LAKSASIKE 9

9
Saùlùt oabùt hebelagaike wene
1Atì'nogo hagato kolek he, at saùlùt a'nogo a'mage lagalìk he, apùnì ninoe Etagepogot ane wanhukwa mene amanogo inoasigìlùk weim abok a'la logolìk ho, it ap Ala esewerek mene inoe kain mene oba kìlìk mel yogosike:
2“Noe. An o Tamìsìk lapik he, it apùnì aike Yesùt ane wanhì logolìk opolik nùgì mene aike werek halok, hìmì lek, ap lek, heraginabìk he, ineki hele warogo wogisek o Yerusalem yoma hisa wesik en he, it apùnì Yahuri meme o kota Tamìsìk atoma o sapan egarek obakwe lopok atogorì'lùgì mene hesik surat aike waganogo wo'nom o,” ìlùk yogosike. 3Atì'nogo yogosikomo, wogosikomo re, waga lagaikesik, o kota Tamìsìk atoma horok hogo kigin ha'ma re, pogot oba nen aike omake hesigat, at era'lukwe apipin lìarogo yasi pi wagaike. 4Yasi pi waganem he, at Saùlùt a'nogo kweangma tukwak hogo lagaike. Laganem he, at aike nen yogotì logolìk he,
“Saùlùt. Saùlùt. Anat yì aik tì aik haga'nabigìlùk mù'narek nìkì lagen atì nahalok,” ìlùk yogosike. 5Atì'nogo yogosikomo, at Saùlùt en he,
“Noe. Hat sa,” ìlùk yogosikomo, at en he,
“An Yesùt. Hat en yì aik tì aik haga'nabigìlùk mù'narek nìkì lagen mene a'nogoat o. 6Hebe mela'lùk he, o kota arì lìlìk kìno. Kikenem ap aike nen,
Hat tì'nogo haga'no, ìlùk yogohesigin mene werek o,” ìlùk yogotenem, 7it ap at inom wagaukwa mene amanogo inasuk holhukwasik he,
“Ap ebe kì nen ane ike,” ìlùk ineil isukwa mene, ebe lek en ina'maken lagaikesik inane usak mea agaikomo kamo isukwa. 8Atì'nogo werek kolek, at Saùlùt a'nogo melagaikesik, eileken hekenagaike meneat he, yì mene tì mene eileken lakhasak motok mea agaike. Atì'nogo mea agaikomo, eki hagasogo o Tamìsìk wolok kisukwa. 9Wolok kisukwama, eki hlnagan logolìk he, yì mene tì mene eileken hìgì'legat, sùpùrùk mel, i mel, nìkì'legat motok welagaike.
10Werek kolek, o Tamìsìk atoma ap aike ninoe Etagepogot Yesùt ane wanhike mene etage Ananiat welagaike. Were'ma, ninoe Etagepogot en he, abìkakan oba mel yogosike:
“Ananiat,” ìlùk ane hakhikenem, at en he,
“O? Noe. Nebe yì welagì,” ìlùk isike. 11Isikomo re, ninoe Etagepogot en he, mel yogosike:
“Hebe siak hogo mel arìk he, kwe etage Higitkwe ìlì'lùgì atìkwe lano. Lìlìk he, o ap Yùrat were'ma ki lìlìk, hat en he,
Ap etage Saùlùt, aua Tarasùt mene a'naga, yoma werek a? ìlùk hinok wogisano. At ebe sapan ìlì'logo a'naga. 12Sapan atì'nogo ikenem, at abìkakan mel hikomo. Hat Ananiat hebe re, at oba ki lìlìk en, eileken hekenasuagalùk heki oba sebelhenem abìkakan hikomo a'naga,” ìlùk yogosike. 13Atì'nogo yogosikomo, at Ananiat en he,
“Noe. Apùnì nen he,
Ap atì nen, hat hagainapùrì o Yerusalem mene yì aik tì aik hagarinabì'logo, ìlùk inebe logolegat en ikenem abok nasuk holhìrì'mo nen, 14yogotak he, o yoma wìrìk, apùnì hat hetage palogo hayoko hìlì'lùgì mene hùgì obogat, ineki hele wasuagalùk he, it ap Ala esewerek inogogì kaintek amanogo nen yogotama wagasik werek atì,” ìlùk yogosike. 15Atì'nogo yogosike meneat he, ninoe Etagepogot en he,
“Lan o. At en he, apùnì etakwe mene mel, inogogì inetagepogot mene mel, apùnì Isirael mene mel, an netage yogoisìlìk nìkì logouagalùk, an nen ap atì ebe weteberogo ayoko hìgìma o. 16Atì'nogo ayoko hìgìrì'mo re, at en netage atì'nogo yogoisìlìk nikenem, at yì aik tì aik hìkì logousak obaat hìkì logogin mene, an nen yogosigin werek o,” ìlùk yogosike. 17Atì'nogo yogosikomo, at Ananiat a'nogo lagaikesik he, ouma kìlìk, eki Saùlùt oba sebelhì logolìk he, mel yogosike:
“Saùlùt, nagaiyak. Ninoe Etagepogot Yesùt, hat o yoma wesigìlùk kwe ba waganem, helokoma melagama, heileken hegen mene a'naga nen, hat heileken hekenagìk, Ala Areagùn ha'la peserogo ki wagìk, uagaluk lakhani wagama wagì o,” 18ìlùk yogotenem aremnogoat, at eileken oba hìlìk welagaike mene nokok hogo pìlìk he, eileken hano agaike. Hano arìk, ebe mel agaikomo re, ima pelakhesike. 19Ima pelakhesikomo re, sùpùrùk nìlìk omame agaike.
At Saùlùt en wene apùnì o Tamìsìk mene yogoisìkì lagaike wene
At Saùlùt a'nogo o Tamìsìk logolìk, apùnì ninoe Etagepogot Yesùt ane wanhukwa mene inom ineki hamùlùat welagaukwa. 20Atì'nogo welagaukwa atem sat, o it apùnì Yahuri mene sapan ìkì lagaukwa bakwe kìlìk, wene Yesùt hesik yogoisìkì logolìk he,
“At Yesùt atì, ebe Ala apurat o,” ìlùk yogoisìkì lagaike. 21Yogoisikenem he, it apùnì inasuk holhì lagaukwa mene atì, inebe obogat inayùk arìk he,
“Ap yì o Yerusalem logolìk, apùnì obogat at Yesùt atì etage palogo ayoko hìlì'lùgì mene inebe motok yeloken tagalogo legetsagalùk hagatì laga a'nogo ebe yì lek nogo? Ebe yìat akìgì. At yoma wìrìk he, it Yesùt etage palì'lùgì mene atì, ineki hele warogo, it ap Ala esewerek inogogì kaintek mene inoba wogisek lagalùk waga lek nogo? Nayùk e,” ìlùk hogoratì lagaukwa. 22Hogorato kolek he, at Saùlùt en, ane omamerogoat ina'la kagalhì logolìk, mel yogoisìkì lagaike:
“Ala nen he,
Ap aike telhinabuagalùk lakhei wesigin, ìlùk wene wa'nisasike a'nogo ebe re, Yesùt atìat o,” ìlùk pak hogoat yogoisikenem, eberogoat agaikomo re, it apùnì Yahuri mene o Tamìsìk welagaukwa mene atoma nen oko nena u heat inoake palaga lagaike.
23Atì'nogo logolìk, ineki apigat welagaukwasik en, Saùlùt ebe wasuogolùk weim abok hinagasogo isukwa. 24Atì'nogo isukwama meneat he, it apùnì aike nen Saulùt hùsipi yogosukwama at elu agaike. Atì'nogo elu werek kolek, ap amanogo nen at ebe ebekwe leget pa'leget ape pale'ma wùlùpenem he, wasuogolùk hùako likene kagalek motok welagaukwa. 25Kagalek werek kolek, it apùnì Saùlùt ane wanhì lagaukwa mene nen he, o hùako aike sapùl, at ebe mul ugu mene a'la kalhìlìk he, leget pa'leget uan wùrìk oba ako aike pokwe holelek were'ma wulakhìlìk he, kopì kelogo leget aphane pelakhesukwa.
At Saùlùt o Yerusalem pisikesi'mo hagasukwa wene
26Atì'nogo pelakhesukwama, at Saùlùt o atoma nen o kota Yerusalem pìlìk he, it apùnì aike Yesùt ane wanhì lagaukwa mene inom omakìma lapuk hogo logouogolùk walhasike meneat he, it obogat en,
“At eberogoat Yesùt ane wanhesik en ìlì'logo,” ìlùk hùthìgì'lek en, at ebe inayùk welagaukwa. 27Atì'nogo werek kolek, at Parenapat en Saùlùt ebe wanhikesik wolok he, it ap Yesùt en inebe weteberogo inayoko hìlìk laksasike mene amanogo aike inoba lagaike. Wolok lìlìk he, mel yogoisasike:
“Ap yì re, kwe ebekwe laga logolìk, ninoe Etagepogot eileken hasikomo, at en wene tì'nogo yogotomo nen, at ebe o Tamìsìk logolìk, ayù'legat Yesùt etage palogo wene pak hogo yogoisìkì laga mene wolok wagì o,” ìlùk pìlìngìrogo yogoisasike. 28Atì'nogo yogoisasikomo, at it inom hano nek o Yerusalem ya ta nìkì logolìk he, ayù'legat ninoe Etagepogot Yesùt etage palogo wene pak hogoat yogoisìkì lagaike. 29Yogoisìkì logolìk he, it aike inebe Yahuri meneat he, inane Yunani mene inane ìkì lagaukwa mene wene yogoisikenem, it en hinok wanhenem, oko yogoisìgìk ikenem he, ebe wasuogolùk walhìkì lagaukwa. 30Wasuogolùk walhiko kolek, it Ala againapùrì it-it inerùgì inagaiya'lak inom omakeat mene aike nen, Saùlùt ebe o Kaisarea wolok wagaukwasik he, atoma nen o Tarasùt lagai wesuagalùk lakhei wagaukwa.
31Atì'nogo hagasukwama, hobuk en he, it apùnì Ala againapùrì o propinsi Yurea mene mel, Kalilea mene mel, Samaria mene mel, weagarinapì'lek hano lìok hogo welagaukwa. Were'ma, Ala Areagùn nen leberisikenem, inetaùken wurik agìk, ninoe Etagepogot inayùk hogo welagìk, ìkì logolìk he, inebe apik seik-peik ìkì lagaukwa.
Peterùt en ap Eneat ou hagatìk, he Torekat wa'lagaike mene eluguthìgìk, isike wene
32Nen, at Peterùt en Ala againapùrì mene o ya ta eileken isìlìk laga lagaike. Atì'nogo laga lagaikesik eki aike sapùl he, it Ala againapùrì o Lìra welagaukwa mene eileken isa pisike. 33Pisikesik he, ap aike etage Eneat. O hageat en esok wùt warek motok logolìk he, mo lagagìk pìgìk iko kolek 8 tahun weitek motogat welagaike mene, atì'nogoat were'ma, eileken hasike. 34Eileken hìlìk he, mel yogosike:
“Eneat nagaiyak. Yesùt Karìsùt en hagathape o. Halok, melarìk he, hebe talogo nogo ìkì lagen mene aroma ìkìlogo hein o,” ìlùk yogoto kolek, aremnogoat siak hogo melagaike. 35Melagaikomo re, it apùnì o Lìra mel, Saron mel, welagaukwa mene obogat en ineileken hìlìk he,
“Eberogoat,” ìlùk inoabùt hebelarìk inelokwe ninoe Etagepogot wogosukwa.
36O Yope atoma, he aike etage Paik ìlùk, apùnì Yunani mene inane ba etage Torekat u hak, it inane ba Tabita ìlùk ìkì lagaukwa mene welagaike. At he atì, ninoe Etagepogot Yesùt ane wanhikesik, yì mene tì mene hano hagatì logolìk, apùnì inekim lek inelageik mene leberisiko motok welagaike. 37Atì'nogo hagato were'ma, atem sat ou wanhikesik en ebe wa'lagaikomo re, ebenakwe sobalogo o hùlùpo hei lagasukwa. 38Atì'nogo hei lagasukwasik werek kolek, o Yope atoma nen, o Lìra atì horogatma re, it apùnì aike nen,
“Peterùt ebe o Lìra wagasik werek o,” ìlùk ikenem, it apùnì Yesùt ane wanhukwa mene amanogo inasuk holhukwasik he, it ap inebe pìre Peterùt ayoko loagalùk, mel yogoisasukwa:
“Hit lìlìk he, Peterùt mel yogo'no:
Halakwe abìrogo welagì'lek ninom hepok luok o, ìlùk yogo'no,” ìlùk lìaksa wagaukwama lagai wagaukwasik, yogosukwama, at Peterùt en he,
39“Ì o. Halok he, puok,” ìlùk inom pisukwa. Pisukwasik he, Peterùt ebe wolok hùlùpo inom lagasukwa. Hùlùpo lagalìk were'ma, it hìmì soge mene at oba horok hogo atogosi wagaukwasik, le aga logolìk he, su eilemkwe mene lek, etakwe uan mene lek, he Torekat eluk oba inom logolìk, karisasike mene ìnùkhasukwa. 40Ìnùkhasukwama re, at Peterùt en ineba obogat wulaksìlìk, eitep awì yagasogo sapan isikesik en, elokwe hebek hogo warek a'nogo wogorìk he,
“Tabita. Melame o,” ìlùk yogosike. Yogotenem, aremnogoat eileken hekenaìk he, Peterùt ebe eileken hìlìk melagaikesik alakwe yamuk hogo hù'lagaike. 41Hù'lagaikomo, at Peterùt en eki hagasogo menhìlìk he, it Ala againapùrì aike mel, hìmì soge mene amanogo mel, waisasikomo kisukwama re,
“At ebe eluk aga yì,” ìlùk wogisasike. 42Wogisasikomo re, wene haga'lagaike atì, it apùnì o Yope atoma mene inebe obogat inelu agaukwasik he, inebe logolegat inetaùken ninoe Etagepogot Yesùt oba hìpìrethesukwa.
43Atì'nogo hìpìrethesukwama, at Peterùt a'nogo o Yope atoma logolìk he, ap Simon yì wam tì wam ogat nokolek mene pùgùthìkì lagaike mene atì aua eperak ineki logolegat welagaukwa.

Kleurmerk

Deel

Kopieer

None

Wil jy jou kleurmerke oor al jou toestelle gestoor hê? Teken in of teken aan