GÉNESIS 20
20
Abraham jare Abimelec
1Abraham oë ojo joko güi ɨvɨ Neguev kotɨ, jare oyembojeyupa Cades jare Shur ipäu pe. Jare oiko ketɨgua rami Gerar pe. 2Abraham jei jembireko Sara kotɨ: ¡Chereindɨ ko!#Gn 12.13; 26.7. Jare Abimelec mburuvicha guasu Gerar pegua omondo güeruruka Sara; 3ërei ngatu Tumpa ou Abimelec pe ike pe pɨ̈tu yave, jare jei chupe: “Mase, remanota ko, kuña reruruka vae jeko pegua, echa omenda vae ko.”
4Ërei ngatu, Abimelec mbaetɨ yepe güɨroke, jare jei: “CheYa, ¿reyukata vi pa jekombae? 5Abraham etei ko jei cheve: ‘Chereindɨ ko’ jare kuña jei: ‘Chekɨvɨ ko.’ Chepɨa jupi reve ko kuae ayapo, mbaetɨ mbae ikavimbae ayapo.”
6Tumpa jei chupe ipaɨu pe: “Che aikuaa vi ndepɨa jupi reve kuae reyapo vae; che vi ko royopia agüɨye vaerä ndeyoa chekotɨ, jökorai mbaetɨ amaeño repoko jese. 7Jayave, emee ye kuña ime pe, echa jae ko ñeemombeúa, oyerureta nderé jare reikoveta. Ërei ngatu mbaetɨ yave remee ye, añetete remanota jare opaete neñemuña.”
8Jayave Abimelec opüa ndeimboveasɨ jare oenɨi opaete jembiokuai reta, omombeu opaete pe ipaɨu, jare kuimbae reta okɨɨye yae kuae oendu yave. 9Jaɨkue rupi Abimelec oenɨi Abraham jare jei chupe:
—¿Mbae pa reyapo oreve? ¿Oime pa mbae pe cheyoa ndekotɨ, reru vaerä cheré jare cheporookuaía re mbaeyoa tuichagüe yae? Mbaetɨta tëi reyapo vae reyu reyapo che ndive. 10Abimelec jei vi Abraham pe: ¿Mbae pa reyemongeta kuae reyapo vaerä?
11Abraham jei chupe:
—Jae cheyeupe: “Añetete kuae pe mbaetɨ Tumpa güi oipoɨu vae, cheyuka retata ko cherembireko re.” 12Añetete jae vi ko chereindɨ, cheru tayɨ, ërei mbaetɨ chesɨ imembɨ, jare amenda jae ndive. 13Tumpa cherenoe yave cheru jëta güi, che jae chupe: “Köraita rere chekotɨ tëta pe ñaväe ñavo: ‘Chekɨvɨ ko.’ ”
14Jayave Abimelec oipɨɨ vecha reta, jare guaka reta, tembiokuai kuimbae jare tembiokuai kuña, jare omee Abraham pe, jare omee ye chupe jembireko Sara. 15Jare Abimelec jei:
—Mase, ko oï ɨvɨ nderóvai; eiko pɨpe ikavi ndevea pe.
16Jei Sara pe:
—Mase, ko amee mil reare korepoti pegua ndekɨvɨ pe; kuae ko jae ndereepɨ vaerä opaete ndeɨvɨrigua omae ñogüɨnoi nderé vae reta güi, jare opaete pegua, jökorai mbaetɨta kia mbae jei ndekotɨ.
17Jayave Abraham oyerure Tumpa pe; jare Tumpa oipoano Abimelec jare jembireko, jare jembiokuai kuña reta, oime vaerä iñemuña reta. 18Echa Tumpa oyokenda opaete membɨrɨru Abimelec jo pegua güi, Sara jeko pegua.
Tans Gekies:
GÉNESIS 20: GUABD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia DC Guaraní Bolivia © Bolivian Bible Society, 2001.
