LUKA 23
23
1Lani bi *cancannikpeliba taanli kuli den fii ki gedini Jesu gufeneeli Pilata po. 2Bi den cili ki kuli o ki yedi: «Ti den laa one ke o yaandi ti niba, ki tua ke ban da pa o badiciamo *Sesa li lubili, ki go tua ke wani oba n tie *U Tienu n Gandi Yua, o bado.» 3Pilata den buali Jesu: «A tie Jufinba bado bi?» Jesu den goa ki yedi o: «Fini n yedi yeni.»
4Pilata den yedi bi kopadicianba yudanba leni ku niligu: «Mii laa ke o ja na tieni tagiliba kuli.» 5Bi den nia ki yedi: «O den cili hali *Galile po ki tagi Jude nni kuli ki pundi hali ne, ki bangi bi niba ki tigini ba ke ban yie li bali.»
Pilata soani Jesu Elodo po
6Pilata n den gbadi ke bi maadi Galile maama, o den buali o ja yeni yaa tie Galile yua. 7Wan den gbadi ke o tie *Elodo yaa diema yua, o den soani o Elodo po. Li sua ke Elodo ye Jelusalema laa dana. 8Wan den laa Jesu, o pali den mangi boncianla kelima hali yogu o den bua ki le o, kelima o den gba ke bi maadi o maama ke o sugini wan tieni mi bancianma wan le. 9O den buali Jesu i buali boncianla, ama waa den guani o maamaba kuli. 10Bi kopadicianba yudanba leni li *bali maama bangikaaba den ye likani ki kuliti Jesu boncianla kaa cedi. 11Elodo den taani leni o minteela ki fali o, ki ñuadi o ki lani o ti tiakpiagidi, ki guani o Pilata po. 12Hali yogu ti yibalindi den ye Elodo leni Pilata siiga, laa daali liga bi den danli leni biyaba.
Pilata jia ki kadi ke ban kpa Jesu
(Mat 27.15-26; Mak 15.6-15; Jan 18.38b—19.16)
13Pilata den taani bi kopadicianba yudanba leni Jufinba yudanba leni ku niligu kuli 14ki yedi ba: «Yi den cuani n kani o ja na ki yedi ke o yaandi bi niba ki tua ke ban yie li bali. To, n buali o yi nintuali ki sua waa tieni liba yin kuli o yaala kuli siiga. 15Elodo moko naa sua ke o pia tagiliba, lane ke o guani o ti kani. O ja na ki tieni liba kuli yaala n pundi tin kpa o. 16Lani yaa po n yaa teni ke bi pua o, n baa ŋa o.» [ 17Li den sua ke mi *Pendima jaanma kuli li tie tiladi Pilata n faabi kpaadiyenli ku niligu po.] 18Ku niligu kuli den taani ki tiani: «Teni ban kpa o ja na, ki faabi tipo Balabasa.» 19Bi den kuani Balabasa li kpaadidieli nni kelima o den fiini mi janjanma u dogu nni ki go ku o nilo moko. 20Pilata den bua ki faabi Jesu. Lani yaa po o go den maadi leni ku niligu. 21Ama bi den tangi ki tua: «Joani o li *dapoanpoanli po, joani o li dapoanpoanli po.» 22Pilata go den maadi ba mi tataama ki yedi: «O tieni be ke li bia? Mii laa ke o tieni yaa bonbiadila n pundi mi kuuma. Lanwani n baa teni ban pua o, ki ŋa o.» 23Bi go den ñi ki tangi ki tua ke ban joani o li dapoanpoanli po, hali ke bi tantani den paadi Pilata. 24Lani yaa po Pilata den jia ti buudi ki kadi ke ban mia ban tieni Jesu yaala yeni baa tieni. 25O den ŋa ban den kuani yaa ja li kpaadidieli nni kelima mi janjanma leni mi nikpama kuli yaa po yeni nani ku niligu n mia maama, ki taa Jesu ki teni ba ke ban tieni o ban bua yaala.
Bi joani li dapoanpoanli po
(Mat 27.32-44; Mak 15.21-32; Jan 19.17-27)
26Ban den ñani Jesu likani ki caani o ki baan kpa o, bi den tuogi Silena dogu yua ke bi yi o Simono ke o ñani i kuani po. Bi den cuo o ki bugini o li dapoanpoanli wan yaa bugi ki ŋua Jesu. 27Li nigocianli den ŋua o, bi siiga bi puoba den ye, ki pua bi bena ki mua Jesu po. 28O den jigidi ki yedi ba: «Yinba, Jelusalema puoba, da mua mani mini yaa po, yaa mua mani yi yaa yula po leni yi bila po. 29Kelima a dana baa ti cua ke bi baa yedi: ‹Li pamanli ye leni mu poŋoalimu, yaaba n ki mali leni yaaba n ki ŋaani biga kuli po.› 30Laa yogunu bi niba baa maadi leni a joaciama ki tua: ‹Baa mani tipo,› ki go yaa miadi a joabila ki tua: ‹Ŋoagini mani ti.›#Ose 10.8; Doa 6.16 31Kelima bi yaa tieni ku dasoangigu yeni, bi baa tieni ku dakuongu mo lede?»#23.31 Bi tianba bundi: Bi yaa tieni mini yua n ka pia tagili nanda, bi baa tieni yinba yaaba n nani lede?
32Bi go den gedini nikpaba lie ki baa taani ki kpa ba leni Jesu.
33Ban den pundi ban yi yaa kaanu ku Yukuokuogu, bi den joani Jesu li dapoanpoanli po, ki go joani bi nibiadiliediba yeni moko a dapoanpoana po, yendo Jesu jienu po, o yua mo o ganu po. 34Jesu den yedi: «N Baa, tieni bipo sugili kelima baa bani ban tiendi yaala.» Bi den toani tiatia ki boagidi o tiayiekaadi.#Pis 22.19
35Ku niligu den se likani ki diidi. Jufinba yudanba den ñuadi Jesu ki tua: «O den ga nitoaba, o yaa tie Kilisiti U Tienu n Gandi Yua, wan ga o yuli.»#Pis 22.8 36A minteela moko den ñuadi o ki cua o kani ki teni o mi ñinmiligima ki yedi:#Pis 69.22 37«A yaa tie Jufinba bado, ŋan ga a yuli.» 38Yaa diani n tie na den taabi ki yiini o yuli po:
One n tie Jufinba bado.
39Bi nibiadiliediba yaaba n den juani a dapoanpoana po yeni siiga yendo den sugidi Jesu ki yedi: «Ŋaa tie U Tienu n Gandi Yua kaa? Ga a yuli ki nan ga ti mo.» 40Ama o lielo den funi leni o ki yedi: «Ŋaa jie U Tienu, fini yua n taa cuonu leni o ja na? 41Tinba yaa po, yaa cuonu n tie na tiegi, kelima ti ga ti tuona panpaani, ama one naa tieni bonbiadiliba kuli.» 42Lani o den yedi: «Jesu ŋan tiadi npo a yaa ti cua ki diedi diema yaa yogunu.» 43Jesu den goa ki yedi o: «N waani a moamoani, dinla liga a baa ye leni nni *ŋalijani.»
Jesu kuuma
(Mat 27.45-56; Mak 15.33-41; Jan 19.28-30)
44Lan den bua ki pundi u yensiicocolu u yienu den biigi, ke li *biigili tieni ki tinga nni kuli ki yaa caa hali li yenlebidili. 45U Tienu diegu *kpalidoaginkaabu den padi siiga nni ki boagidi boaga lie.#Ñam 26.31-33 46Jesu den kpaani ki yedi: «N Baa, n teni miali a nuu nni.» Wan den yedi yeni, o den fuo ki jiidi.#Pis 31.6
47Minteela kobiga yudaano n den laa yaala n tieni, o den pagi U Tienu ki yedi: «Moamoani, o ja na den tiegi lige.»
48Yaa nigola n den taani likani ki diidi, n den laa yaala n tieni, bi den lebidi ki kuni ki pua bi bena. 49Yaaba n den bani Jesu kuli leni yaa puoba n den ciani o hali Galile, den se foagima ki nua yaala n tiendi.#Luk 8.2-3
Jesu piinma
(Mat 27.57-61; Mak 15.42-47; Jan 19.38-42)
50-51Jufinba cancannikpeliba taancianli yaaba siiga yendo den ye ke bi yi o Josefi, yaa nilo n ŋani ki tiegi, ki tie Jufinba dogu Alimate yua. O den gu ke *U Tienu diema n pundi. Waa den taani leni o lieba bi jagili nni, leni ban den tieni yaala kuli nni. 52Laa ja den gedi Pilata kani ki mia o ke wan teni o Jesu o kpiemo. 53O den jiini o li dapoanpoanli po, ki bobini o bu kpalipienbu, ki duani o li kuli nni. Li den sua ke bi kpiedi li kuli yeni ku tangu po ki daa duani kpiemo kuli lienni. 54Laa daali den tie li boginli daali *U Tienu fuodima daali po, ke U Tienu fuodima daali cilima yogunu bua ki pundi.
55Bi puoba, yaaba n den ñani Galile ki ciani Jesu yeni, den ŋoadi Josefi ki laa likuli leni wan duani Jesu o kpiemo maama. 56Lani bi den goani bi denpo ki bogini yaa tibidi n pia u nuulimanu, leni tulale. Mi fuodima daali bi den fuodi, nani li *bali maama n bili maama.#Ñam 20.10; Tia 5.14
Jesu fii bi tinkpiba siiga
(Mat 28.1-10; Mak 16.1-8; Jan 20.1-10)
Tans Gekies:
LUKA 23: GUX03
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gulmancema Bible © Bible Society of Burkina Faso, 2003.
