Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወመልአ መንፈስ ቅዱስ ላዕለ እግዚእ ኢየሱስ ወተመይጠ እምዮርዳኖስ ወወሰዶ መንፈስ ገዳመ። አርብዓ መዐልተ ወአርብዓ ሌሊተ ያሜክሮ ሰይጣን ወኢበልዐ ወኢሰትየ ምንተኒ በውእቶን መዋዕል ወተፈጺሞን እማንቱ መዋዕል ርኅበ። ወይቤሎ ሰይጣን እመሰ ወልደ እግዚአብሔር አንተ በል ዝንቱ እብን ይኩን ኅብስተ። ወአውሥአ እግዚእ ኢየሱስ ወይቤሎ ጽሑፍ ዘይብል «አኮ በኅብስት ክመ ዘየሐዩ ሰብእ አላ በኵሉ ቃል ዘይወፅእ እምአፉሁ ለእግዚአብሔር።» ወአዕረጎ ሰይጣን ውስተ ደብር ነዋኅ ወአርአዮ መንግሥታተ ኵሉ ዓለም ከመ ወኢምንትኒ። ወይቤሎ ሰይጣን ዘንተ ኵሎ ምኵናነ ለከ እሁበከ ወዘንተኒ ክብረ እስመ ሊተ ተውህበ ወለዘፈቀድኩ እሁቦ። ወእምከመ ሰገድከ ሊተ አንተ ቅድሜየ ለከ ይኩንከ ኵሉ። ወአውሥአ ወይቤሎ እግዚእ ኢየሱስ ሑር እምድኅሬየ ሰይጣን ጽሑፍ «ለእግዚአብሔር አምላክከ ትስግድ ወኪያሁ ባሕቲቶ ታምልክ።» ወወሰዶ ኢየሩሳሌም ወአቀሞ ዲበ ርእሰ ማዕዘንተ ቤተ መቅደስ ወይቤሎ እመሰ ወልደ እግዚአብሔር አንተ ረድ ለሊከ ታሕተ እምዝየ ወተወረው። እስመ ጽሑፍ «ከመ ለመላእክቲሁ ይኤዝዞሙ በእንቲኣከ ከመ ይዕቀቡከ በኵሉ ፍናዊከ። ወበእደዊሆሙ ያነሥኡከ ከመ ኢትትዐቀፍ በእብን እግረከ።» ወአውሥአ እግዚእ ኢየሱስ ወይቤሎ ተብህለ «ኢታመክሮ ለእግዚአብሔር አምላክከ።» ወፈጺሞ ሰይጣን አመክሮቶ በኵሉ ኀደጎ እስከ ጊዜሁ።

ወተመይጠ እግዚእ ኢየሱስ በኀይለ መንፈስ ቅዱስ ወሖረ ገሊላ ወተሰምዐ ነገሩ በኵሉ በሓውርት። ወይሜህሮሙ በኵሉ ምኵራባቲሆሙ ወያነክሩ ምህሮቶ ወይሴብሕዎ ኵሉ። ወሖረ ናዝሬተ ኀበ ተሐፅነ ወቦአ ምኵራበ በዕለተ ሰንበት በከመ ያለምድ ወተንሥአ ያንብብ። ወወሀብዎ መጽሐፈ ኢሳይያስ ነቢይ ወከሢቶ መጽሐፈ ረከበ መካነ ኀበ ጽሑፍ ዘይብል። «መንፈሰ እግዚአብሔር ላዕሌየ ዘበእንቲአሁ ቀብዐኒ እዜንዎሙ ለነዳያን ፈነወኒ ወእስብክ ሎሙ ግዕዛነ ለፂዉዋን ወአስተፍሥሖሙ ለኅዙናን ወይርአዩ ዕዉራን ወአንግፎሙ ለግፉዓን ወእፍትሖሙ ለሙቁሓን ወእፈውሶሙ ለቍሱላን። ወእስብክ ዐመተ እግዚአብሔር ኅሪተ»። ወከደነ መጽሐፈ ወመጠዎ ለላእክ ወነበረ ወአንሥኡ አዕይንቲሆሙ ኵሎሙ እለ ሀለዉ ውስተ ምኵራብ ወነጸርዎ። ወአኀዘ ይበሎሙ ዮም በጽሐ ቃለ ዝንቱ መጽሐፍ ወተሰልጠ ውስተ እዘኒክሙ። ወእለ ሰምዕዎ ኵሎሙ አንከሩ ሞገሰ ቃሉ ወሣእሣአ አፉሁ ወይቤሉ አኮኑ ዝንቱ ውእቱ ወልደ ዮሴፍ። ወይቤሎሙ ቦኑ ትብሉኒ ኵልክሙ ዛተ ምሳሌ ዐቃቤ ሥራይ ፈውስ ርእሰከ ኵሎ ዘሰማዕነ ዘገበርከ በቅፍርናሆም ግበር በዝየኒ በሀገርከ። ወይቤሎሙ አማን እብለክሙ ኢይከብር ነቢይ በሀገሩ። አማን እብለክሙ ብዙኃት መበለታት ሀለዋ በውስተ እስራኤል አመ መዋዕለ ኤልያስ ነቢይ አመ ተዐጽወ ሰማይ ሠለስተ ዓመተ ወስድስተ አውራኀ እስከ ኮነ ረኀብ ዐቢይ ውስተ ኵሉ ምድር። ወኢተፈነወ ኤልያስ ኀበ አሐቲ እምኔሆን ዘእንበለ ኀበ አሐቲ ብእሲት መበለት ዘሰራጵታ ዘሲዶና። ወብዙኃን እለ ለምጽ ሀለዉ በውስተ እስራኤል አመ መዋዕለ ኤልሳዕ ነቢይ ወኢነጽሐ አሐዱሂ እምኔሆሙ ዘእንበለ ንእማን ሶርያዊ። ወተምዑ ኵሎሙ እለ ሀለዉ በምኵራብ ሰሚዖሙ ዘንተ። ወተንሥኡ ሶቤሃ ወአውፅእዎ አፍኣ እምሀገር ወወሰድዎ ውስተ ሕፅነ ርእሰ ደብር ዘተነድቀት ላዕሌሁ ሀገሮሙ ከመ ያጽድፍዎ። ወውእቱሰ ኀለፈ እንተ ማእከሎሙ ወሖረ። ወወረደ ቅፍርናሆም ሀገረ ገሊላ ወመሀሮሙ በሰንበት። ወያነክሩ ምህሮቶ እስመ በትእዛዝ ውእቱ ቃሉ።

ወሀሎ ብእሲ በምኵራብ ዘጋኔን እኩይ ላዕሌሁ ወከልሐ በዐቢይ ቃል። ወይቤ ምንት ብየ ምስሌከ ኢየሱስ ናዝራዊ መጻእከኑ ታጥፍአነ አአምረከ መኑ አንተ ኦ ቅዱሱ ለእግዚአብሔር። ወገሠጾ እግዚእ ኢየሱስ ወይቤሎ ተፈፀም ወፃእ እምኔሁ ወነፅኆ ጋኔኑ ማእከለ ምኵራብ ወወፅአ እምኔሁ ወኢነከዮ ወኢምንተኒ። ወደንገፁ ኵሎሙ ወተናገሩ በበይናቲሆሙ ወይቤሉ ምንትኑ ዝ ነገር እስመ በትእዛዝ ወበኀይል ይኤዝዞሙ ለአጋንንት እኩያን ወይወፅኡ። ወወፅአ ወተሰምዐ ነገሩ በኵሉ በሓውርተ አድያም።

ወወፂኦ እምኵራብ ቦአ ቤተ ስምዖን ወሐማቱ ለስምዖን ተሐምም ዐቢየ ፈፀንተ ወነገርዎ በእንቲኣሃ። ወቆመ ኀቤሃ ወገሠጾ ለፈፀንታ ወኀደጋ ወተንሥአት ሶቤሃ ወተልእክቶሙ። ወሶበ የዐርብ ፀሓይ አምጽኡ ኀቤሁ ኵሎ ድዉያነ ወሕሙማነ እለ ቦሙ ደዌ ዘዘ ዚኣሁ ወለለ አሐዱ እምኔሆሙ አንበረ እዴሁ ዲቤሆሙ ወፈወሶሙ። ወብዙኃን አጋንንት ይወፅኡ ወይኬልሑ ወይብልዎ አንተ ውእቱ ክርስቶስ ወልደ እግዚአብሔር ወይጌሥጾሙ ወኢያበውሖሙ ይንብቡ እስመ የአምርዎ ከመ ውእቱ ክርስቶስ። ወጸቢሖ ወፅአ ወሖረ ውስተ ገዳም ወኀሠሥዎ ሕዝብ ወሖሩ ኀቤሁ ወአኀዝዎ ወአቀምዎ ከመ ኢይኅልፍ እምኔሆሙ። ወይቤሎሙ ለካልኣትኒ አህጉር ሀለወኒ እዜንዎን በእንተ መንግሥተ እግዚአብሔር እስመ እንበይነ ዝንቱ ተፈነውኩ። ወይሰብክ በምኵራባተ ገሊላ።

ያዳምጡ ወንጌል ዘሉቃስ 4