EKSODUS 26:26-30
EKSODUS 26:26-30 Bybel vir almal (ABA)
Julle moet dwarspale maak van doringhout, vyf dwarspale vir die rame aan drie kante van die tempel-tent, aan die noordekant, die suidekant en die westekant. Die middelste dwarspaal tussen die rame moet lank wees, van een kant tot by die ander kant. Julle moet die rame oortrek met goud. Julle moet vir hulle goue ringe maak en julle moet die dwarspale deur die ringe steek. Julle moet die dwarspale ook oortrek met goud. Julle moet die tempel-tent maak presies soos Ek vir jou op die berg gewys het.
EKSODUS 26:26-30 Afrikaans 1933/1953 (AFR53)
Jy moet ook dwarshoute van akasiahout maak: vyf vir die style van die een sykant van die tabernakel en vyf dwarshoute vir die style van die ander sykant van die tabernakel; ook vyf dwarshoute vir die style van die agterkant van die tabernakel teen die weste. En die middelste dwarshout moet in die middel van die style oordwars loop, van die een ent na die ander. En jy moet die style met goud oortrek; en hulle ringe, as plekke vir die dwarshoute, moet jy van goud maak. Die dwarshoute moet jy ook met goud oortrek. So moet jy dan die tabernakel oprig volgens die plan wat jou op die berg getoon is.
EKSODUS 26:26-30 Afrikaans 1983 (AFR83)
“Jy moet dwarslatte van doringhout maak, vyf vir die rame van die een kant van die tabernakel en vyf vir dié van die ander kant, en ook nog vyf dwarslatte vir die agterkant, die westekant van die tabernakel. Die middelste dwarslat moet in die middel van die rame dwarsdeur loop van die een kant af tot by die ander kant. “Trek die rame met goud oor en maak vir hulle goue ringe om die dwarslatte deur te steek. Die dwarslatte moet ook met goud oorgetrek word. Jy moet die tabernakel oprig presies volgens die plan wat op die berg vir jou gewys is.
EKSODUS 26:26-30 Die Bybel 2020-vertaling (AFR20)
“Jy moet ook dwarshoute van doringhout maak, vyf rye vir die planke aan die een sykant van die tabernakel, en vyf rye dwarshoute vir die planke aan die ander sykant van die tabernakel, asook vyf rye dwarshoute vir die planke aan die agterkant van die tabernakel, aan die westekant. Die middelste ry dwarshoute moet in die middel van die planke wees; dit moet deurloop van die een kant na die ander kant. Die planke moet jy met goud oortrek, en die ringe van die planke, wat die dwarshoute dra, moet jy van goud maak. Jy moet die dwarshoute ook met goud oortrek. “ Jy moet dan die tabernakel oprig volgens die model wat vir jou op die berg gewys is.
EKSODUS 26:26-30 Contemporary Afrikaans Bible 2023 (CAB23)
En jy moet tralies van akasiahout maak; vyf vir die style van die een kant van die tabernakel, en vyf dwarshoute vir die style van die ander kant van die tabernakel, en vyf dwarshoute vir die style van die sykant van die tabernakel, aan die twee kante na die weste. En die middelste balk in die middel van die style moet van punt tot end strek. En jy moet die style met goud oortrek en hulle ringe van goue maak as plekke vir die dwarshoute; en jy moet die dwarshoute met goud oortrek. En jy moet die tabernakel oprig volgens die wyse waarop dit jou op die berg gewys is.
EKSODUS 26:26-30 Die Boodskap (DB)
“Jy moet ook dwarslatte van akasiahout maak wat die panele bymekaar kan hou. Daar moet vyf latte vir elke muur wees: vyf vir die twee lang kante en vyf vir die muur aan die endkant. Die middelste dwarslat moet op halfhoogte dwarsoor die panele van punt tot punt loop. Trek die panele met goud oor. Sit goue ringe aan hulle vas waardeur die dwarslatte gesteek kan word. Trek ook die dwarslatte met goud oor. Jy moet die tent maak sodat dit presies lyk soos Ek dit vir jou op die berg gewys het.”
EKSODUS 26:26-30 Nuwe Lewende Vertaling (NLV)
“Jy moet ook dwarsbalke van akasiahout maak om die panele aan mekaar vas te hou. Daar moet vyf balke vir die noordelike muur van die tabernakel wees. Vir die suidelike muur moet daar ook vyf balke wees. Net so moet daar vyf dwarsbalke vir die westelike muur wees. Die middelste dwarsbalk in die middel van die panele moet van een kant na die ander loop. Trek die panele met goud oor. Maak hake daaraan sodat die dwarsbalke daarin kan pas. Trek die dwarsbalke ook met goud oor. “Rig die tabernakel presies so op soos Ek vir jou op die berg gesê het.