्गो जागे पाल्हू इच्छा ला नाहा ताहा आपाआ छाती ठोकीत-ठोकीत कोयु, ओ परमेश्वरा मा पापी पों दया कों. आय तुमामे कोत्लू का, तो दिहरू मांहु परंतु तोज मांहु धोर्मी ठेरविल्या जात आपाआ कोआ गोल्यो; काहाके का जो कोडु आपाआ माह वोडू बोनाविही, तो हानू कोअल्यो जाय; अने जो आपाआ माह हानू बोनाविही तियाहा वोडो कोल्यु जाय.


फासाडी मांहे आपाआ पोऱ्याहा पण तियाआ जागे लेतआवुहु लागाडीत काहाके तो तियापो आथे मेकीही; परंतु शिष्यांनी पालीत तियाहा धमकाव्यो. येशु पोऱ्याहा जागे हादीत कोयु, “पोऱ्याहा माआ जागे आवी आपा, अने तियाहा नाहा कोहू नाहा; काहाके परमेश्वरोओ राज्य तियाआ हारको त्याच होय. आय तुमामे खोरो कोत्लू का जो कोडु देवोओ राज्य पोर्याआ एकहरको ग्रहण कोअनारू नाहा तो तीयाम केधीज प्रवेश कोहू सेकेहे नाहा.”


कोडु होमला अधिकारावाही तियाहा फ़ुस्ल्याआ, “ओ उत्तम गुरु, सार्वकालिक जिवनाआ अधिकारी उविला याकोअता आय नाहाकोत कोहू?” येशु लेतजा तियाहा कोयु, “तू माहु उत्तम काहा कोत्लू? कोडूच उत्तम नाहा फक्त एक, अर्थात परमेश्वर. तू आज्ञाहा जाआत्लू व्यभिचार नाहा कोईओलो, हत्या कोहू नाहा, अने चोरी कोइलाआ नाहा, झुटी साक्ष आपुहू नाहा, आपाआ बाह्हू अने आपाआ याह्हीई चा आदर कोअला.” तिये कोयु, “आयताहा आव आखाआ जुवान पणापोरोत पालीत आवयू होय.” ओ येशु लेतजा तियाहा कोयु, “तांआम ओमे पण एक गोठी ची कोम होय आपाआ आखे किबी वेसेत गोरब्योहो आपित टाक; अने ताहु होर्गाम धन जोडीत, अने आव साल माआ फासाडी आव.” ओ होमलित तो खुप उदास ओवयू, काहाके तो जाखो श्रीमंत ओतु. येशु तियाहा पालहु कोयु “पोस्यावालो परमेश्वरोओ राज्य माय प्रवेश करन केतो कठीण होय. परमेश्वरोओ राज्याम धनवान याकोअता प्रवेश कोईलापेक्षा उटडाआ हुयीइ नाकामेरोत जाअलो सोपो होय.” आव वरून होमलिनारे कोयु, “ताहा फासाडी कोडाआ तारण ओवुहू शकतो?” तिये कोयु, “जे महांआ त्यापोरोत नाहा ओवुहू शकत, ते परमेश्वरा त्यापोरोत ओवुहू सेकोहो.” पेत्राई कोयु, “पाला आमाहा ताहा कोअबा सोडीत ताआ फासाडी आव्ये होय.” तिये तियाहा कोयु, “आय तुमामे खोरो कोत्लू का एहेलू कोडोनाहा जो परमेश्वरोओ राज्य याकोअता को नेते लाडी, नेते पाही, नेते याह्ही-वडील, नेते पोऱ्ये पोर्याहा सोडीत आप्लु होय.” अने आव टायमोमें खूप पटावाही जोडयेहे नाहा अने आवनाराआ जुगोम अनंत जीवोन.


फासाडी तो बाराजोहो आरी लेतजात तियाहा कोयु, “पाला, आमाहा यरुअशलेमाहा जात आहो, अने जेतेहे गोठी माअहा पोऱ्या कोअता भविष्यवक्ता त्यापोरत लेखाल्यो गोयी होय, ते आखे पुरो उवे होय. काहाके तो अन्यजाति आथोमेहे होपल्या जाइअलो, अने ते तियाआ चेष्टा कोआ अने त्यापोओ थुपे, काहाके अने तियाहा फटके माये, अने घात कोआ; अने तो तिसऱ्या तेदीही फासी जिवंत उवे.” पोन ते आव गोठी मायरोत कोड्लीस गोठी होमज्ये नाहा; अने ती गोठी तिये निकाईत मेकल्यीअने जे कोयु गोये ओते ते तियाआ लक्षाम आव्ये निमिले.


जाहा तो यरीहो जागे पुगीतगोयू, ताहा एक आन्दले वाटेए किनारावपो बोहित भिक मागित ओतु. ते गर्दीइ जात ओतल्या आवाज होमलित फुसुहूं लाग्यू, “सोण नाहाकोत उवनारा होय?” तिये तियाहा कोयु, “येशु नासरेथला जात होय.” तेहलाम तो आयडीत कोयु, “ओ येशु दाविदाआ पोऱ्ये, माआ उपो दया को” जे आगाडी-आगाडी जात ओते, ते तियाहा धमकाव्यो लागाडीत का ठावकू बोह; परंतु तो जास्तीज आअडू लाग्यू, “ओ दाविदाआ पोऱ्ये, दया को. तेहलाम येशु उबुरोत आज्ञा आप्यी का तियाहा माआ जागे लेतआव, अने तेहलाम तो जागे आवयू तेहलाम तिये तियाहा फ़ुस्ल्याआ, ताहु नाहाकोत जोवे का आयताआ याकोअता नाहाकोत कोहू?” तिये कोयु, “ओ प्रभू ओ को का आय पाल्हू गोयो.” येशु तियाहा कोयु, “पाल्हू लाग ताआ विश्वास ताहु हाजो कोल्यु होय.” तेहलाम लागेज तो पालुहु लाग्यू, अने परमेश्वरोओ गौरव कोईत तियाआ फासाडी निहित गोल्यो अने आखे माहु पालहु परमेश्वरोओ स्तुती कोअयी.

ያዳምጡ लूका 18