Luke 10
10
Sése atchindege makumi tsaambe ma baate na baate bɔli gu tɔse tsaange yiyibuɛ
1Vayulava Sése àmane maambe muɛne yambele, ndɛ nàsɔle makumi tsaambe ma baate na baate bɔli. Ndɛ nàtchindege bɔ bɔli bɔli gutsɔ mala na misɛnge mi ndɛ tɔndenge yɛnde gutsɔ miɔ. 2Ndɛ nàlɛle bɔ ndé: «Baate mvuabɔvɛ batɔnde pɔtege. Tɔ batochi ba Tsaange yiyibuɛ bukɛge. Bɔndani Nzɛmbi Kumu a baate atchindege batochi ba mabige mɛndi gulidi baate.» 3Mɛ ka béne mɛ tchindege ngane a baane ba bindɔmbe va pfuɛchi a magɛne. 4Béne layɛnde, yabɛgani badɔle na pɛnge na bapɔnde. Mu ndjile, yaviɔse lekɛse navɛde baate basugi.
5Béne laningele gutsɔ nzɔ pɛti yɔ, vɛdani misaange gulidi ba ngua nzɔ muɛne. 6Mutu ngua ingage abade gutsɔ nzɔ muɛne, misaange mi béne le védi mikabade na ndɛ. Ti anibovɛ, misaange mikagabege na béne muɛne. 7Tsagelani gutsɔ nzɔ muɛne. Tchadani, niɔdani biotchi bibakivɛde béne muti mudiéndji afuade moyi ndile mu fute mudianze wu ndɛ sade. Béne mu manzɔ makime yɛnde vɛ.
8Gutsɔ musɛnge wotchi wu béne lekiyɛnde, bayake béne, tchadani biéle bibakivɛde béne. 9Bɛlesani babéde ba béne lekibakese gone. Lɛlani bɔ ti: «Buyumune bua Nzɛmbi na béne bukade.» 10Tɔ béne lasote va musɛnge, babise béne yake, yɛndani mu bitchige bia mukungi béne lekalɛle baate ti: 11«Bése ka mufundu a musɛnge a béne wuwulidi mu matɛmbi ma bése lakobele. Tɔ yabani ti Béne lemabage Buyumune bua Nzɛmbi.» 12Mumbuli mɛ lɛle béne mé: «Letsuge le Nzɛmbi ákápase mipame mia baate, chigi yi ndɛ kátchise baate babatsagele gutsɔ musɛnge muɛne, niyilotele yi ndɛ kátchise baate bàbàtsagelenge gutsɔ musɛnge a Sodɔme.»
Bichi Korasine na bichi Bétsayida babise chilele Tsaange yiyibuɛ
13Tinge gulidi béne balatsagele gutsɔ musɛnge a Korasine na musɛnge a Bétsayida. Bimuile bibachidi gu mboge a béne, mbégi gu Tire na Chidon bàsade, baate bàbàtsagelenge gutsɔ musɛnge muɛne mbégi bàyɔbe lefutu na luate matsaande ma bukuili mu muɛse ti bɔ bagɛle mulinge. 14Nimulɔ letsuge le Nzɛmbi ákápase mipame mia baate, chigi yi ndɛ kátchise béne niyilotele yi ndɛ kátchise bichi Tire na Chidon. 15A bichi Kapɛrenawume, béne letase ti béne nilebage itchige gu mboge a Nzɛmbi gu yulu? Tchavɛ. Nzɛmbi gu itchige cha mimbɔnde ákátchindege béne. 16Sése nàbàlɛle baate bɛndi ndé: «Baate babayoge ma béne lalɛle, bɔ mɛ bayogele. Tɔ baate bababise ma béne lalɛle, bɔ mɛ babise namoni a Nzɛmbi wuwàtchindege mɛ.»
17Baate ba Sése ba makumi tsaambe na baate bɔli bàmate gu ndɛ tchindege bɔ babase na ngɔmbe yalotele, nibàlɛle Sése bo: «A Kumu, namoni a matɛnge magobichi bése mu tate gua ndoge a wɛ.» 18Sése nàkale bɔ ndé: «Mɛ moni Diabele améti gu yulu nàrégi ngane a muvédiavédi. 19Yogani, mɛ niwuvɛdi béne butome bua tchate Diabele na bungudi buɛndi botchi. Mɛ nivédi béne na bungudi bua tchate batɛdi na bangénge. Ikumbe ti imochi yichibasade béne tchambe lelebi vɛ. 20Yakuadani na ngɔmbe muti matɛnge magobichi béne. Tɔ kuadani na ngɔmbe muti Nzɛmbi amakome ma ndoge ma béne gutsɔ ichange cha moyi.»
Sése niwu Nzɛmbi àpandele maambe motchi
21Vakɛtiavane, Lenioni Labuyimbe lebase Sése na ngɔmbe, nàlɛle ndé: «A Taate, Kumu a yulu na tɔtɔ. Mɛ wɛ mɛ kakese muti wɛ péndili gulidi bangɛbe maambe ma wɛ suɛge gulidi biyédi na bayébi ba maambe. Mumbuli Taate, wɛ niwutondi wo maambe muɛne mabade ndile nibone.»
22«Taate niwàvɛde mɛ maambe motchi. Mutu asayébi mɛ vɛ. Mukabe na taate a mɛ Nzɛmbi. Mutu asayébi taate a mɛ Nzɛmbi vɛ. Mukabe na mɛ Muane a ndɛ na mutu wu mɛ tonde pandele maambe muɛne.»
23Sése àgɛlege gulidi baate bɛndi nàlɛle bɔ ndé: «Bubuɛ gulidi béne balamɔne maambe muɛne.» 24Mumbuli mɛ lɛle béne mé: «Babigi ba maambe ma Nzɛmbi na bakumu ba tɔtɔ mvuabɔvɛ bàtɔnde mɔne maambe ma béne lamɔne, tɔ bɔ bàsàmɔne maambe muɛne vɛ. Bàtɔnde maambe muɛne yoge, tɔ bàsayoge maambe muɛne vɛ.»
Moyi wa mubunamubu ka buni babage
25Avane Musupili a mangidi ma Nzɛmbi àtɛmene, nàdume Sése ndjide mu tchitse ndɛ ndé: «A Mulongichi, mɛ ka buni mɛ kisáde mu fuade moyi wa mubunamubu?» 26Sése nàkale ndɛ ndé: «Gutsɔ ichange cha migage ma Nzɛmbi buni bàkome? Wɛ mangidi muɛne buni wɛ tchikese?» 27Musupili a mangidi ma Nzɛmbi nàkale Sése ndé: «Gutsɔ ichange cha mangidi ma Nzɛmbi kome bak ome bo. Tɔnde Malumbi Nzɛmbi a wɛ na mutéme mumochi, na Lenioni lawɛ lotchi, na mataase ma wɛ motchi, na bungudi bua wɛ botchi. Nibàbàbuɛse kome bo, tɔnde mbɛgi a wɛ ngane bu wɛ tɔnde niute a wɛ muɛne.» 28Sése nàkale ndɛ ndé: «Wɛ buédi wɛ yégili. Wɛ sade bone tsuge yotchi, wɛ nifuáde moyi.»
Kokome a muchi Samari wu mubuɛ
29Musupili a mabige ma Nzɛmbi wuwàtɔndenge bénge, nàfule Sése ndé: «Tɔ mbɛgi wu mɛ kitɔnde ka wuni?» 30Sése nàkale ndɛ ndé: «Letsuge lemochi, lebagele lemate gu Sérusalɛme nilàyɛnde gu Sériko. Mu ndjile mibongi mikuate ndɛ, mipoke bitsale bi ndɛ bàde na biɔ, mibome ndɛ, nimiàniage ndɛ gutsɔ leku.» 31Muvédi a malage àviɔge mu ndjile muɛne, àmɔne lebagele muɛne nàbakele. 32Namoni a mutu wa ibaande cha itsuku cha ba Lévite àsote va kɛse muɛne, àmɔne lebagele muɛne nàbakele. 33Tɔ muchi Samari, wu bachife bàvɔngelenge àviɔge na ndɛ mu ndjile muɛne, àsote va lebagele muɛne làbade, nàmɔne ndɛ tinge. 34Akukule va pédi a ndɛ, àyitele malame na mɛdi mu yulu a mapode mɛndi, nàgade ndɛ mɔ na bifuti. Anagese ndɛ gu yulu a niame a ndɛ, nàbége ndɛ gu nzɔ bandjinze. 35Buchi bukiade, àpose tochini a dɔle na makumi mana, àvɛde kumu a nzɔ bandjinze, nàlɛle ndɛ ndé: «Kɛle mɛ lebagele lineli. Badɔle ba wɛ kikabe va yulu a ba mɛ védi wɛ mu ndɛ, mɛ nigábese wɛ bɔ va mɛ káyade.» 36Sése nàkale ndɛ ndé: «Va pfuɛchi a baate muɛne ba batate wuwàbade mbɛgi a mutu wu mibongi mia bome ka wuni?» 37Musupili mangidi ma Nzɛmbi nàkale ndɛ ndé: «Mutu wuwàmɔne ndɛ tinge ni mbɛgi a ndɛ.» Sése nàkale ndɛ ndé: «Yɛnde wɛ na wɛ wɛ sade ngane a mutu muɛne.»
Sése gu mboge a Mari na Marete
38Letsuge lemochi, va Sése bone baate bɛndi bàyɛnde gu Sérusalɛme, bàsote va bole, mukaase wubàtɛdenge Marete nàyake ndɛ gu nzɔ ndɛ. 39Marete nàbade na mugɛge wubàtɛdenge Mari. Avanekaniva Mari àtsagele va pédi a Sése mu yoge mabige ma Nzɛmbi ma Sése lɔngesenge. 40Marete nàbade ndile na ibɛyi cha lambe biéle bia tchade. Ndɛ nàfule Sése ndé: «A Kumu, wɛ buédi wɛ mɔne va mugɛge a mɛ atémini mɛ na bisale bia nzɔ biotchi? Lɛle ndɛ ayade gu yamese mɛ.» 41Sése nàkale ndɛ ndé: «A Marete. A Marete. Wɛ na ibɛyi cha maambe mvuamɔvɛ. 42Tɔ tchambe lelebuɛ ndile lemochi lelidi. Lɔ ni le Mari asoli. Mutu achibamase ndɛ Lɔ vɛ.»
Tans Gekies:
Luke 10: NZB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
