Matiyu 7
7
Nye e kpèn nye ende akan kǝ́n ra
(Luka 6:37-38,41-42)
1“Nye e kpèn nye nobǝ efki kǝ́n ra, afwa Ehwya a kpèn nye kǝ́n. 2Adia abu nye kpèn be nobǝ kǝ́n anga, enò Ehwya a kpèn nye kǝ́n gaten. Yishwa mombwamo a nye ti mbwà be nobǝ anga, a ge hon nwone Ehwya ti a mbwà nye ángá.
3“Ano bwe a ge, o di tumochin e no tswa fǝzǝn mo nwenjin o, tea o ká mbo ekǝntumo e no tswa fǝzǝn mbo ángá ra? 4Bwe engǝ wa jan, ‘Nwenjwa, me e ti e vǝ́ o tumochin e no o a fǝzǝn mbo,’ tea o gwa ara ekǝntumo e no a fǝzǝn mbo ángá? 5A bo ya ayibangǝ̀, kwafya tivǝ́ ekǝntumo e no a fǝzǝn mbo ni sangǝ́, o chà di a ben a se zǝn, we ti e vǝ́ mò e no fǝzǝn mo nwenjin o ángá.
6“Nye e no nye be bge mò e no echanwenwen ángá ra, adia ba twabǝ bwa a nyo nye san. Efwe, nye e kpu nye be motwa a shwa esese mo nye e nggwa e no nye be efika ra, adia a no nye bwe enò, ba cha fù mo be a chu mo be, n twanga bwa vǝ a ngga nye nwofyan nwofyan.
Nye bgó, nye nda ngge nye kǝn bu
(Luka 11:9-13)
7“Nye e bgó mò a zǝn Ehwya, ga no nye. Nye e nda, nya ben, nye e kǝn bu, ge fki a gwa nye tafǝmo. 8Egwa egwa e bgó mò, be no ye anga, egwa egwa e nda be mò, ben anga, ngge ende e kǝn bu anga, be fkigwa ye tafǝmo hon anga.
9“Engga mo nye be àtà, ende hon a ara, ano nwen ye bgó ye borodi, ga no nó ten? 10Eno e ra ano ge bgó gwejo, ga no nó mokan ángá a ara? 11Ano a nye be ya ebgen, nye yi abu nya dwe mbǝgya mo nye edwe esese m̀ mo nye, Ate nye e no a kpe ángá, a dwe ye be ya e bgó ye mò anga edwe esese ra? 12Enona, adi egwa egwa mo mò, nye e bwe be nobǝ efki abu nye dgyan be e bwe nye ángá. Adia eni no tén engà mo binbin mo mò, a edon a Ehwya è no Mosa, ngge be fwa a be efojan ekpe ekpe è jan ángá.
Fǝtsǝmo efifafa ngge enggwanggwa
(Luka 13:24)
13“Nye e kwa e shi a tswa zǝnotì mo Ehwya chá fǝtsǝmo efifafa. Adia fǝtsǝmo nwone e no enggwanggwa ángá, efǝ mo nó fwa ye ekpodwadwa ra, n du be nobǝ kwashi anga adi fǝ. Be ya e kwashi anga chá zǝn ángá no embo. 14Tea fǝtsǝmo hon e du be nobǝ kwa anga adi nya ángá no efifafa, ngge efǝ mo nó no ekpodwadwa. Be ya e swa efǝ hon anga, fí be ra.
Tumo ngge yishwa ga a ge gwa anga
(Luka 6:43-44)
15“Nye bgeshi fǝzǝn a chu be efojan fwafe, ya e bwa a zǝn nye abu be son, ya e dì be ende akan ju anga ra. Tea chá tswa, ba be kwàkpan esera ya a gu nye ángá. 16Nye di a yi be a chu be mò a be bwe anga. Be nobǝ a bga be ga mo tu enabi a ju tu evi ra, efki ra, be ga mo tu engǝtsǝn a ju tu san-ekǝn. 17Ba anona, egwa egwa mo tumo esese gwa anga ga esese, tea tumo esera gwa anga ga esera. 18Tumo esese a gwa ye ga esera ra, tumo esera a gwa ye ga esese ra gaten. 19Egwa egwa mo tumo e gwa ye ga esese anga ra, ba sen nó a twa a fǝ̀. 20Enona, nye di a yi be nobǝ a chu be mò a be bwe anga.
Abu ba kpèn be ya ayibangǝ̀ kǝ́n ángá
(Luka 13:25-27)
21“Fwa ye egwa egwa e fǝ́ m, ‘Etsodwe, Etsodwe,’ anga, a kwa a tswa zǝnotì mo Ehwya ra, kpwà be ya e bwe mò a Àtà m e no a kpe ángá, dgyan anga. 22Be nobǝ embo a jan m nò eni jan, ‘Etsodwe, Etsodwe, jè fijan je fwa adi ti mbo ra, ngge jè nyonvǝ́ je be engǝ́ esera gwa a je ngge jè bwe je be moeditanm embo adi ti mbo ra?’ 23Kǝnggwa, ma jan be, ‘M chà yi di m nye ra. Nye nya ana, a nye be ya mofǝ̀ ebwem.’
Be ya moembwem engganggaton ngge hwen
(Luka 6:47-49)
24“Egwa egwa e fo be fwa mam ena, n bwe mò a be fwa hon jan anga, a no abu ya moembwem engganggaton, éè mbwe àtá mbwe no a chu ten echakpokpo ángá. 25Atan a chù è bwa, be mbǝ è mbo embobin gwa a je, fyochu echakpokpo è kpo bwa tsǝ mbǝ bu a ju àtá hon, tea àtá hon è bwi ye ra, adia fù àtá hon è no a chu ten ángá. 26Tea egwa egwa e fo fwa mam ena n bwe ye mò a fwa hon jan anga ra, a no abu hwen, è mbwe àtá mbwe a chu akwabǝ ángá. 27Atan a chu è bwa, be mbǝ è mbo embobin gwa a je, fyochu echakpokpo è kpo bwa tsǝ mbǝ hon bu a ju àtá hon, àtá hon è kǝn bwi gu. Ebwitkom mo àtá hon è no mò ekǝnkǝn nya àywá.”
28Atan a Yeso è jan gu ara be fwa ena ángá, binbin mo be nobǝ è no a zǝn ángá è tàn ebwikpe àywá, a chu moetum mbwe, 29adia gè tú mò hon anga abu be ya è no ngge emwentì, fwa ye abu be etumo mo edon mo be ra.
Tans Gekies:
Matiyu 7: ICH
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 Luke Initiative for Scripture Translation
