Kodaku

तहाँ एरुसलेम वरी गोटाचार फरीसिकू अवुर एहूदी नियम चेचेडकू ईसु थरे मेजकेन तेकू होंबोर तेडिया। “अमाःकू चेलाकू दादी पुरखाकू राः रीति रिवाज ची लगड मेने कू मनो यडा, हेंकू बेगर अंचा ते रोटी कू जोम यडा?” हेना वरी हेंकुय जबाब वडा, “अपे हो अपे राः रीति रिवाज राः चलते ते भगवान राः हुकूम ची लगड पे कटो गोत्ते तना? कहेकि भगवान, ‘अपन इंग आप राः सिमाम रखो,’ अवुर ‘जे इंगत चहे अपत राः इजेतिय उडुगूँ, हेंय ञेंड गोज गोत्तेय पे’ मेनतेय कहनी केडा। लेकिन अपे कहनियाँ, ‘इंञ अबा सहेता ओवा बा मेनते दोहोएन हेना, भगवान लगाडिंञ रकब गोत्तेडा’ मेनते, अगर कनय इंगत अपत थरेय कहनियू, दो हेंय इंगत अपत राः आदर इजेत करेक जरूरत कोवाआ मेनते पे चेडकुआ। नेन घयते अपे रीति रिवाज राः चलते ते भगवान राः हुकूम पे कटो गोत्ते तना। ए कपटिकू, एसायाह अपे राः बारे ते ठिकेय भविस्यवाड़ी केडा, ‘नेकू अहत कू तेदो इंञ कू आदर इजेतिञाँ, लेकिन नेकू राः मन इंञ वरी एटाः रे दोहोना। अवुर नेकू इंञ बे-मतलोब तेकू आराधनाञाँ, कहेकि मनवाँकू बनो केडा नियम भगवान राः नियम ने-ना हवे मेनते कू चेडकुआ।’”

तहाँ ईसु, होड़कू अनेज बँदेर रे राःकेड कुते हेंकू थरेय कहनी तेडा, “अँजोमे पे अवुर समझोः पे। जो-मेः हेनाते होड़कू मेने असुद्ध कुआ, लेकिन अहा वरी उडूगुआ, हेनाते असुद्ध कुआ।” तहाँ चेलाकू मेजकेन ते हेंय थरे कू कहनी तेडा, “अमाः टेबोः अँजोम केते फरीसिकू जीवित कुरे ठाँय मरेना, हेनम पपाड़ी तना किदो मेने?” हेना वरी ईसु जबाब तेडा, “सरग रेनिय अपुंञ बेगर रोहेः हेना गँछी, सींड़िय रचा गेआ। मेकू इकम गोडवा कुपे; मेकू अंद्हाकू रेनकू अंद्हा अघुवाकू हवे, अगर अंद्हा होड़ अनंदहा होरिय तिःवा रेदो, बना होड़ डोड्हा रेकींञ लोजो रूआ।”
नआँ अँजोम केते पतरस ईसु थरेय कहनी तेडा, “नआँ उदाहरड़ राः मतलोब मी समझो गोत्तेले।” हेना वरी ईसु कहनी तेडा, “अपे निहों मेनते मेने पे पपाड़ी तना किदो? अपे मेने पे समझोः तना किदो? जे-ना अहा रे सेनुआ, हे-ना लाज रे सेनुआ, अवुर कू बिर उडूंग गोत्तेआ? लेकिन जे-ना अहा वरी उडूगुआ, हे-ना मन वरी उडूगुआ, अवुर होड़ हे-ना असुद्ध गोत्तेया। कहेकि गंदा सोच, जनमरवा, परसतिरीगमन, लंद फँद, चोचोरा, झूठ मुठा गोवाही, अवुर निन्दा टेबोः मनन वरी उडूंगुआ। नेन होयाना होड़कू असुद्ध हेना दो, ती बेगर अंचा ते जोमुः हेना होड़कू मेने असुद्ध कुआ।”


ईसु हेना वरी उडूंग केनते, सूर अवुर सयदा राः छेतर हनतेय चलो एना। हेना राज वरी मियाँहोड़ कनानी जात रेनिय कोड़ीहोन उडूंग एना, अवुर किर्री केनतेय कहनियूँ, “ओ परभु, दाऊद खनदान रेनियू, इंञ थरेम दयाऊ! कोड़ी होपोनिंञ भूत अखीरिय सताप यडिया।” लेकिन ईसु हेंय कनर जबाब मेनेय एमगाडिया। तहाँ चेला कुतय हेंय थरे मेजकेन तेकू अरजी एना, “मेय राः टेबोः अँजोम केते बिदा गोत्तेय मी, कहेकि नेय अबू तयोम तेय किर्री मेजुः तना।” हेना वरी हेंय कहनी तेडा, “भगवान इंञ अडकेनकू भेंड़िकू इसराएलिकू थरे भरिय कुलकेडिञाँ, लेकिन अनजातकू थरे बेगारिय कुलेञाँ।” हेंडे रेहो हेंय मेजेनयू, अवुर ईसु थरे गो-ड़िय गिरो केनतेय कहनी तेडा, “ओ परभु, सहेतावंञ मी।” हेना वरी हेंय कहनी तेडा, “कोड़ा चोंडिजकू राः रोटी सबकेते कुतूकू ओवा बढ़ियाँ कोवाआ।” हेना वरी हेंय कहनी तेडा, “सही हवे परभु, लेकिन कुतूकू हो मुँवर तुकू राः टिबुल पेंदी रे लोजोर कोआ हेना सीथ कू जो-मा।” हेना वरी ईसु जबाब वडिया, “ए कोड़ीहोन, अमाः बिसवास बडे गिआ। जेयसे अम चहोः तना, हेनेन घयते अम लगड होयाऊ।” तहाँ हेंय कोड़ी होपोन हेनेन तोलोगिय चिकन यनु।


ईसु हेना जघा वरी गलील जिला राः समुन्धर अड़ी अड़ी तेय सेनेना, हेना वरी बुरू रेय रकब केनतेय दुड़ूब यनु। तहाँ भीड़ उपर भीड़ हेंय थरे कू मेजेना। अवुर हेंकू अकू सुदा लंगड़ाकू, अंद्हाकू, गूँगाकू, ठुठाकू, अवुर जे-निरीत रेनकू हेंय थरे कू अगतेड कुआ, अवुर हेंकू हेंय कटत बँदे रेकू इदी तेडकू दोहो एनु, अवुर ईसु हेंकुय चिकन तेडकुआ। गूँगाकू टेबोआ, लंगड़ा ठुठाकू चिकन जोमा, अवुर अंद्हाकू ञेंञेंल तना, हेना ञेंलते होड़कू अहचरज यनते इसरायिल रेनिय भगवान कू बडेय वडा।


ईसु चेला कुतय राःकेड तेय कहनी तेडा, “नेकू होड़कू इंञ सोग वकू तनाञूँ, कहेकि नेकू तीन दिन वरी इंञ सुदा कुआ, अवुर जो-मे लगड नेकू थरे कनर कोवाआ। बेगर खियो केकुते मेने कुल गिसन यडिञाँ, होर घियाः रे लँगा कोःते अलोकू तुरसूडुऊ।” हेना वरी चेलाकू हेंय थरे कू कहनी तेडा, “निमीन होड़कू खियो लगड नआँ सुनहर ओत रे कराआ रोटी बू ञाँमा?” हेना वरी ईसु हेंकुय होंबोर तेडा, “अपे थरे तीमिन रोटी इदाना?” हेना वरी हेंकू कहनी तेडा, “सात गोटंग, अवुर दमभर होडींञ हकुकू इदाना।” तहाँ होड़कू ओतेत रे दुड़ूब लगाडिय कहनी वडकू। अवुर हेना सात गोटंग रोटी अवुर हकु कुय सबतेडा, अवुर भगवान धन्यवाद वतेय टोविज तेडा, अवुर चेला कुतायिय ओवाडू, अवुर चेलाकू होड़कू कू परोस वडू। सींड़कू जोम केनतेकू बियानू, हेना वरी चेलाकू पेरेज पेरेज ते सात छनवाँ बंचो तना टुटकत कू रिमतेडा। जोजोमकू कोड़िकू अवुर चोंडिजकू छोड़ ते चार हजार कोड़ाकू दोहो एना। तहाँ हेंय होड़कू बिदा केते डोंगा रेय रकब एना, अवुर मगदन छेतर हनतेय चलो एना।

ያዳምጡ मत्ती 15