Nte 10

Fetero na Korinelio

1Kuuko uKaisaria arë urëfo muntu uguëtaanwa Korinelio, müküü wa iburi ra asikai nërëutaanwaa iburi ra Gëitalia. 2Mweeso arë muntu wa dini na arë umwoghofete Muungu itambëëmwe na antu voong'e va ukhaakwe. Mweeso arë ugufunyaa dahwa nyingë gwa nkhoo ëmwe gwa antu, na uguromba tëkëtëkë kunë Muungu. 3Itungo ra yuva a mpëndë saa a kenda agamwona daaji undoti malaëka wa Muungu arë ugwingëa mung'ë na agahanya, “Korinelio.” 4Na mweeso agamukhamëchëya miho gwa choghofi agahanya, “Gwinantuni, Müküü.” Na mweeso agamusucha, “Marombi ako nanë dahwa yako yanatëe gunto na atendekie gëmanyëko usonge a Muungu. 5Na itungwee tuma antu vende uYafa na umweeta Simioni nëuguëtaanwa Fetero. 6Mweeso ufikëe u nyumba amwa Simioni, mufari mëkunja, nëëumpeo a irambo.” 7Itungo në malaëka arë ugurighëëtya inakwe wenda, agavaëtana atumami vavëë mukhatë a atumami vakwe na musikai në muhuvëi tutë tuutë mukhatë a vasaa nëvëumughojaa, 8naarë waadonea mantu oong'e kunë veeso, agavatuma vende uYafa.

9Fadiu ayo, naarë këë vëumuhënjo na vahumbea fifë a muji, Fetero aganantëa unto a nyumba a gunto uromba itungo ra malëjanga. 10Na mweeso agahumwa na njaa na agahunukwa intu ra ulya. Ëgweeso itungo nënaa veeso këë vëuning'anëya malëwa, nkhoo akwe ëgamuntëka na agagwa fang'ë. 11Mweeso agaona irunde rërughukie na gëfe gëusima fang'ë, gënya mwenda në üküü, ugusimiwa fang'ë gwa mafembu ayo ane. 12Mung'ë ayo arë arëfo makhakho oong'e a maimwana na nëigiutuuta nanda nanë nyonyi ya unto. 13Na ruri ugamujëa uguhanya, “Fetero uka; uuraghe na ulie.” 14Ëgweeso Fetero agahanya, “Veve, Müküü, gusoko kamwe ntinalia gëkaku gëntu në gëvë na mbesa giikhwe.” 15Na ruri ugamujëa kangë muhënjo wa gavëë, “Në Muungu wayaoyiye, veve utinoneye uyaëtana ëikhwe.” 16Gëntu ëkëë gëgadwëëra mëhënjo ëtatu, na mwenda wasuu ugasuchwa unto girunde.

17Itungo në Fetero arë këë utakëte gëng'ëng'ë mwino ndoti unë arë wamëonaa ina ryana kë, rarava, antu nënaa vatumwaa na Korinelio, vëmëkie usonge a gënyamwango, vëuwëya nyumba amwa Simioni. 18Vëgaëtana unji vëuwëya mbesa Simioni nëuguëtaanwa Fetero mpa ufikëë fafo. 19Itungo naarë Fetero këë ugumërinkhanëya ndoti, Mwahu Mweru agamwëëra, “Rarava, antu vatatu vëugufenja veve. 20Uvii uka na usime fang'ë mwende mwinao utaje wisaghasaghëe; gusoko nene navatumaa.” 21Na Fetero agaenda uvahanga antu vasaa agavaëra, “Nene uu muntu wasuu në nyenye mumufënja soko kë në nyenye mwaja?” 22Na veeso vëgamusucha, “Korinelio, müküü wa iburi ra asikai, muntu nëughookie nanë umwoghofete Muungu, unë ndughu oong'e a Ayahudi vëumurighëëtya vija, waraghëëywa na malaëka në mweru ugutuma sese kunë veve uje ukhaakwe na ategheeye ntuni në veve ugumukhanëa.” 23Uvii mweeso agavaëtana mung'ë vëtende aghenyi vakwe. Fadiu ayo mweeso agauka na agaenda itambëëmwe inawe, na ahuvëi vëgëtunga ufuma uYafa vëgakhuvëa inawe. 24Na itiku nërëhongie veeso vëgafika uKaisaria. Korinelio arë uvaindëe veeso na arë waraëka itambëëmwe anyandughu vakwe nanë anyambuya vakwe. 25Naarë Fetero waingëa, Korinelio agatang'ana inakwe na agagwa fang'ë a mëghuu akwe na agamukurya mweeso. 26Ëgweeso Fetero agamuhumbua gunto, uguhanya, “Imëka, nenenoo në muntu gutufu.” 27Na mwino mweeso arë ugurighëëtya itambëëmwe inakwe, mweeso againgëa mung'ë na agahanga antu vaingë vihangwëëye. 28Na mweeso agavakhanëa, “Nyenye aghonjo mumanyie mwino seria a Ayahudi ëghiiye Muyahudi uhangënkhana na mbesa uvasoya antu va ndughu ingëja; ëgweeso Muungu wandaghëe nene mwino taje nëmwëtaane muntu nanë umwedu atinoneye na mbesa wëikhwe. 29Uvii itungo nëaja nene natumwa, najie na ntinahitaa. Uvii nene ngumuwëya, asikë në nyenye mwanjëtana nene?”

30Na Korinelio agasucha. “Matiku ane nëakëa, itungo mwino ërëëre ra saa a kenda arë nguromba ukhaane. Na raava, nëgaona muntu wimëkie usonge ane uyaëte masaa nëufëmpëna, 31uguhanya, ‘Korinelio, marombi ako ategheeywe na dahwa yako ikumbukiwe usonge a Muungu. 32Gwa uvii tuma antu uYafa na umwëtaana Simioni unë uguëtaanwaa Fetero; mweeso ufikëe u nyumba amwa Simioni, mufari wa mëkunja. Nyumba asëë ëumpeo a irambo.’ 33Uvii genyahafo nene nëgatuma antu kunë veve, na veve watendaa vija uja. Gwa uvii itungwee sese soong'e gwëafaa usonge a Muungu utegheeya oong'e në veve waraghëëywe na Müküü.”

Matanantyo amwa Fetero

34Na Fetero agarakanua momo wakwe na agahanya: “Tutë namanya mwino Muungu uguraghëëra mwino mweeso atiubaghua, 35ëgweeso muu ndughu gëkaku muntu wasuu nëugumwoghoofa mweeso na utenda tutë uguyanjiwa na mweeso. 36Nyenye mumanyie ukhani në mweeso waatoere va Isiraeli, utanantya sayu në njija a majëghana gwa njëa amwa Yesu Kiristo (mweeso në Müküü wa antu voong'e). 37Ukhani wasuu atumami vautanantiye ung'ë oong'e a uYuda, uandëëya ufuma uGalilaya në arë ubadiso wakëa në Yohana wautanantiye: 38mwino Muungu wamwirye Yesu wa uNasareti makuta a Mwahu Mweru itambëëmwe na udaho; mwino mweeso agaenda uko na uko utenda ija na uforya voong'e nëvaonewe na ibilisi gusoko Muungu arë wëitambëëmwe na mweeso. 39Na sese gwë masudanga vakwe va ntendo yoong'e nëwaitendie ung'ë a Ayahudi na uYerusalemu. Veeso vamuuraghie mweeso gwa umukhoma unto a mutë. 40Ëgweeso Muungu agamufëtya itiku ra gatatu na umutenda mweeso adwëëre; 41tiese gwa antu voong'e ëgweeso kunë sese në Muungu waguhwaniye mwino va masudanga vakwe, në gwalile na unywa itambëëmwe na mweeso naarë wafëtya ufuma gwakuyi. 42Na mweeso waguraghëëye sese utanantya sayu në njija gwa antu voong'e na uvasudangëa mwino mweeso Muungu wamuhwaniye atendeke muramwui wa antu në afanga nanë vëkure. 43Kunë mweeso anyagëdaghu voong'e vasudangëe mwino mu muntu nëugumuhuvëa mweeso uguhanga iheeywa ra mahutye gwa rina rakwe.”

Korinelio na Antu Vakwe Vamusëngëëya Mwahu Mweru

44Itungo rasëë në Fetero arë këë urighëëtiye nkhani yasii, Mwa Mweru agavasimëa voong'e vasaa në arë vategheeya ukhani wasuu. 45Na ahuvëi ufuma mukhatë a vasaa narë vatowe ihungu unë arë vaajie itambëëmwe ina Fetero vëgataka, gusoko Muungu waakununtëe antu nëti Ayahudi gëfewa ga Mwahu Mweru. 46Gusoko veeso vëgategheeya vëurighëëtya gwa ndëghëtya hiya hiya na vëumukurya Muungu. Uvii Fetero agahanya, 47“Anyu nëudahëte ughiiya majë gusoko antu avai vabadiswe nëvamughenyifa Mwahu Mweru mwino chu sese?” 48Na mweeso agaraghëëya veeso vabadiswe gwa rina ramwa Yesu Kiristo. Uvii veeso vëgamwomba asaghe inao matiku ëgëtunga.

Tans Gekies:

Nte 10: RNT

Kleurmerk

Deel

Kopieer