Marko 12
12
1Khu hwane, Jesu a di phela gu ganela vbakari gwawe khu sipimaniso, khuye: “Muthu nya gukari a di yala lithembwe nya miuvha, a li bhiya, a gira gikhwathi, a vbaha gitezi, na vbedzide, a di tshiyedza valimi, a endra a gu hongola hwindzo. 2Na yi vbohide nango nya guvbwere, a di rumela githumi gyaye ga valimi vale gasi guya hakha gwawe mihandro nya lithembwe. 3Aholu, avo va diya gi mola, va gi veta, va gi bweledza nyambana gilo. 4A di va rumela gimbe githumi; avo va diya gi pandra phandza hungoni ni gu gi tutumisa. 5A di rumela gambe gimbe, vaya gi songa. Khavbo avbo, a di va rumela simbe nya singi, gasi avo va di si veta, simbe va si songa. 6Na tshaledwe basi khu mwamana waye nya gigodwa, a di mu rumela, na gu alakanya gukhuye: ‘Va na ya ninga githawo mwamana wangu.’ 7Aholu valimi va di embeledzelana khu gyawe, khavo: ‘Khuye oyu a na tshalago ni thomba, hongoleni hi mu songe, hifela gu tshala nayo ethu.’ 8Va di mu mola, va mu songa, va mu dzudzuga vbavbandze nya lithembwe. 9Ginani a na girago mune lithembwe? Khu lisine, a na wuya a ta mbembisa valimi vale a dzega lithembwe a tshiyedza vambe valimi. 10Ina mu si gu hevbuli Milowo yi gu, khiyo:
Giwindri gi nga nyenywa khu vavbahi
khigyo gi khadego hungo nya gikoli nya nyumba.
11 # Wona gambe: Dzind 118:22-23. Satshavbo sesi sigiro sa Pfhumu,
gambe siliwugiso mahoni gwathu!”
12Na va dzitide nya gukhavo gipimaniso gyogyo gya gu thula avo, va di vbweta ndzila nya gu mu mole, aholu, khu gu thava gidzemo, va di mu diga va hongola.
Gukhupha ga Sezari
(Matewu 22:15-22; Luka 20:20-26)
13Va di mu rumela Vafarisi nya gukari ni va na Herodhi gasi guya mu riya khu magana nya gukari. 14Na va vbohide, va di khavo: “Muhevbudzi, hi ngu dziti nya gukhethu u muthu nya lisine, khu thavi muthu kholu khu khedzi giemo nya muthu, aholu wa gu hevbudza ndzila ya Nungungulu, kha nga idzo li lombago khidzo lisine. Hi na ni fanelo nya gulivbe khupho ga Sezari mwendro hi mwalo? Hi livba, mwendro hi nga livbi?”
15Aholu Jesu, na wutide wuhephi wawe, a di va hakha, khuye: “Mwa gu nyi lingela ginani? Nga nyi yeyedzani tsapawu yakone nyi yi wona.” 16Na va mu ningide. A di va wudzisa, khuye: “Gasi gifananiso ni milowo yeyi khya mani?” Va di khavo: “Khya Sezari.” 17Khavbo avbo, Jesu a di va embela, khuye: “Ningelani ga Sezari esi si gu sa Sezari, ni ga Nungungulu esi si gu sa Nungungulu.” Va di samadziswa ngudzu khuye.
Giwudziso khu guwuga ga vafudego
(Matewu 22:23-33; Luka 20:27-40)
18 # Wona gambe: Mith 23:8. Khavbo avbo, Vasadhusi tsawa nya vale va ganedzago guwuga ga ava va fudego, va di hidzimela vata mu wudzisa, khavo: 19#Wona gambe: Dhet 25:5. “Muhevbudzi, Mosi a hi lovede gukhuye a gufa mwama a tshiya noni nyambana sanana, ndriyaye a na hambela namu waye, gasi gu wusa ndranga ya mufi. 20Va diromo livbandre na vavili vandruye. Koma wakone a di dzega nyamayi, afa nyamba tshiya sanana. 21Oyu nya wuvili a di hambela namu waye, afa nuye nyamba tshiya sanana. Ga oyu nya wuraru gu di girega gambe kharato. 22Vatshavbo nya livbandre na vavili va difa nyamba tshiya sanana. Khu guhegisa a difa nuye nyamayi wule. 23Khu litshigu nya guwuge khu gufani, nyamayi wule a na lumba mani, olu a nga khala mwangadzi wa vatshavbo nya livbandre na vavili?”
24Jesu a di va hakha, khuye: “Ina khandri mwa gu kanganyisega khu gumba pimani milowo ni tshivba ya Nungungulu, gani? 25Kholu, khu gikhati nya guwuge khu gufani, vama kha va na dzega, ni vanyamayi kha va na dzegwa, aholu vatshavbo va na khala kha nga dzingilozi dza Ndzadzini. 26#Wona gambe: Eks 3:6. Nari khu mahungu nya guwuge khu gufani kha mwa hevbulani libhukuni la Mosi, avbo Nungungulu a nga ganelago naye umo nya gipopwana, khuye: ‘Eni kheni Nungungulu wa Abrahama, Nungungulu wa Isaki, Nungungulu wa Jakobe’, gani? 27Khandri Nungungulu nya va nya gufa, aholu Nungungulu nya va nya guvbanya. Mu dzimede ngudzu!”
Nayo nya guhegule
(Matewu 22:34-40; Luka 10:25-28)
28A di vboha moyo nya muhevbudzi nya Nayo, a nga vapwago na va gu ganedzisana. Khu gu wona gukhuye Jesu a va ningide phindrulo nya yadi, a di hidzimela a gu mu wudzisa, khuye: “Khu wevbini nayo nya guhegule ga yatshavbo?” 29Jesu a di mu hakha, khuye: “Nayo nya guhegule khoyu: ‘Upwa Israyeli! Pfhumu, Nungungulu wathu, khuye enga basi a gu Pfhumu. 30#Wona gambe: Dhet 6:4-5. U na gola Pfhumu Nungungulu wago khu monyo wago watshavbo, khu hefemulo wago watshavbo, khu mapimo yago yatshavbo ni tshivba yago yatshavbo.’ 31#Wona gambe: Levh 19:18. Nya wuvili khoyu: ‘U na gola muthu kwanu nga edzi u dzi golago khidzo uwe mune.’ Mwalo wumbe nayo nya khongolo guvbindra eyi ya mivili.” 32Muhevbudzi nya Nayo a di khuye: “Khidzo, Muhevbudzi! U ganede gwadi khuwe Nungungulu moyo basi, mwalo mumbe vbavbandze gwaye; 33#Wona gambe: Hos 6:6. ni gukhuwe gu vbwetega gu mu gola khu monyo watshavbo, khu mapimo yatshavbo, khu tshivba yatshavbo, ni gukhuwe gu gola muthu kwanu nga edzi u dzi golago khidzo uwe mune, gu ngu phasa guvbindra miningelo ni dzimhamba dzatshavbo.” 34Jesu, na wonide gukhuye phindrude khu mapimo nya guti, a di mu embela khuye, “U mwalo hwindzo ni Mufumo wa Nungungulu.” Gukhugela avbovbo mwalo gambe a nga tiya gu mu wudzisa silo.
Kristo gyanana gya mani?
(Matewu 22:41-46; Luka 20:41-44)
35Jesu a di simama gu hevbudza Nyumbani ga Nungungulu, a di wudzisa, khuye: “Khu ginani vahevbudzi nya Nayo va gukhavo Kristo gyanana gya Dhavhidhe? 36#Wona gambe: Dzind 110:1. Uye Dhavhidhe abune, ganede khu tshivba nya Liphuvbo nya Guage, khuye:
‘Pfhumu a di embela Pfhumu yangu, khuye:
Khala khu nyamudye gwangu
kala nyi vega valala vago
vbavbatshi nya migondro yago.’
37Olu Dhavhidhe abune a mu ranago Pfhumu, gu ngu kodzega kharini Kristo gu khala gambe gyanana gyaye?” Gidzemo gyatshavbo gi di mu yingisa khu gutsaka.
Jesu a ngu gengedza vathu
(Matewu 23:1-36; Luka 20:45-47)
38Jesu na gu hevbudza a di va embela gambe, khuye: “Dzi woneleni ni vahevbudzi nya Nayo. Va golago gu ambala dzingandzu nya gulaphe, ni gu loswa khu githawo khu vathu mitendrelani; 39ni gu khala malangani nya guhegule dzinyumbani nya nombelo ni omu nya sipfhitsha. 40Va gu phanga dzinoni mu dzindrangani dzawe, na va gu pfhadza khu gu gira milombelo nya gulaphe. Va na hakha tsayiso nya guvbindrise.”
Ningelo wa noni
(Luka 21:1-4)
41Jesu na khade vbafuvbi ni wulanga nya ningelo wa Nyumbani ga Nungungulu a di khedzisela edzi vathu va nga bani va gu thela khidzo dzitsapawu gyomboni; sitetema nya singi si di ningela dzitsapawu nya gutale. 42Aholu a dita nyamayi moyo nya noni nya gisiwana, ata thela nuye singerengere sivili si ninganago likhumi tsapawu. 43Jesu a di rana vapizane vaye, khuye: “Khu lisine nyi ngu mi embelani gukheni noni yeyi nya gisiwana yi ningede guvbindra vatshavbo va ningedego. 44Kholu avo va di ningela esi si nga va tshalelago, aholu iyo yi di ningela satshavbo yi si thembago muwusiwanani gwaye.”
Tans Gekies:
Marko 12: BGG2014
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gitonga DC Bible © Bible Society in Mozambique, 2014.
