Om 'n Maria-hart in 'n Marta-Wêreld te HêVoorbeeld

Wees Stil

Die intimiteit wat Maria saam met Jesus in die woonkamer geniet het, sal nooit uit die bedrywighede van Marta in die kombuis voortspruit nie. Bedrywigheid, op sigself, kweek afleiding. Lukas 10:38 wys vir ons 'n vrou met die gawe van gasvryheid. Marta het haar huis vir Jesus oopgemaak, maar dit beteken nie dat sy haar hart oopgemaak het nie. In haar gretigheid om Jesus te dien, het sy amper die geleentheid om Jesus te ken gemis. 

Lukas sê vir ons dat “Marta se aandag afgelei is deur die voorbereidings wat getref moes word.” Sleutelwoord: moes. In Marta se gedagtes sou niks minder as die heel beste voldoende wees nie. Sy moes tot die uiterste gaan vir Jesus. 

Ons kan in dieselfde prestasie strik vasgevang word, en voel asof ons ons liefde vir God moet bewys deur groot dinge vir Hom te doen. So jaag ons verby die intimiteit van die Woonkamer om in die Kombuis vir Hom besig te raak — om groot bedieninge en wonderlike projekte te implementeer, alles in 'n poging om die goeie nuus te versprei. Ons doen al ons werk in sy Naam. Ons noem Hom “Here, Here”. Maar sal Hy ons op die ou end ken? Sal ons Hom ken? 

Jy sien, die koninkryk van God, is 'n paradoks. Terwyl die wêreld prestasies toejuig, begeer God geselskap. Die wêreld skree, “Doen meer! Wees alles wat jy kan wees!” Ons Vader fluister egter: “Bedaar en erken dat Ek God is, hoog bo die nasies, hoog bo die aarde” (Psalm 46:11). 

E.M. Bounds skryf: “God se kennismaking word nie oorhaastig gemaak nie. Hy skenk nie sy gawes aan die ongeërgde of haastige aankomeling en besoeker nie. Om baie alleen met God te wees, is die geheim om Hom te ken en deur hom beïnvloed te word.” 

God soek nie soseer na werkers as wat Hy na seuns en dogters soek nie — 'n volk om sy lewe in te stort. 

Wanneer is ons geneig om in die prestasie strik vasgevang te word — met kerk, skool, ouerskap, werk? Op watter manier prys die wêreld jou prestasies op daardie areas? Hoe sal jou perspektief op jou prestasies verander as jy eers op God se begeerte vir jou geselskap konsentreer?