If you would like a copy of this version please contact info@davaraudiobibles.org.

Lambya First Bible © The Word for the World International. Lambya First Audio Bible ℗ 2025, Davar Partners International.

Lambya First Bible

Lambya - 2015 MWI (NT) Drama

The copyright is jointly and equally held by:
©️ The Bible Society of Malawi, 2014
©️ The Word for the World International, 2014

Bo u Yesu ennya ichilundilo icha bantu, akakwela pighamba nukwikala pasi. Abamanyili bache bakamuzyungulila nukwanda pakubamanyisya ukuti:


“Basayiwa abantu babo bazimenye ukuti bapina mubuzimu,
pakuti Ubumwene ubwa Kumwanya bwabo.
Basayiwa babo bakulila akabalilo aka,
pakuti u Chala akwiza pakubapumizya;
Basayiwa abantu babo bakwiyisya,
pakuti bakwiza pakupokela zizyo u Chala akabalayizya.
Basayiwa abantu babo bali nizala ni nyota iya bugholosu,
pakuti u Chala akwiza pakubikutizya.
Basayiwa abantu babo bali ni chisa na bamwabo,
pakuti u Chala akwiza pakubapelela bope ichisa.
Basayiwa babo bazelu mumoyo,
pakuti bakwiza pakumwennya u Chala.
Basayiwa abantu babo bakupela umutende,
pakuti bakwiza pakuba bana aba Chala.
Basayiwa babo bakuvwimiwa,
pachifukwa ichakuti bakubomba vivyo u Chala akulonda,
pakuti Ubumwene ubwa Kumwanya bwabo.
“Mwe basayiwa, nanti abantu bakubatuka, bakubavwima nukubatamantila ivintu vyosi ivibibi pachifukwa ichakuti mwe bakonki bane. Hobokagha nukusekela pakuti umuvwalo winyu mukulu nkani kumwanya. Umu momumo abalaghuzi babo bakabako kale bakavwimiliwanga.


“Amwe mwe mbeya pakasi pabantu aba muchisu ichapasi. Loli nanti imbeya yasupa, nkimba mungayipela bulibuli pakuba sona mbeya? Yite sona ni mbombo napo panandi, loli yikusumbiwa kuzi, po abantu bakuyikanyannya.
“Amwe mwe lukozyo ulwa bantu aba muchisu ichapasi. Akaya akakulu nkani kako kazengiwe pighamba katangavwama. Nayumo umuntu yuyo akukozya inyale nukuyikupikila ni sonta. Loli akuyibika pabuzelu, umwakuti yibalamilaye abantu bosi munyumba mula. Momumo namwe ulukozyo lwinyu lulamaye pabantu, ukuti bennyanje imbombo zyinyu inyiza nukumupala Utata winyu uwakumwanya.

“Mutakinong'onaye ukuti nizite pakumazya Indaghilo izya Mozesi nu bumanyisi ubwa balaghuzi. Awe, intizite pakumazya, loli pakuzikwanilisya. Naloli nkubabuzya ukuti bo kumwanya na pasi vitazimiye nakope akasimbo akanandi pamo akasonga akasimbo kepepo pa Ndaghilo, mupaka vyosi vinivi vikwanilisiwe. Umuntu wesi yuyo atakwivwila nakope akanandi aka malamulo ghanagha nukumanyisya abanji pakubomba bunubu, akwiza pakuba munandi mu Bumwene ubwa Kumwanya. Loli umuntu wesi yuyo akukonka Indaghilo zinizi nukumanyisya abanji pakubomba bunubu, akwiza pakuba we songo mu Bumwene ubwa Kumwanya. Po nkubabuzya ukuti mukwiza pakwinjila mu Bumwene ubwa Kumwanya, pene papo nanti mwe basubiliwa nkani ukuchila abamanyisi aba Ndaghilo naba Falisayi pakubomba zizyo u Chala akulonda.


“Mwivuye ukuti kale zikaneniwa ukuti, ‘Utakaghoghaye. Umuntu wesi yuyo akughogha akwiza pakulongiwa.’ Loli ilelo nkubabuzya ukuti umuntu wesi yuyo amukalaliye umukamu wache akwiza pakulongiwa. Sona umuntu wesi yuyo akumunena umukamu wache ukuti, ‘Ute ni mbombo,’ akwiza pakulongiwa na balongi. Sona umuntu wesi yuyo akumunena umukamu wache ukuti, ‘Wee mupunganu,’ wepe bulo akwiza pakusumbiwa pamoto uwamu Gehena. Po, nanti ukubika ichabupi chako kwa Chala pachighemo, panapo nanti wakumbuka ukuti umukamu wako ali ninongwa nawe, chizapo ukuti uchileke ichabupi chako pachighemo pala nukubuka umwalubilolubilo pakumanyana nu mukamu wako, po wizaye pakubika ichabupi chako chila kwa Chala.
“Nanti umuntu akusitaka, chizapo pakwivwana nawe umwalubilolubilo bo muli muzila. Pakuti nanti mutakwivwana, akwiza pakukubika munyobe izya balongi. Sona umulongi akwiza pakukubika munyobe izya musilikali, yuyo akwiza pakukwighalila mujele. Nkukubuzya ukuti ukwiza pakwikala mumo mupaka ulipile indalama iyabumalilo iya nongwa yako.

“Mwivuye ukuti kale zikaneniwa ukuti, ‘Utakalowaye.’ Loli ilelo nkubabuzya ukuti: Umuntu wesi yuyo akumwenelezya umukolo nukumunyonywa, alowa nawe kale mumoyo wache. Nanti ilyiso lyako ilyandilo likukupuvya, likolompolelyo nukulisumba! Chizapo pakutagha ichigaba chimo icha mubili wako ukuchila ukuti umubili wako ghosi ghusumbiwe mu Gehena. Po nanti inyobe yako indilo yikukupuvya, yidumule nukuyisumba. Chizapo pakutagha inyobe yako yoka ukuchila ukuti umubili wako ghosi ghusumbiwe mu Gehena.


“Zikaneniwa sona ukuti, ‘Umuntu wesi yuyo akumusosya umuchi, amupanje ukalata uwasoka.’ Loli ilelo nkubabuzya ukuti nanti umuntu akumusosya umuchi wache pabusita ichifukwa icha bulowe, kokuti akumupelela umukolo yula pakuba mulowe nanti akusendiwa sona. Umwanavuli yuyo akumusenda umukolo yuyo asokite, kokuti wepe akulowa.

“Mwivuye sona ukuti kale zikaneniwa ukuti, ‘Utakapotwe pakubomba chicho walayizya, loli bomba kwa Mwene chicho ufingite.’ Loli ilelo nkubabuzya ukuti utakalapilaye napo panandi bulo. Utakalapilaye pakutambula ukuti, ‘Kumwanya.’ Pakuti kumwanya cho chitengo icha Bumwene icha Chala. Utakalapaye ukuti, ‘Ichisu ichapasi.’ Pakuti po akutuzikizyapo inyayo zyache. Utakalapaye ukuti, ‘Akaya akakulu nkani aka Yelusalemu.’ Pakuti ko kaya akakulu nkani aka Mwene Umukulu. Utakalapilaye kusingo yako, pakuti utangandula nakope akasisi koka pakuba kaswepu pamo kafitu. Nena bulo ukuti, ‘Eee’ pamo ‘Awe’ amazyu ghosi ghagho ukonjelezya pa mazyu ghanagha kokuti ghakufuma kwa Satana, Umubibi yula.


“Mwivuye ukuti kale zikaneniwa ukuti, ‘Ilyiso lilipile ilyiso, sona ilyino lilipile ilyino.’ Loli ilelo nkubabuzya ukuti mutakamutanikizizyanje umuntu yuyo akubombela ububibi. Nanti umuntu yumo akukoma kulusaya ulwa ndilo, mupe ulwamwabo ukuti akukome sona. Nanti umuntu yumo akusitaka pamaso pa balongi ukuti akufyule ilaya lyako, muleke asende poka ni nkazo bulo. Nanti umusilikali akukufyenga ukuti wende nawe amamita 1,000, wende nawe amamita 2,000. Nanti umuntu akukulaba ichintu chimo, umupe, sona nanti yumo akulonda pakwazimya ichintu chimo, umwazime.


“Mwivuye ukuti kale zikaneniwa ukuti, ‘Umughane umupalamani wako nukumubenga umulwani wako.’ Loli ilelo nkubabuzya ukuti mubaghane abalwani binyu nukubiputila babo bakubavwima, ukuti mubanje mwe bana aba Tata winyu uwakumwanya. Pakuti akulamizya izuba pabantu abiza na babibi bulo nukutuma ivula pa bagholosu na babo bate bagholosu. Nanti mukubaghana abantu bene babo bakubaghana, nkimba mukukabapo ichoni? Abasonkezya sonko bope bakubomba bunubu. Po nanti ukulamuka abamanyani bako bene, nkimba vilekanite bulibuli na vivyo abantu abanji bakubomba? Bope abantu abakuzi bakubomba bunubu. Po mubanje bantu abiza muvintu vyosi ukuyana namumo Ughuso uwakumwanya abeleye!

ያዳምጡ Matayi 5