Naṉ. 4
4
Kain Awirja̱i̱
1Nuyá̱ Ataṉka nuwe̱ja̱i̱ tsaniṉmia nui̱ nuwe̱sha ajaprukmiayi. Tura uchin iwia̱i̱ri̱n Káinian takusmiayi. Takus chichaak “Yus surusu asamtai uchi áishmaṉkan takusjai” tímiayi. 2Tura ukunam nuna patai̱n Awiran takusmiayi. Awirsha tsakar murikiun wáinniuyayi tura Kainkia ajan takauyayi.
3Tura ukunam Kainkia Uunt Yusan susataj tusa ni takatrí̱nian juukmia nuna jurukmiayi. 4Antsu Awirka ni murikrí̱ peṉkeri̱n nuérman Uunt Yusan susataj tusa jurukmiayi. Tura Yus nuna iis Awirnaka péṉker enentáimtusmiayi tura susamuri̱ncha “péṉkeraiti” tímiayi. 5Antsu Káinnaka péṉker enentáimtuschamiayi tura susamuri̱ncha “péṉkeraiti” tíchamiayi. Tuma asamtai Kainkia ti kajek nusháa iira ajasmiayi. 6Túrunamtai Uunt Yus chichareak “¿Urukamtai kajekmesha nusháa iirasha ajasum? 7Péṉker túraitkiumka paṉkái̱ íirsaintme. Túrasha péṉker túrachu asam anearta. Tunáa wárik nupettamkattsa wakerutmawai. Túrasha kakaram ajakmeka nupetkamniaitme” tímiayi.
8Nuna túrawar iniaṉkasar Kain ni yachí̱ Awiran chichareak “Iiji̱a̱i̱ ajanam wetái” tímiayi. Tura ajanam jeawar Kain ni yachi̱n Awiran mámiayi. 9Nuya̱ṉka Uunt Yus Káinian aníak “¿Ame yátsum Awirsha tui̱ pujá?” tímiayi. Tutai Kain aya̱k “Cha, nékatsjai. Antsu wíkiaitiaj winia yatsurun wáinniuna” tímiayi. 10Tutai Yus chicharuk “¿Urukamtai ausha áitkiam? Ame yatsumi numpe̱ uputúrumna nu nuṉkaya̱ untsurun paant anturkajai” tímiayi. 11“Yátsum maa asam yajauch pujutnum yumiṉkramuitme. Tura ame yatsumi numpe̱ puarmia nú nuṉkanmaya̱ṉka jí̱i̱kin akupeajme. 12Ame takatrumsha núkap takaamni̱ṉ arakrumka peṉké nerertamchattawai. Antsu ayamtsuk aya wekaikiní̱ ajáu átatme” tímiayi. 13Tutai Uunt Yusan Kain aya̱k “Túrutmena nu peṉké katsuntrachminiaiti. 14Yamái jú̱ nuṉkanmaya̱ jí̱i̱kim akuptame. Túramu asan peṉké ayamtsuk Amiiní̱ya̱ jeachat aya wékain átatjai. Tuma asamtai yaaksha wáitkiuṉka mantuattawai” tímiayi. 15Tutai Uunt Yus chicharuk “Antsu ámin mantamaka siati asutiámu átatui” tímiayi. Nuyá̱ Uunt Yus Káinian máwara̱i̱ṉ tusa niisháa iira mantamnachmin awajsámiayi. 16Tura Kainkia Yusja̱i̱ chichasmia nuyá̱ jiinkí̱ Nuut nuṉkanam Etennumia̱ṉka etsa̱ jintiainmaani̱ ana nui̱ pujustaj tusa wémiayi.
Kainia shuari̱
17Kain nuwe̱ja̱i̱ tsaniṉmatai ni nuwé̱ ajaprukmiayi. Tura uchin takus Enuk anaikiamiayi. Kainkia ukunam aents mátsatkamun najana ni uchirí̱ náari̱niak anaikiamiayi. Tuma asamtai nú nuṉkan Enuk tiniu ármiayi. 18Kain pampaṉmaka jú̱nisaiti, Enuka uchirí̱ Iratauyayi, Irata uchirí̱ Miyujaerauyayi, Miyujaera uchirí̱ Mitiusaerauyayi, Mitiusaera uchirí̱ Ramikiauyayi. 19Ramikkia jimiará nuwa̱n apatkauyayi. Chíkich nuwa̱ Aata náartiniuyayi. Chíkichkia Tseera náartiniuyayi. 20Áataka uchin Japaran takusmiayi. Nuap je̱a̱nam pujusár waaká wáinin armia nuka Japar wea ármiayi. 21Japara yachi̱ ámiayi ni naari̱ Jupar. Árpan tuntuin tura piṉkiuin umpuin armia nuka Jupar wea ármiayi. 22Tséeraka uchin Tuparkáinian takusmiayi. Tuparkáin kátsuram jiruja̱i̱ tura yaṉkú jiruja̱i̱sha takakmauyayi. Tuparkáinia umái̱ ámiayi, ni naari̱ Naama.
23Chíkich tsawantai̱ Ramik nuwe̱n Áatan tura Tseeran chicharainiak
“Wi títiatjana nu péṉker anturtuktarum.
Áishmaṉ natsaksha nuatkaksha yaaksha awati
numpamprakuiṉkia wisha máwaintjiai.
24Warí Kain mantamnamunam siati asutiámu átiniaitkuinkia
wisha shuaran mámtaiṉkia winia yapajtiuiniakuiṉkia nuna naṉkaamas sataintisiáti yapajkiaraintjiai” tímiayi.
Ataṉ tura Ewa uchirí̱ nuyá̱ patái̱ armia nu
25Nuyá̱ ataksha Ataṉka nua̱rí̱ Ewa ajapruk áishmaṉkan takusmiayi. Tura enentáimias Kaincha yachi̱n Awiran maa asamtai yamaikia chíkich uchin Awira patai̱n Yus surusai tusa Set anaikiamiayi.#4:25 Set támaka Ipríu chichamja̱i̱ṉkia ataksha chikichan surusai támaiti.
26Núnisaṉ Set uchin yajutmar Enus anaikiamiayi. Nui̱ Uunt Yusa náari̱n pachitian juárkiarmiayi.
Tans Gekies:
Naṉ. 4: jiv
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
©2009 Avant Ministries in cooperation with Wycliffe Bible Translators, Inc. All rights reserved.
