Met 38
38
Yuda a Tamar
(1 Minkte 2:3-15; Dt 25:5-10; Rt 4)
1Melu mete, Yuda a nga ke bobenyañe bé ôyap, a nga ke be môt ya Adulam jôé na Hira. 2E wé, Yuda a nga yene ngone môte ya Kanaan jôé na kua; a nga nyoñe nye ane minga wé a a nga bômbô nye. 3A nga nyoñ abum a biaé monafam, nyô a nga yôlé na Er. 4A nga beta nyoñ abum a biaé monafam, nyô a nga yôlé na: Onan. 5Eyoñ éfe jia a nga biaé monafam a yôlé nye jôé na: Séla; éyoñ a nga biaé, Yuda a too Kzib.
6Yuda a nga lu'u Er, ntôle mone wé minga jôé na Tamar. 7Er, ntôle mone Yakob a mbe *abé e mise me Nti, a Nti a nga bo na a wu. 8Ane Yuda a nga jô Onan na: Kele be nga monyoñ a bi mvoñe bôt. 9Amu Onan a nga yeme na mvoñe bôt éte jaa ye ke bo énjé, a nga sôé meyôme tyia éyoñ a ke bômbô minga monyañ, nalé ate a ye bo te ve monyañe wé mvoñe bôt. 10Jam a mbe a bo'ok e mbe *abé e mise me Nti nyô a nga bo fe na a wu. 11Ane Yuda a nga jô mbome wé Tamar na: Tabe'e nkus e ndaa ésoo, akekui monafame wom Séla a ye bo nya môtô. Amu a mbe a jô'ô émiene na: Nye fe a ye wu ane bobenyañe bé. Tamar a nga ke a tabe e ndaa ésaa wé.
12Abui melu e nga lôt a ngone kua, minga Yuda a nga wu. Eyoñe Yuda a volebaneya *nlem, a nga bet e Timna, e mfa'a ba be mbe be tyeñe nye mbame bone biyem be mbe, nye a mvôé jé Hira, môte ya Adulam. 13Be nga kate de Tamar na: Tame yene nyô ntyi a bete Timna asu ya tyeñe mbame bone biyeme wé, 14Ane a nga vaa mengômesan me nkuse mé, a nga jaé éyañese a vute je nyôl a tabe anyiin Enayim, e zene ja ke Timna; amu a nga yene na Séla a ntoo nya môtô, ve be nji ve nye nye a bo minga wé.
15Yuda a nga yene nye a buni na a ne minga ébamba, amu asu dé e mbe mbutan. 16A nga tôbane nye zene yôp a jô nye na: Za'a bi ke, ma kômbô bia wo bi bômbô. Amu a nji ke yeme na a mbe mbome wé. Nye na: Wo ye ve ma je asu ya bômbô a wo' 17A nga yalane na: Ma ye lôme wo mon ékela ya mbame bone biyeme wom. Minga a nga jô na: Vengevenge ve wo li'i ma éban, akekui ô lômeya mon ékela ate. 18Yakob a nga yalane na: Ebane jé ma ye ve wo? Minga nye na: Elondo jôé womien a nkol y'été a *ntum ô bili mo le. A nga kee nye bie. Wôna a nga bômbô nye a a nga ve nye abum. 19A nga kôlô si a ke; a nga vaa éyañese jé a beta jaé mengômesan me nkuse mé.
20Yuda a nga lôme mon ékela a mvôé jé é mbe môte ya Adulam, asu ya beta nyoñ éban e mo me minga. Ve a nji koone nye. 21A nga sili bôte ya vôm ate a jô na: Minga ébamba a mbe a tele Enayim, e zene yôp a ne vé? Be nga yalane nye na: Minga ébamba éziñ a nji yené va. 22A nga bulane be Yuda a jô na: Me nji ke koone nye, to'o bôte ya vôm ate ba te jô na: Minga ébamba éziñ a nji bo va. 23Yuda nye na: A ba'ale'e jôm a bili! Te bia yané biabebien ébiasé été. Ô lôô na ma te lôme mon ékela nyô, ve wo ô nji koone nye.
24Mvuse bebé ngon élaa, be nga zu kate Yuda na: Mbome wôé Tamar ô boya ébamba, a e nye a ntoo abume nyôlé, ébuma y'ébamba jé. Ane Yuda a nga jô na: Kula'ane nye atan, a be diki'i nye nduan. 25Mbôlô be mbe be kele nye atan, a nga lôme be kate fame na: Môt a nee biôme bi e nye a nga ve ma abum; yemek, ma ye'elane wo, e môt a nee élondo ji, minkole mi a ntume wu. 26Yuda a nga yeme bie a jô na: A ne zôsôôô a dañe ma, amu me nji ve nye monafame wom Séla; a a nji fe beta bômbô nye.
27Eyoñ a nga kui éyoñ abiaé, be nga yene na mimbias mi ne nye abum. 28Eyoñ abiaé wua a nga liti akule wo; minga a bialé binga a nga bi wô a tiñeti évele nkol été a jô na: Nyô e nye a taté kui. 29Ve a nga dutu akule wo a monyañ a nga kui atan. Eyoñe te minga a bialé binga a nga jô na: E nne wo te tube womiene zene vé? A nga yôlé nye na Pérét. 30Mvus éte, monyañ a nga kui atan a be'e évele nkole wo; a be nga yôlé nye na Zéra.
Tans Gekies:
Met 38: BDCB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bible en langue Bulu © L'Alliance Biblique du Cameroun, 2007, 2015.
