Iranian Azeri Bible

موسا قاییناتاسی مئدیانلی کاهئن یئترونون سوروسونو اوتاریردی. بئر دفه او، سورونو صحرانین او بئری طرفئنه آپاریب تارینین داغی خورِبه گلدی. ربّئن مله‌یی اونا بئر بوتادان قالخان آلوو ائچئندن گؤروندو؛ باخ! بوتا آلوولو، آمّا یانیب کول اولموردو. موسا ددی: «گرک ائندی یولدان دؤنوم و بو قرئب حادئثه‌یه بئر باخیم، گؤروم نه اوچون بو بوتا یانیب کول اولمور.» رب موسانین باخماغا یولدان دؤندویونو گؤرنده، تاری بوتانین اورتاسیندان اونو چاغیریب ددی: «موسا، موسا!» او دا ددی: «بویور.» تاری ددی: «بورایا یاخینلاشما. آیاقلاریندان چاریقلارینی چیخارت، چونکی دوردوغون یر موقدّس تورپاقدیر.» سونراسی دا ددی: «من آتانین تاریسی، ائبراهئمئن، ائسحاقین و یعقوبون تاریسی‌یام.» او واخت موسا اوزونو اؤرتدو، چونکی تارییا باخماقدان قورخوردو.
رب ددی: «حقئقتن، من مئصئرده اولان خالقیمین اذئیّتئنی گؤرموشم، نظارتچئلرئن الئندن چکدئکلری فریادلارینی دا اشئتمئشم، چونکی اونلارین عذابلاریندان خبرئم وار. بونا گؤره ده نازئل اولموشام کی، اونلاری مئصئرلی‌لرئن اَلئندن قورتاریب، او اؤلکه‌دن یاخشی و گِنئش بئر دئیارا، سود و بال آخان بئر یره گتئرئم؛ کَنَعانلی‌لارین، خئتلی‌لرئن، اِمورلولارین، پِرئزلی‌لرئن، خئولی‌لرئن و یِبوسلولارین اؤلکه‌سئنه. ائندی باخ، ائسرایئل اؤولادلارینین فریادی منه چاتیب، مئصئرلی‌لرئن اونلارا اتدئکلری ظولمو ده گؤرموشم. اونون اوچون ائندی گل. سنی فئرعونون یانینا گؤندَ‌ره‌جیم کی، خالقیم ائسرایئل اؤولادلارینی مئصئردن چیخارداسان.»
آمّا موسا تارییا ددی: «آخی من کئمَم کی، فئرعونون یانینا گِدَم، ائسرایئل اؤولادلارینی دا مئصئردن چیخاردام؟» تاری ددی: «آرخایین اول کی، من سنئنله اولاجاغام. منئم سنی گؤندَردئیئمه علامت بو اولاجاق: سن خالقی مئصئردن چیخارتدیقدا، بو داغدا تارییا عئبادت اده‌جکسن.» موسا تارییا ددی: «باخ، ائسرایئل اؤولادلارینین یانینا گدئرم و اونلارا دئیه‌جیم: منی سئزئن یانینیزا آتالارینیزین تاریسی گؤندَ‌رئب. او واخت مندن سوروشا بئلرلر: ”اونون آدی نه‌دئر؟“ او واخت نه دئیه‌جیم؟» تاری موسایا ددی: «من وارام کی، وارام.» گئنه ددی: «ائسرایئل اؤولادلارینا بله دئیرسن: ”وارام“ منی سئزئن یانینیزا گؤندَ‌رئب.» تاری داها علاوه اتدی: «ائسرایئل اؤولادلارینا بله دئیرسن: آتالارینیزین تاریسی، ائبراهئمئن، ائسحاقین و یعقوبون تاریسی رب منی سئزئن یانینیزا گؤندَ‌رئب. آدیم ابدی اولاراق بودور. قوی منی نسئلدن-نسئله بله خاطیرلاسینلار.
گت، ائسرایئل آغساقّاللارینی بئر یره ییغ و اونلارا بله دِه: آتالارینیزین تاریسی، ائبراهئمئن، ائسحاقین و یعقوبون تاریسی رب منه گؤرونوب ددی: ”حقئقتن سئزئن قیدئنئزده‌یَم و مئصئرده سئزه ادئلن هر شی نظرئمده‌دئر. بونا گؤره ددئم کی، سئزی مئصئرده چکدئیئنئز عذابدان قورتاریب، سود و بال آخان بئر اؤلکه‌یه یعنی کَنَعانلی‌لارین، خئتلی‌لرئن، اِمورلولارین، پِرئزلی‌لرئن، خئولی‌لرئن و یِبوسلولارین اؤلکه‌سئنه آپاراجاغام.“
اونلار سنئن سؤزونه قولاق آساجاقلار. سن ائسرایئل آغساقّاللاری ائله بئرلئکده مئصئر پادشاهینین یانینا گدئب دئیه‌جکسن: ”عئبرانئلرئن تاریسی رب بئزئمله گوروشوب. ائندی بئزه ائجازه ور کی، چؤلده اوچ‌گونلوک بئر سفره چیخاق و اورادا تاریمیز ربّه قوربان کسک.“ آمّا بئلئرم کی، مئصئر پادشاهی زور آلتیندا قالمادیقجا، سئزئن گتمه‌یئنئزه ائجازه ورمه‌یه‌جک. من ده اَلئمی اوزادیب اورادا هر جور مؤجوزه‌لر اده‌رک، مئصئری ووراجاغام؛ بوندان سونرا مئصئر پادشاهی سئزی آزاد بوراخاجاق. مئصئرلی‌لرئن گؤزونده بو خالق اوچون لوطف قازاندیراجاغام، اله کی، یولا دوشدویونوز زامان اَلی‌بوش گتمَیه‌سئنئز؛ هر آرواد اؤز قونشوسوندان یا دا اِوئنده یاشایان آرواددان قیزیل-گوموش شیلر و پالتارلار ائستیه‌جک. اونلاری اوغوللارینیز و قیزلارینیزا گیدئره‌جکسئنئز؛ بله‌جه مئصئرلی‌لری سویاجاقسینیز.»

ያዳምጡ چیخیش 3