Text: &copy; 2015 Wycliffe Bible Translators, Inc. Audio: ℗ 2013 Hosanna

Tyap - 2015 Edition (NT) Drama

Tyap - 2015 Edition (NT) Non Drama

Mat a̱nia, Yesu si̱ bu nwuo kukwon a̱wak hu. A̱ si̱ wak a̱ byia̱k a̱gba̱ndang jok Ga̱lili wu. A̱ si̱ bwuok a̱ nat a̱keang nggu ka, Ka̱fanahum. Á̱ si̱ kin di á̱ghyang á̱niet ba̱ neet ma̱ng a̱yin, nkap nggu na ta̱luk, nang gu myian da̱ a̱kpang wa. Nang Yesu ndi nwuak fwuo mba hu a̱ni, a̱ si̱ nyia̱ ma̱ng a̱tyu nang nkap na ta̱luk a̱ni, “Nggwon nung, gbang a̱lyia̱! Á̱ chi a̱ka̱tuk nyia̱ ang wu.”
Huhwa a̱yaagwak tyiet doka Musa á̱ghyang si̱ nwuo lyi̱ri̱m á̱ghyang mba nyia̱, “Nyi fa̱k lihyat! A̱tyu wuni kyiak a̱pyia̱ nggu nang A̱gwaza wa a̱ni kee?”
A̱wot nang Yesu wa ka̱n dyen a̱di̱dam mba wu, a̱ si̱ lyip ba nyia̱, “Yihwa mbyia̱ nang nyi nyia̱ a̱ka̱tuk a̱di̱dam mi̱ fwuo nyin na? Zang huhwa yet a̱hyohyoot a̱ swak; á̱ tak kpa̱sai nyia̱, ‘Á̱ chi a̱ka̱tuk nyia̱ ang wu,’ ke á̱ nyia̱ ma̱ng a̱tyu a̱ta̱luk nkap wu, ‘Doot yong a nkat?’ N na tak nyin kpa̱sai nyi ka lyen nang nung, Nggwon A̱tyubishyi mbyia̱ tyok n chi a̱ka̱tuk nyia̱ mi̱ swanta hu.” Huhwa Yesu si̱ bwuak, a̱ si̱ nwuan a̱tyu nang nkap nggu na ta̱luk a̱ni, a̱ si̱ nyia̱ ma̱ng a̱nggu, “Doot, a kyiak a̱kpang ang wu, a nkat a̱mali!”
A̱tyu a̱wa si̱ kin ta̱ngam a̱ doot, a̱ si̱ kyiak a̱kpang nggu wu, a̱ si̱ nkat a̱mali! Nang á̱kpa á̱niet ka ndi a̱nia a̱ni, ba̱ si̱ fa̱k a̱wun. A̱wot ba̱ si̱ dyep A̱gwaza mat si̱sak nang gu nta̱m ma̱ng a̱yin a̱ byia̱ tangka̱i a̱gba̱ndang tyok huni a̱ni.


Nang Yesu nghwon Ka̱fanahum a̱ni, a̱ si̱ li a̱tyok a̱ghyang nang á̱ ngyei Matyu a̱ni, nang gu swan da̱ a̱vwuo saai kurum ga̱ndu, a̱ si̱ nyia̱ ma̱ng a̱nggu, “Khwi nung, a yet nggwon ta̱m nung!” A̱wot Matyu si̱ kin tat a̱ doot, a̱ si̱ khwi nggu.
Á̱ si̱ labeang bah, Matyu si̱ yorong Yesu ma̱ng mman ta̱m nggu na, ba̱ ya kyayak a̱gbang gu, mbeang á̱niet saai kurum ga̱ndu ma̱ a̱di̱di̱t ma̱ng á̱ghyang á̱niet nang á̱ kyiak ba̱ yet á̱niet a̱ka̱tuk nyia̱ a̱ni.
Nang A̱fa̱risawa ba ndi a̱nia a̱ni, ba̱ si̱ lyip mman ta̱m Yesu na nyia̱, “Yihwa mbyia̱ nang a̱tyu tyiet nyin wu ngya kyayak ma̱ng á̱niet saai kurum ga̱ndu mbeang á̱niet a̱ka̱tuk nyia̱?”
Nang Yesu nfa̱k a̱nia a̱ni, a̱ si̱ nyia̱ ma̱ng a̱mba, “Á̱niet ba̱ swan ka̱nka̱ra̱ng a̱ni chat a̱tyu kan bah, si̱ á̱niet nzwán bya.” A̱ si̱ bu nyia̱ ma̱ng a̱mba, “Nyi nat nyi zop kyang nang A̱lyiat A̱gwaza na fa a̱ni, ‘N chat nyi fwuong kunak á̱ghyang, ku lan nwuat nung za̱nang ji.’ Mat n bai n gyei á̱niet ba̱ kyiak á̱pyia̱ mba nyia̱ ba̱ yet á̱tsotswat á̱niet bya a̱ni bah. Da̱ a̱kwonu a̱kya, n bai n gyei á̱niet ba̱ lyen nang ba̱ ngyet á̱niet a̱ka̱tuk nyia̱ bya a̱ni, ba̱ ghwon a̱ka̱tuk nyia̱ mba wu ba̱ khwi A̱gwaza.”


Á̱ghyang á̱tuk mman ta̱m Yoona si̱ bai, á̱ ba̱ lyip Yesu nyia̱, “Nzi̱t ma̱ng A̱fa̱risawa ba, zi̱ ni̱ swan a̱fa a̱khwot di̱ naai A̱gwaza. A̱wot yihwa mbyia̱ nang mman ta̱m ang na nnwai nyia̱ a̱nia hu?”
Yesu si̱ nwuak ba shim nyia̱, “Á̱ na nyia̱ ni wa á̱kpa̱ndang a̱tyu nyia̱ nyeang fai ba̱ nswan ma̱ng byian fwuo di̱n jen nang a̱tyu nyia̱ nyeang wu ni̱ shya̱ ma̱ng a̱mbaa? Ku na tyia̱ bah! A̱wot jen na bai nang á̱ na nkyiak a̱tyu nyia̱ nyeang wu á̱ ghwon á̱kpa̱ndang ba. Jen a̱jaja nang ba̱ na nswan a̱fa a̱khwot ka.”

“Kang ma̱ng a̱nia, a̱nyan wa na kyiak tyiang a̱toot swai, gu ntwai a̱bwong a̱khwukhwop a̱toot? Ka̱ a̱yin nyia̱ a̱nia, tyiang a̱toot swai ji na kuut. A̱khwukhwop a̱toot wu na seap, a̱wot a̱bwong ka ka̱ mbeang a̱ swak si̱sak ji ka̱ nshi mi̱ jen swak a̱ni.
“Ma a̱nia wa, á̱ mbyia̱ a̱tyu a̱ ni̱ koot a̱ta̱bwai a̱fai ma̱ a̱ta̱bwai a̱lyen a̱ni bah, kalak a̱ta̱bwai a̱lyen na na̱ guup, ku na̱ tyia̱ za̱nzam, na̱ byian. Ku myim á̱ kyiai a̱ta̱bwai a̱fai ma̱ng a̱ta̱bwai a̱fai a̱ghyang nia.”


Nang Yesu nshya̱ da̱ lyiat na a̱ni, a̱kwak a̱son tutu a̱tung A̱yahudawa wu si̱ kin neet a̱ ba̱ ta̱bwak a̱zaghyi Yesu. A̱ si̱ nyia̱, “Nggwon a̱nap nung ka khwu ma̱ninika. A̱wot ka̱ a bai, a si̱ sak ka bwak, ka̱ na shyip ma̱ng swuan.”
Yesu ma̱ng mman ta̱m nggu na si̱ doot, ba̱ si̱ khwi ngguu. Di̱n jen a̱ja, a̱byii̱k a̱ghyang si̱ kin khwi Yesu lilyim, nang gu ka̱n nyia̱ a̱lyia̱ swak ma̱ a̱feang nang gu tyong a̱sok. A̱byii̱k wu si̱ byam a̱ta̱m a̱junjung a̱toot Yesu ka. Mat a̱byii̱k wu ku nwuak a̱chuchuk mi̱ fwuo nggu hu nyia̱, “Ku ma̱ a̱ta̱m a̱toot gu kya ma̱nyin ka nang n byiam, n na nchoot!”
Yesu si̱ bwuak, a̱ si̱ nwuan guu, a̱ si̱ nyia̱, “Nggwon nung, gbang a̱lyia̱! Nwuak fwuo ang hu choot ang.” Mi̱ di̱ yong a̱hwa, a̱byii̱k wu si̱ kin choot kiki.
Nang Yesu ntat a̱li a̱kwak a̱son A̱yahudawa ka a̱ni, a̱ si̱ li á̱kpa á̱niet tyia̱ ma̱ tai da̱ a̱nak, nang á̱ghyang á̱niet tyiap gugwa a̱nak. Yesu si̱ nyia̱ ma̱ng a̱mba, “A̱mgba̱m nyin, nyi ghwut nyi nat ta̱usa! Da̱ a̱vwuo nung, nggwon neam ka ka̱n khwu bah, ka̱ shya̱ mi̱ nda nia.” Nang ba̱ nghwut a̱ni, ba̱ si̱ nwuo mai ngguu mai lihyat.
A̱wot nang Yesu nti̱n á̱niet ba a̱ ghwut dyo mi̱ nyuo hu a̱ni, a̱ si̱ bwuok a̱ nwuo mi̱ nyuo hu, a̱ si̱ ta̱bat kwom nggwon neam hu di̱ mbwak. A̱wot ka̱ si̱ kin doot ma̱ng swuan! Nkhang a̱ri̱bi̱di nani si̱ kai a̱mgba̱m fam a̱byin a̱hwa.

Nang Yesu nghwon a̱li nggwon neam ka a̱ni, á̱niet a̱fi̱fan a̱feang si̱ khwi ngguu, á̱ yei mi̱ chet nyia̱, “Nwan nggwon Da̱wuda, fa̱k kunak nzi̱t!”
Nang gu nnwuo a̱mali ka gu nswan a̱ni, á̱niet a̱fi̱fan a̱bya si̱ nat, á̱ si̱ shya̱ nggu. Yesu si̱ lyip ba nyia̱, “Nyi nwuak chuchuk nyia̱ ka̱ n doot n tyia̱ nyin nwuan a̱vwuo a?”
Ba̱ si̱ nyia̱, “Ii, A̱tyoli, zi̱ nwuak a̱chuchuk!”
A̱jawa Yesu si̱ byiam tswá á̱ghyi mba ji, a̱ si̱ nyia̱, “Ma̱nang nyi nnwuak fwuo da̱ nung a̱ni, yok ku li a̱nia!” A̱wot tswá á̱ghyi mba ji si̱ khwuk! Ba̱ si̱ ta̱bat nwuan a̱vwuo! Yesu si̱ khwat ba a̱fufwuo nyia̱, “Nyi yok tak ma̱ng a̱yin kyang á̱ nyia̱ nyin ndyo a̱ni bah.” A̱mgba̱m ma̱ng a̱nia, ba̱ si̱ chong á̱ shei nkhang Yesu na, á̱ kai fam a̱byin a̱hwa.
Nang á̱niet a̱fi̱fan a̱bya nkat a̱ni, á̱ si̱ kin bai ma̱ng Yesu ma̱ma̱m, a̱ byia̱ a̱ka̱tuk ntswa a̱ni. Huhwa Yesu si̱ vwuong a̱ka̱tuk ntswa wu, a̱wot ma̱ma̱m wu si̱ nwuo lyiat. Á̱kpa á̱niet ka si̱ fa̱k a̱ga̱de. Ba̱ si̱ nyia̱, “Á̱ ka̱n nyia̱ tangka̱i a̱ri̱bi̱di huni mi̱ Isi̱rela bah!”
A̱wot A̱fa̱risawa ba si̱ nyia̱, “Ma̱ng chet a̱gwam á̱ka̱tuk ntswá hwa nang gu nkhai á̱ka̱tuk ntswá ba, ba̱ ghwut ma̱ á̱niet.”

Yesu si̱ nwuai a̱cha̱chet ma̱ng a̱chyuang a̱ka̱keang, a̱ tyiet ma̱ á̱tutu a̱tung A̱yahudawa ba. A̱ si̱ shei A̱sham Nkhang ka tazwa Tyok Tswazwa hu. A̱ si̱ choot kuzang tangka̱i nzwan ma̱ á̱niet ba̱ nyia̱ ma̱ng zwán a̱ni. A̱wot nang Yesu ndi susot á̱kpa á̱niet ji a̱ni, a̱ si̱ fa̱k kunak mba, mat ba̱ tyia̱ tai ma̱ng van. Ba̱ si̱ lyin a̱tyu beang, ma̱nang zón seap ji̱ sang a̱tyu chok a̱ni.
Yesu si̱ nyia̱ ma̱ng mman ta̱m nggu na, “Nta̱m chak yak na shi, a̱wot á̱niet chak yak ba shi á̱kpa bah. Mat a̱nia, nyi naai A̱gwaza a̱tyu a̱ byia̱ nta̱m chak yak na a̱ni, gu mbeang á̱niet nta̱m chak yak ba.”

ያዳምጡ Matyu 9