PSALMS 44:1-26
PSALMS 44:1-26 Bybel vir almal (ABA)
Vir die leier van die koor: Van die Korag-groep. 'n Lied. O God, ons het dit self gehoor, ons voorvaders het dit vir ons vertel. U het iets gedoen toe hulle gelewe het, lank gelede. U het self volke weggejaag en vir u volk 'n woonplek gegee. U het die ander volke laat swaarkry en U het dit goed laat gaan met u volk. Ja, hulle het die land gevat, maar nie omdat hulle goed oorlog kon maak nie, hulle het gewen, maar nie omdat hulle self sterk was nie. Nee, dit was Ú wat sterk was en wat by hulle was, omdat U lief was vir hulle. O God, dit is U wat my Koning is. Wanneer U dit sê, dan sal Jakob wen. As U by ons is, dan sal ons die mense oorwin wat teen ons is. As U ons stuur, dan sal ons die mense plat trap wat oorlog wil maak teen ons. Ja, ek weet, my pyl en boog of my swaard wen nie 'n oorlog vir my nie. Want U het ons gered van ons vyande, U het die mense wat vir ons haat, laat verloor. Ons het aangehou praat oor wat God gedoen het en ons sal u Naam altyd prys. Sela En toe stoot U ons weg en U verneder ons, U gaan nie saam wanneer ons oorlog gaan maak nie. U laat ons omdraai en wegvlug van die vyande, en die mense wat vir ons haat, vat ons goed. U laat ons sterf soos slagskape, U jaag ons na al die kante toe, na ander lande. U verkoop u volk vir niks, U wou nie baie geld vir hulle hê nie. U laat ons bure vir ons verneder, U laat die mense rondom ons vir ons lag en spot. U laat die ander volke ons name gebruik wanneer hulle slegte dinge oor mense wil sê, ja, hulle skud hulle koppe oor ons. Ek weet nie waar ek moet wegkruip nie, ek hou nie op om skaam te wees nie wanneer ek hoor hoe praat die mense wat spot en slegte dinge oor my sê, en wanneer ek die vyande en die mense sien wat my wil laat swaarkry. Dit alles het met ons gebeur. Maar ons het U nie vergeet nie en ons was nie vals teen u verbond nie. Ons was nie ongehoorsaam nie, ons het gelewe soos U gesê het. Maar U het ons woonplek stukkend geslaan, en U het dit 'n plek gemaak waar jakkalse woon, U het dit baie donker rondom ons gemaak. Ons het nie die Naam van ons God vergeet nie, ons het nie ons hande opgelig en tot 'n ander god gebid nie. As ons dit gedoen het, dan sou God dit geweet het, want Hy ken die geheime van ons hart. Ja, omdat ons aan U behoort, daarom hou mense aan om ons dood te maak. Hulle maak of ons slagskape is. Here, U moet iets doen, hoekom slaap U? U moet wakker word, U moenie vir ons weggooi vir altyd nie. Hoekom kyk U weg? Hoekom maak U of U nie weet dat ons swaarkry en dat mense ons verdruk nie? Ja, ons lê op die grond, ons kan nie opstaan nie.
PSALMS 44:1-26 Afrikaans 1933/1953 (AFR53)
VIR die musiekleier. Van die kinders van Korag. 'n Onderwysing. O God, met ons ore het ons dit gehoor, ons vaders het ons dit vertel: 'n werk het U gedoen in hulle dae, in die dae van die voortyd. U self het met u hand nasies verdrywe, maar húlle geplant; U het volke kwaad aangedoen, hulle daarenteen laat uitspruit. Want hulle het die land nie deur hul swaard in besit geneem nie, en hul arm het hulle nie die oorwinning gegee nie, maar u regterhand en u arm en die lig van u aangesig, omdat U 'n welbehae in hulle gehad het. U self is my Koning, o God! Gebied die oorwinninge van Jakob. Deur U sal ons ons teëstanders omstoot; in u Naam sal ons hulle vertrap wat teen ons opstaan. Want ek vertrou nie op my boog nie, en my swaard sal my die oorwinning nie gee nie; maar U het ons verlos van ons teëstanders en ons haters beskaamd gemaak. In God roem ons die hele dag, en u Naam sal ons loof tot in ewigheid. Sela. En tog het U ons verstoot en tot skande gemaak, en U trek nie saam met ons leërs uit nie. U laat ons agteruitwyk vir die teëstander, en ons haters plunder na hartelus. U gee ons oor soos slagvee, en U het ons onder die nasies verstrooi. U verkoop u volk vir niks en het nie baie verdien deur hulle koopprys nie. U maak ons 'n smaad vir ons bure, 'n spot en beskimping vir die wat rondom ons is. U maak ons 'n spreekwoord onder die nasies, 'n hoofskudding onder die volke. My skande is die hele dag voor my, en die skaamte van my aangesig oordek my; weens die stem van die smader en lasteraar, weens die blik van die vyand en wraakgierige. Dit alles het oor ons gekom, en tog het ons U nie vergeet en nie bedrieglik gehandel teen u verbond nie. Ons hart het nie agteruitgewyk nie, en ons gange het van u pad nie afgebuig nie, alhoewel U ons verbrysel het in 'n plek van jakkalse en ons met 'n doodskaduwee oordek. As ons die Naam van onse God vergeet het en ons hande uitgebrei het na 'n vreemde god — sou God dit nie naspeur nie? Want Hy ken die geheime van die hart. Maar om U ontwil word ons die hele dag gedood; ons word gereken as slagskape. Ontwaak! Waarom slaap U, Here? Word tog wakker! Verstoot nie vir ewig nie! Waarom verberg U u aangesig, vergeet U ons ellende en ons verdrukking? Want ons siel is in die stof neergebuig; ons buik kleef aan die aarde.
PSALMS 44:1-26 Afrikaans 1983 (AFR83)
Vir die koorleier. Van die Koragiete. 'n Gedig. Met ons eie ore het ons gehoor, o God, ons vaders het ons dit vertel, dat U in die ou dae, in die gryse verlede, 'n groot daad gedoen het. U het nasies met u eie hand verdryf, maar u volk 'n vaste woonplek gegee. U het nasies se mag verbreek om aan u volk vryheid te gee. Dit is nie met die swaard dat u volk die land in besit geneem het nie, nie deur hulle eie mag dat hulle die oorwinning behaal het nie, maar deur u krag, u mag en u teenwoordigheid, omdat U hulle liefgehad het. U is my koning, o God; gee tog aan Jakob se nageslag die oorwinning. Met u hulp sal ons ons teëstanders verslaan, in u Naam sal ons dié oorwin wat teen ons opstaan. Op my boog vertrou ek nie en my swaard sal my die oorwinning nie gee nie, want dit is U wat ons die oorwinning oor ons teëstanders gegee het en ons vyande die aftog laat blaas het. Ons het God die hele dag deur geprys en sy Naam altyddeur geloof. Sela Tog het U ons nou verstoot en ons in die skande laat kom. U trek nie meer saam met ons leërs uit nie. U laat ons vlug voor ons teëstanders; ons vyande plunder na hartelus; U lewer ons uit: ons is soos slagskape. U verstrooi ons onder die nasies; U gee u volk sommerso weg, vir niks; daar steek geen voordeel vir U in nie. U stel ons bloot aan die veragting van ons bure, aan die spot en beskimping van almal rondom ons. U maak ons tot 'n bespotting onder die nasies, 'n minagting onder die mense. Ek gaan dag vir dag gebuk onder die skande, en die smaad is op my gesig te lees, want ek hoor net die spottaal van die vyand en die godslastering van dié wat op wraak uit is. Al hierdie dinge het oor ons gekom, hoewel ons U nie vergeet het nie en aan u verbond nie ontrou was nie. Ons het nie afvallig geword nie en van u pad nie afgewyk nie. Tog het U ons verwoes; ons land het 'n puinhoop geword; U het die donker oor ons laat toesak. As ons die Naam van ons God nie aangeroep het nie en 'n vreemde god om hulp gevra het, sou God dit dan nie kon vasstel nie? Hy ken immers die geheime van die hart. Dit is oor U dat die dood ons gedurig tref, dat ons soos slagskape behandel word. Kom ons te hulp! Waarom slaap U, Here? Word tog wakker! Moet ons nie vir altyd verstoot nie! Waarom draai U u rug vir ons? Waarom steur U U nie aan ons ellende en smaad nie? Ons is tot in die stof verneder, ons is teen die grond.
PSALMS 44:1-26 Die Bybel 2020-vertaling (AFR20)
Vir die •musiekleier. Van die Koragiete. 'n Maskiel . O God, met ons eie ore het ons dit gehoor, ons voorouers het ons vertel van die dade wat U verrig het in hulle tyd, in die ou tyd: U, U het met u eie hand nasies verdryf, maar húlle het U geplant, U het volke geteister, maar húlle het U laat uitbrei. Ja, ons voorouers het nie met hulle swaard 'n land in besit geneem nie; hulle arm het nie aan hulle die oorwinning gegee nie, maar u regterhand en u arm en die lig van u teenwoordigheid, omdat U hulle goedgesind was. Ú is my koning, my God. Gebied dan die verlossing van Jakob! Met U deurboor ons ons teenstanders; in u Naam trap ons hulle plat wat teen ons opstaan. Want dit is nie my boog waarop ek vertrou nie, en dit is nie my swaard wat my verlos nie. Ja, U verlos ons van ons teenstanders, en U laat hulle wat ons haat, beskaamd staan. In God roem ons die hele dag lank, u Naam prys ons vir altyd. •Sela En tog het U ons verstoot en verneder; U trek nie meer saam met ons leërs uit nie. U laat ons terugdeins vir 'n teenstander, en ons haters plunder vir hulleself. U lewer ons uit soos slagvee; onder die nasies het U ons verstrooi. U verkoop u volk goedkoop; U maak geen wins uit die verkoopprys nie. U maak ons 'n bespotting vir ons bure, die spot en hoon van hulle rondom ons. U maak van ons 'n spotnaam onder die nasies, U laat die volke hulle koppe skud oor ons. Die hele dag lank verduur ek vernedering en is my gesig rooi van skaamte oor die luide uittarting en verguising, oor die teenwoordigheid van vyande en wraakgieriges. Dit alles het met ons gebeur, maar ons het U nie vergeet nie; ons het nie troubreuk gepleeg teen u verbond nie. Ons harte het nie teruggedeins nie, en ons treë het nie van u pad afgewyk nie. Maar U het ons verpletter deur van ons 'n plek te maak waar woestynjakkalse hou; U het ons met digte duisternis bedek. As ons die Naam van ons God vergeet het, ons hande na 'n vreemde god uitgestrek het, sou God dit nie ontdek nie? Hy is immers die Een wat hartsgeheime ken. Maar ter wille van U word ons die hele tyd vermoor, word ons as slagvee beskou. Word wakker! Waarom slaap U, my Heer? Staan op! Moet ons nie vir altyd verstoot nie. Waarom verberg U u gesig, vergeet U ons ellende en ons verdrukking? Want ons smelt weg in die stof, ons liggame kleef aan die grond.
PSALMS 44:1-26 Contemporary Afrikaans Bible 2023 (CAB23)
Ons het met ons ore gehoor, o God, ons vaders het ons vertel watter werk U in hulle dae gedoen het, in die ou tye. Hoe U die nasies met U hand verdryf en hulle geplant het; hoe U die volk verdruk en verdryf het. Want hulle het die land nie deur hulle eie swaard in besit geneem nie, en hulle eie arm het hulle nie gered nie, maar u regterhand en u arm en die lig van u aangesig, omdat U 'n guns in hulle gehad het. U is my Koning, o God: beveel verlossings vir Jakob. Deur u sal ons ons vyande verdruk; deur u Naam sal ons hulle vertrap wat teen ons opstaan. Want ek sal nie op my boog vertrou nie, en my swaard sal my nie red nie. Maar U het ons verlos van ons vyande en die wat ons haters beskaam. In God roem ons die hele dag en loof ons u Naam vir ewig. Sela. Maar U het ons verwerp en ons beskaam; en trek nie saam met ons leërs uit nie. U laat ons van die vyand afwyk, en die wat ons haat, buit vir hulleself. U het ons gegee soos skape wat vir vleis bestem is; en het ons onder die heidene verstrooi. U verkoop u volk verniet, en vermeerder nie u rykdom met hulle prys nie. U maak ons 'n smaad vir ons bure, 'n spot en 'n bespotting vir die wat rondom ons is. U maak ons 'n spot onder die nasies, 'n kopskudding onder die volke. My skande is altyddeur voor my, en die skande van my aangesig het my bedek, Want die stem van hom wat smaad en laster; ter wille van die vyand en wreker. Dit alles het oor ons gekom; nogtans het ons U nie vergeet nie, en in u verbond geen vals gehandel nie. Ons hart het nie teruggedraai nie, en ons voetstappe het nie van u weg afgewyk nie; Al het U ons in die plek van jakkalse verbreek en ons met doodskaduwee bedek. As ons die Naam van onse God vergeet het, of ons hande uitgesteek het na 'n vreemde god; Sal God dit nie ondersoek nie? want hy ken die geheime van die hart. Ja, om U ontwil word ons die hele dag doodgemaak; ons word as slagskape gereken. Word wakker, waarom slaap U, HERE? staan op, verwerp ons nie vir ewig nie. Waarom verberg U u aangesig en vergeet U ons ellende en ons verdrukking? Want ons siel is neergebuig in die stof, ons buik kleef aan die aarde. Staan op om ons te help, en verlos ons ter wille van U barmhartigheid.
PSALMS 44:1-26 Nuwe Lewende Vertaling (NLV)
Met ons eie ore het ons gehoor, o God, ons voorouers het ons vertel van alles wat U voorheen gedoen het in die dae lank gelede. U self het die heidense nasies uitgedryf deur u mag en die land aan ons voorouers gegee. U het hulle vyande vernietig, en ons voorouers vrygemaak. Hulle het nie die land met hulle swaarde verower, of die oorwinning deur eie krag behaal nie. Dit was deur u krag, deur u teenwoordigheid en u goedheid, omdat U hulle liefhet. U is my Koning en my God. U bepaal oorwinnings vir Jakob. Ons kan deur u krag ons vyande verslaan en ons aanvallers in u Naam vertrap. Ek steun nie op my boog of op my swaard om my te red nie. Want U gee die oorwinning oor ons vyande; U bring vernedering oor dié wat ons haat. O God, ons prys U die hele dag en loof u Naam voortdurend. Sela Maar nou het U ons weggestoot in skande. U trek nie saam met ons leërs na die geveg toe nie. U laat ons vlug voor ons vyande; dié wat ons haat, plunder na hartelus. U lewer ons uit soos slagskape; U het ons onder die nasies verstrooi. U volk het U verkoop vir niks en self het U nie daarby gebaat nie. U het ons ’n veragting gemaak by die bure, ’n bespotting en beskimping vir almal om ons. U het ons ’n spotnaam onder die nasies gemaak, almal skud maar net die kop daaroor. My skande is dag na dag voor my; oor my gesig is skaamte geskryf. Al wat ek hoor, is die lasteraar en die kwaadspreker. Al wat ek sien, is die vyand en die wreker. Dit het gebeur hoewel ons U nie vergeet het nie, en nie aan u verbond ontrou was nie. Ons het U nie verlaat nie, en nie van u paaie afgedwaal nie. Maar in die woestyn het U ons verpletter; donkerte en dood het U oor ons gebring. As ons opgehou het om ons God te dien of by vreemde gode hulp gaan vra het, sou God dit nie weet nie? Hy ken immers die geheime van die hart. Om u ontwil word ons elke dag doodgemaak, word ons behandel soos skape wat geslag moet word. Word wakker! Waarom slaap U, Here? Staan op! Moenie ons vir altyd verstoot nie! Hoekom kyk U anderpad? Hoekom kyk U verby ons ellende en verdrukking? Ons lê verneder in die stof, met die gesig in die grond.