Gẹnẹsis 8
8
Ufomwẹ Uromwẹ Amẹ
1Sokpan, Osanobua keghi ye Noa rre, kẹe kevbe avbe aranmwẹ oha kevbe emwirri ni guẹe rre uwe okọ, ọ gie ẹhoho ne ọ hoho ye agbọn, amẹ nii keghi gha rriotọ. 2Uhunmwu ẹzẹ avbe okun ni rre ototọ vbe uwe otọ kevbe avbe uvun ni rre iso, a keghi khiọ ehia. A keghi mu amẹ ne ọ te rhọ ke iso rre. 3Amẹ keghi gha si, ọ keghi si fo vbe iyeke ikpẹdẹ igbe yan ikiọkhọe (150). 4Vbe ikpẹdẹ ehairrọvbugie vbe uki ne ogihinrọn, okọ nii keghi sẹ otọ vbe uhunmwu oke ọkpa vbe Ararat. 5Amẹ nii keghi gha si, ọ ghi sẹ ikpẹdẹ nokaro ọghe uki nokaro ne ọ re uki nogigbe, a keghi gha bẹghe ukpẹ avbe oke ni yo.
6Ikpẹdẹ iyeva ghi gberra nẹ, Noa keghi kie avbe ewindo, 7ọ na zẹ ogbodu ọkpa obọ ọ keghi ladian, ọ ma dọlegbe rre ọ na gha tin yo tin rre, amẹ nii hia te do ka vbe otọ agbọn. 8Ẹre Noa ghi na vbe zẹ idu obọ ne ọ ya ghe ẹre a deghẹ amẹ ni sii fo nẹ. 9Sokpan rhunmwuda ighẹ te amẹ ye gba otọe hia, idu nii ma miẹn ehe tin yan rhunmwuda ọnii, ọ keghi tin werriegbe rre, e Noa keghi niẹn obọ ladian, ọ na muẹn la uwe okọ. 10Rẹn keghi ye ziengbe la ikpẹdẹ ihinrọn, ọ na vbe zẹ idu obọ vbe okọ, 11ọ keghi dọlegbe bu ẹre rre vbe ota, rẹn keghi miẹn wẹ ọ ye ukpẹ mu ebe ohọ ne sọguọsọguọ. Ẹre Noa ghi na rẹn wẹ amẹ nii ka nẹ. 12E Noa keghi yevbe ziengbe la ikpẹdẹ ihinrọn, ọ na vbe zẹ idu obọ, ẹghẹ na, ọ ma ghi dọlegbe rre.
13E Noa ghi rre ukpo ọkpa yan arriaeha (601), vbe ikpẹdẹ nokaro ọghe uki nokaro, amẹ keghi ka fo fẹẹrẹ vbe otọ. Rẹn ghi mu emwi ne a ya gue okọ hin rre nẹ, e Noa keghi tọn aro mu, Ọ keghi miẹn wẹ amẹ ka nẹ vbe otọe. 14Vbe ikpẹdẹ ehairrọvbọgban ọghe uki nogieva, amẹ na ka fo fẹẹrẹ vbe otọe. 15Osanobua keghi tama Noa wẹẹ, 16“Ladian vbe uwe okọ ke uwẹ kevbe amwẹ ọn kevbe ivbuẹ kevbe avbe amwẹ iran. 17Viọ ehia ladian ighẹ avbe ahianmwẹ, kevbe avbe aranmwẹ ne iran miẹn ehe na gha biẹlẹ ne iran vbe vẹ gba agbọn hia.” 18E Noa keghi do kpao vbe okọ rre kẹe kevbe amwẹ ọnrẹn, ivbi ẹre nikpia kevbe avbe amwẹ iran. 19Avbe aranmwẹ oha hia ke avbe ahianmwẹ keghi ladian zẹ vbe oghẹn iran.
Noa Zọ Ese
20E Noa keghi gba aka ne Nọyaẹnmwa. Ọ keghi rhie ọkpọkpa vbe uwe aranmwẹ kevbe ahianmwẹ ne ẹ i mwẹ awua, ọ keghi ya iran zọ ese ne a giẹnrẹn vbe uhunmwu aka nii.
21Uwinhinmwẹ ọnrẹn keghi yẹ Nọyaẹnmwa, ọ keghi tae wẹẹ, “Mẹ i ghi dọlegbe fi agbọn unu rhunmwuda uyinmwẹ emwa nagbọn, mẹ rẹnrẹn wẹ ke ẹghẹ ọvbokhan rẹn kpao, iro dan ọre ọ rre ekhọe ẹre, Mẹ i ghi dọlegbe fuẹn emwi hia, zẹ vbene I ruẹe ẹdẹnẹrẹ. 22Ya sẹ omwa vbe ne agbọn gha ya gha rrọọ, ẹghẹ ikọ emwi kevbe ẹghẹ emwiorhọ gha rrọọ. Ẹghẹ okhuakhua kevbe owowo gha rrọọ, ẹghẹ uyunmwu kevbe ẹghẹ orhọ, asọn kevbe avan. Ena i ra fo ẹdẹ.”
Tans Gekies:
Gẹnẹsis 8: EDO96
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@ The Bible Society of Nigeria, 1996
