GÉNESIS 19
19
Sodoma jare Gomorra opa okañɨtei
1Kaaruasɨ ma yave araɨgua reta yogüɨraja oväe Sodoma pe; jare Lot oguapɨ oï tëta Sodoma jöke pe; jare Lot oecha yave opüa oövaiti vaerä, jare oyetavatɨka itindɨasɨ ɨvɨ re. 2Jare jei:
—Cheya reta, pomoñera peyu vaerä che perembiokuai jo pe pepɨta jare peyoe pepɨ peputuu; jare pɨareve pepüa ye peguata.
Ërei jae reta jei:
—Ani, ropɨtañota ikatu pe kuae pɨ̈tu.
3Ërei ngatu Lot jeta omoñera, jare yogüɨraja jupíe jare oike reta jo pe; jare oyapo chupe reta tembíu kavi, okaru reta vaerä, jare omboyɨ mbɨyape ovumbae, jare okaru reta.
4Ërei ndei kuimbae reta oyapakua mbove, tëta Sodoma pegua kuimbae reta oñova o, taɨrusuasɨ vae reta güive opaete ndechi reta. 5Jare oenɨi reta Lot, jare jei reta chupe:
—¿Jama pa jókuae kuimbae reta yogüeru kuae pɨ̈tu ndépɨri vae? Enoe oreve, orekɨ̈reɨ roikuaa.
6Jayave Lot oë omomiari reta vaerä oyokenda reve jöke. 7Jei chupe reta:
—Cherëtara reta, pomoñera agüɨye vaerä mbae ikavimbae peyapo. 8Mase, ko che anoi mókoi cherayɨ reta, mbaetɨ etei oasa kuimbae ndive vae reta; anoeta peve ikatu pe, javoi peyapo pe peipota vae chupe reta; jaeño kuae kuimbae reta pe agüɨye mbae peyapo, echa chemboupa reta ko.
9Jayave jae reta jei chupe:
—¡Esɨrɨ katu joko güi! Nde ketɨgua reyu reiko orepɨte pe. ¿Reñemopüa pa mburuvicha oporojäa vaerä? ¡Añave royapota ndeve ikavimbae yae vae!
Jare oporepeña reta Lot re, jare oasa reta omopë vaerä öke. 10Jayave jókuae mboupa reta omoë ipo jare omoinge reta Lot o japɨpe pe, jare oyokenda reta öke. 11Jare omboesaä kuimbae reta ikatu pe ñogüɨnoi vae, taɨrusuasɨ vae reta güive opaete ndechi reta. Jare ikuérai oeka reta tëi öke yogüɨreko. 12Jayave jókuae mboupa reta jei Lot pe:
—¿Oime ye pa renoi nerëtara kuae pe? Nderovaya jare nderaɨ reta, nderayɨ reta; opaete renoi kuae tëta guasu pe vae enoe kuae güi. 13Echa romokañɨteita kuae tëta, jeta yae ma ñeengeta kuae tëta regua yandeYa jóvai, jáeramo, yandeYa orembou romokañɨtei vaerä.
14Jayave Lot oë ojo imiari jovayarä vae reta pe, tayɨ reta ndive omendata vae, jei chupe reta:
—¡Pepüa jare peë kuae güi; echa cheYa omokañɨteita kuae tëta guasu!
Ërei ngatu jovayarä vae reta oyoyaiño, mbaetɨ güɨrovia, echa Lot jei jeiñoecha chupe reta. 15Jare köe jembipe ma yave araɨgua reta ombojaɨai ma Lot, jare jei reta chupe:
—¡Nderaɨai! Epüa eraja kuae güi nderembireko jare mókoi reve nderayɨ reta, kuae ndero pe ñogüɨnoi vae, agüɨye vaerä pemano kuae tëta okañɨtei yave.
16Jare Lot oë raiviä ramo, araɨgua reta oipɨɨ ipo pe, jare jembireko jare tayɨ reta vi yandeYa iporoparareko jese rupi; jökorai opa güɨnoe tëta güi ikatu pe.#2 P 2.7. 17Güɨnoe ma ikatu pe yave jei reta chupe:
—¡Etekuarai agüɨye vaerä remano! Agüɨye eyerova emae nderaɨkue kotɨ, jare agüɨye etei epɨta kuae ñuu rupi, etekuarai ɨvɨtɨ kotɨ agüɨye vaerä rekañɨtei.
18Ërei Lot jei chupe reta:
—¡Agüɨye, che pomoñera cheya reta! 19Mase, peyapo ma jeta ikavi vae cheve, pemee aikove vaerä; ërei che mbaetɨ chepuere atekuarai ɨvɨtɨ kotɨ, kañɨtei cherupitɨta jare amanota. 20Mase, ko tëta raɨ oï kuae güi köiño vae, jokotɨ atekuarai vaerä. ¡Pemaeño tatekuarai jokotɨ jare taroasayepe cherekove! ¿Kuae tëta michi yaeä pa?
21Jei chupe:
—Mase, ko aendu ndeve kuae reiporu vae, mbaetɨta amokañɨtei jókuae tëta nemiari jese vae. 22¡Nderaɨai jare etekuarai jokotɨ! Echa mbaetɨta mbae ayapo reo regua reväe joko pe.
Jáeramo tëta oyembojee, Zoar.#19.22 Zoar, oipota jei: Michi raɨ.
23Kuaraɨ oë mi ma yave, Lot ojo oväe tëta raɨ Zoar jee vae pe, 24jayave yandeYa omongɨ ara güi azufre tata ndive, tëta Sodoma jare Gomorra iárambo; 25jökorai opa omboai#Mt 10.15; 11.23-24; Lc 10.12; 17.29; 2 P 2.6; Jud 7. jókuae tëta reta jare opaete ɨvɨpe kavi ipo reta jare opaete mbaembae reta iagüe. 26Jayave Lot oyoaɨkue yogüɨraja jembireko#Lc 17.32. ndive; jare jembireko oyerova omae jaɨkue kotɨ; jókuae jeko pegua oyeapo yukɨrä.
27Ndeimbove yave Abraham oyeupi yandeYa ndive imiari yogüɨrekoa pe; 28jare omae Sodoma kotɨ jare Gomorra kotɨ, jare vi opaete ñuu kotɨ, jare oecha tätati opüa opaete jókuae ɨvɨ güi, horno güi tätati opüa rami. 29Jökorai Tumpa opa omboai opaete tëta reta ñuu rupigua, Lot oikose pɨpe vae; ërei Tumpa imaendúa Abraham re jeko pegua güɨroasayepe Lot kañɨtei güi.
Moab jare Amón iyɨpɨ
30Ërei Lot oë Zoar güi, echa okɨɨye opɨta vaerä joko pe, jare oyeupi ɨvɨtɨ re mókoi tayɨ reta ndive; jare yogüɨreko ɨvɨkua pe, jae jare mókoi reve tayɨ reta. 31Jayave tayɨ tenondegua jei taɨkuegua pe:
—Yanderu indechi ma, jare mbaetɨ kuimbae omenda vaerä yande ndive opaete ɨvɨ pegua reta jeko rami. 32Eyu yamongau yanderu osavaɨpo regua, jare yake jae ndive jökorai oime vaerä yanderu iñemuña.
33Jare omee reta tu jou vino jókuae pɨ̈tu, jare oike tayɨ tenondegua oke tu ndive; ërei Lot mbaetɨ oyandu kërai yave oyapakua jare opüa ye vae. 34Pɨareve pe, tenondegua vae jei taɨkuegua pe:
—Mase, che ake yanderu ndive pɨare; ñamee ye tou vino kuae pɨ̈tu, jare eike nde eke jae ndive, jökorai oime vaerä yanderu iñemuña.
35Jókuae pɨ̈tu omee reta tu jou vino, jare tayɨ taɨkuegua oke jae ndive; ërei Lot mbaetɨ yeño oyandu kërai yave oyapakua jare opüa ye vae. 36Jare Lot tayɨ reta mókoi reve ipurúa chupe. 37Jare tenondegua imembɨ oa kuimbae raɨ jare ombojee Moab, chugüi oñemuña Moab pegua reta añave rupi oime vae. 38Taɨkuegua imembɨ oa vi kuimbae raɨ, jare ombojee reta Ben-ammi, chugüi oñemuña Amón pegua reta añave rupi oime vae.
Tans Gekies:
GÉNESIS 19: GUABD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia DC Guaraní Bolivia © Bolivian Bible Society, 2001.
