EKSODUS 36:8-9
EKSODUS 36:8-9 Bybel vir almal (ABA)
Al die goeie ambagsmanne het die tempel-tent begin maak. Hulle het tien stukke materiaal geneem. Dit was goeie linne-materiaal en blou, pers en rooi wol-materiaal. Hulle het gerubs op die materiaal geborduur. Elke stuk materiaal was 28 el lank en vier el breed.
EKSODUS 36:8-9 Afrikaans 1933/1953 (AFR53)
SO het dan almal wat kunsvaardig was onder die werksmense die tabernakel uit tien tentdoeke vervaardig; uit fyn dubbeldraad-linne en pers en purperrooi en bloedrooi stowwe, met gérubs; as kunstige werk het hy dit gemaak. Die lengte van elke tentdoek was agt-en-twintig el en die breedte van elke tentdoek vier el. Al die tentdoeke het een maat gehad.
EKSODUS 36:8-9 Afrikaans 1983 (AFR83)
Die begaafde vakmanne het met die werk aan die tabernakel begin. Hulle het tien stukke materiaal van goed geweefde linne en blou, pers en bloedrooi wolstof gebruik en gerubs daarop uitgeborduur. Die lengte van elke stuk materiaal was veertien meter en die breedte twee meter, almal was presies ewe groot.
EKSODUS 36:8-9 Die Bybel 2020-vertaling (AFR20)
Al die vaardiges onder dié wat die werk gedoen het, het die •tabernakel met tien tentdoeke van fyn dubbeldraadlinne en pers, purperrooi en karmosynrooi wol gemaak, met gerubs daarop – met die kundigheid van 'n vakman. Die lengte van elke tentdoek was agt-en-twintig el en die breedte van elke tentdoek vier el. Al die tentdoeke het dieselfde afmetings gehad.
EKSODUS 36:8-9 Contemporary Afrikaans Bible 2023 (CAB23)
En elke wyse van hart onder die wat die werk van die tabernakel verrig het, het tien tentdoeke gemaak van fyn dubbeldraad-linne en pers en purperrooi en bloedrooi stowwe; met gérubs van listige werk het hy dit gemaak. Die lengte van een tentdoek was agt en twintig el, en die breedte van een tentdoek vier el; die tentdoeke was almal een grootte.
EKSODUS 36:8-9 Die Boodskap (DB)
Elkeen wat kon help, het saamgewerk. Hulle het die onderste laag van die dak uit tien stukke materiaal van fyn linne gemaak waarin blou, pers en bloedrooi draad ingeweef was en waarop figure met vlerke geborduur was. Elkeen van hierdie tien stukke was presies ewe groot. Elkeen was veertien meter lank en twee meter breed.
EKSODUS 36:8-9 Nuwe Lewende Vertaling (NLV)
Almal wat kon help, het met die werk aan die tabernakel begin. Hulle het eers die onderste laag uit tien stukke materiaal gemaak. Hulle het blou, pers en bloedrooi draad ingeweef en gerubs daarop uitgeborduur. Elkeen van die stukke materiaal was dieselfde grootte. Elkeen was veertien meter lank en twee meter breed.