LAKSASIKE 8
8
“Noe. Ap an weaga'napa mene yoma, ùkùm inoba hùgùn o,” ìlùk yogosikesik ebe arat wa'lagaike. 1At Sitepanùt ebe motogat wasukwa atì, at Saùlùt a'la nen hano akasike.
Saùlùt en Ala againapùrì o Yerusalem mene yì aik tì aik hagarinapì lagaike wene
At Sitepanùt ebe wasukwa atì likeat he, it Ala againapùrì o Yerusalem atogotì lagaukwa mene inebe yì aik tì aik weak hogo hagarinapo kolek be, it ap Yesùt en inebe weteberogo inayoko ìlìk laksasike mene amanogo nek, o Yerusalem werek kolek he, Ala againapùrì aike inebe hùkokwe obogat pùgùlogo re, o propinsi Yurea Samaria ya ta atoma mùk hogo wulaksasukwa. 2Atì'nogo wulaksasukwama, it apùnì Ala ane hologo hagatì lagaukwa mene aike nen he, Sitepanùt a'nogo ebe warek kweangma salhukwasik ha, ouak la apik aga lagaukwa.
3Ala againapùrì atì'nogo wulaksìkì logolìk, at Saùlùt a'nogo Ala againapùrì mene wùlì tagalinabigìlùk he, inauakwe lopok ya kìgìk, ta kìgìk, ìkì logolìk, ap lek, hìmì lek ineki lisogo wogisek h, o apùnì ineki hele warogo hisagarek oba hisa laga lagaike.
At Pilipùt en hano wene o Samaria yogoisa wagaiko wene
4Atì'nogo hagarinapo kolek, it pùgùlogo lagaukwa mane amanogo o yì awì tì awì laga logolìk he, hano wene a'nogo yogoìilìk pùgùlhukwa. 5Atì'nogo yogoisìlìk pùgùlhì logolìk he, at Pilipùt o kota Samaria atoma wagaikesik, wene mel yogoisasike:
“Ala nen he,
Ap aike telhinabuagalùk lakhei wesigin, ìlùk wene wa'nisasike a'nogo, ebe lakhei wagama wagasik tì'nogo hagate,” ìlùk abok yogoisìkì lagaike. 6-7Wene yogoisìkì logolìk he, it en wene hathoagalùk mokareke inoabùt weak mene apùnì inebe logolegat ina'la kìlìk welagaukwa mene inane hùkorogoat iko kolek henogo wulaksìgìk, it aike logolegat inesok wùt warek mene mel, inesok hapelek mene mel, hagarinapìk, elalinat hagarinapì lagaike. Atì'nogo hagarinapì lagaike atì nen, apùnì amanogo inebe obogat atogorek logolìk, ineileken hìlìk, inasuk tùkùm hogo holhì lagaukwa. 8Atì'nogo hagarinapenem he, it apùnì o Samaria mene atoma, ina'la hai apik hakìkì lagaukwa.
9O Samaria atoma ap wesagùn aike etage Simon welagaike. Hageat on at ebe wesagun logolìk wesarogo hagatì logolìk he,
“Kain wesagùn nebe anat,” ìlùk ikenem he, it apùnì a Samaria mene nen,
“Egi! Nayùk e,” ìlùk, at hogoratì lagaukwa. 10Hogoratì logolìk he, it apùnì kain mene, kepù mene, obogat at ane tùkùm hogo inasuk holhì lagaukwa. Ati'nogo holhì logolìk, it en he,
“Ala omame motok apik ìlùk ìlì'lùgì a'nogo re, ebe yìat o,” ìlùk ìkì lagaukwa. 11Ap atì hageat atoma nen wesarogo hagatì logolìk he, inayùgùthikenem, at ane tùkùm hogo inasuk holhì lagaukwa atì. 12Atì'nogo meneat he, at Pilipùt en hano wene Ala nen awe a'ma hisikerek wene atì yogoisìgìk, Yesùt Karìsùt etage atì yakùlisìgìk, hano wene atì ìkì lagaikomo re, apùnì amanogo nen he,
“Wene atì eberogoat,” ìlùk wanhukwa mene hùgì, ap lek, hìmì lek, ima pelaginapì lagaike. 13At Simon ebe hogo re, inomat,
“Wene atì eberogoat,” ìlùk wanhikomo, ima pelakhesikeat. Atì'nogo pelakhesikesik he, apùnì wene hùthoagalùk, Ala omame ba hagasusak lek mene elalinat hagatenem he, at Simon atì Pilipùt opolik motok nìkì logolìk, eileken hìlìk he, ayùk aga lagaike.
14Atì'nogo hagasukwama, apùnì nen he,
“Apùnì o Samaria mene Ala ane wanha o,” ìlùk ìkì lagaukwama, it ap Yesùt en inebe weteberogo inayoko hìlìk laksasike mene amanogo, o Yerusalem logolìk, inasuk holhukwasik he, Peterùt Yohanet eperak apùnì Samaria mene inoba laksa wagaukwa. 15-16Laksa wagaukwama wagaukwasik he, apùnì o atoma mene nen he,
“Ala ane eberogoat,” ìlùk wanhukwa mene, ninoe Etagepogot Yesùt etage palogo ima nek kerat pelaginapukwama, Ala Areagùn oan inoba pi wagì'lek welagaike atì nen, Ala nen Areagùn wogisoagalùk ayoko hesukwa. 17Atì'nogo Ala ayoko hìkì logolìk, ineki inoba sebelhenem he, Ala nen Areagùn wogisasikomo helasukwa. 18Atì'nogo helasukwama, at Simon eileken isìlìk he, a'la nen he,
“Apùnì re, it ap Yesùt en inebe weteberogo inayoko hìlìk laksasike mene nen, ineki inoba sebelhenem enek he, Ala Areagùn wogisasak hìgì,” ìlùk akasikesik he, Peterùt Yohanet eperak oko wogisagalùk, uang inoba wolok wagaike. 19Wolok wagaikesik, mel yogoisasike:
“An neki apùnì aike inoba sebelhenemm, Ala nen Areagùn atì'nogoat wogisikenem helìkì logouagalùk, an ninomat esewerek asuok en, hit hagatì lagep atì awene yakùlne'ni o,” ìlùk kìno yogoisasike. 20Atì'nogo yogoisìkì lagaikomo, at Peterùt en he,
“Hat ha'la nen he,
Ala oabùt hano nen wo'nisikerek mene atì, oko hìlìk ese asusak, akegen a? Mea o. Atì'nogo akegen atì nen, hat hauang arì alema'lakìgìk, hebe alema'lakìgìk, uak o. 21Ala eilhanem ha'la motok weak ebetì lagen atì nen, nit hagatì lago atì, hat ninom ese asusak lek o. 22-23Hat hoabùt he, it aike inoba ua palhì lagen atì, wam apùkì ale negen ha'la peserek werek. Were'ma, weak hagasigìlùk ha'la ebetì lagen atì nen, hele negen warogo hakharek werek atì, hoabùt hùthììgì. Weak hagasigìlùk egen atì, heraksìlìk, hoabùt hebela'no. Hebelasumo re, hat ha'la akegen atì ninoe Etagepogot en sagalogo legetsoagalùk ayoko heino o,” ìlùk yogosike. 24Atì'nogo yogosikomo, at Simon nen he, mel yogosike:
“Hit egep atì hak, an noba asinogo nen he, an hesik ninoe Etagepogot ayoko heino o,” ìlùk yogoisasike.
25Atì'nogo yogoisasikomo, it Peterùt Yohanet eperak en he, wene inelu mene tùkùm hogo ìkì logolìk, ninoe Etagepogot ane yogoisìkì lagaukwasik, o atoma nen he, hano wene atì, o Samaria o sili logolegat ya yogoisìgìk, ta yogoisìgìik, inapotkwe o kota Yerusalem lagaukwa.
Pilipùt en ap kain o Etiopia mene wene yakùlesike wene
26O kota Yerusalem lagaukwasi'mo re, malaikat ninoe Etagepogot en yoko pelaksa wagarek mene aike Pilipùt oba pi wagaikesik wene yogotì logolìk he,
“Hat hebe siak hogo, kwe o Yerusalem en o Kasa i apùtmo higit pagarekkwe, apùnì inelokwe lekkwe atìkwe pino,” ìlùk yogosikomo re, siak hogoat pisike. 27Pisike hak he, ap aua Etiopia mene aike, apotkwe aua pigìlùk ebekwe pìkì lagaike. Ap atì re, he o Etiopia mene kain etage Katake atì nen, at mena yì mene tì mene hesogo logouagalùk, eki ba hesikomo re, kain welagaike mene. At ebe kain logolìk he, Ala awe a'ma kìlìk, sapan o Yerusalem i lagai wagaike. Lagai wagaikesik he, 28hobuk apotkwe aua pigìlùk, kereta oto hake mene wam kuda nen lisogo wolok lagarek a'nogo mene ba hùrek pìkì logolìk he, wene Ala ane at Yesaya nen yogoisìkì lagaikesik, helal wanhike mene atì etage salìk salìk pisike. 29Atì'nogo salìk piko kolek he, at Ala Areagùn nen Pilipùt yogotì logolìk he,
“Kereta oto hake atì pikenem agap hakha lìlìk oba horok hogo lan o,” ìlùk yogosike. 30Atì'nogo yogosikomo, at Pilipùt humusegat oba pisike hak he, ap a'nogo nen wene Ala ane Yesaya nen yogoisìkì lagaikesik, helal waganogo hesike mene a'nogo etage salhenem he, asuk holhike. Asuk holhikesik he, mel yogosike:
“Noe. Etage salhì lagen atì, wene ebe hùthìkì lagen a? Lek a,” ìlùk yogosikomo, 31at en he,
“Wene atì ebe sa nen sekek hogo yogonesumo nen hathasak,” ìlùk yogosikesik he,
“Hat neperak puok en, ya hù'lasi lagai me o,” ìlùk yogosike. 32#Yes.53:7-8 Yogosikomo, oba hù'lasi lagasikesik eileken hìthasike hak he, ap a'nogo helal mel ìlùk wagane'ma etage salhenem hasike:
“At he, topa wam wasuogolùk wolok lagaikarek atì hak wolok lagaika o.
Wolok lìlìk, topa eak esi paluogolùk ikenem, ane legat kamo ikerek atì hak,
at atì ane aike ìgì'lek kamo ike o.
33At ekalì watìk, elele wanhì'lek weak hogo hagarogo hìgìk, ìkì lagaika atì.
Atì'nogo ìkì logolìk, watenem wa'lagasik ebe kweangma yoma welagì'lek atì nen, apùnì aike nen at en tagokwe mene hesik inabok ìkì logousak lek aga o,”
ìlùk helal waganogo hesikomo were'ma etage salhì lagaike atì.
34Atì'nogo etage salhì lagaikesik he, ap a'nogo nen Pilipùt mel yogosike:
“Wene yì, at ap Ala ane yogoisìkì lagaike mene atì nen isike atì re, at okawerek hesik isike a? At he, ap aike hesik isike a. Hat en wene ebe sekek hogo yogonom, nagaiyak,” ìlùk yogosike. 35Atì'nogo yogosikomo re, at Pilipùt en hano wene Yesùt hagatì lagaike wene yakùlesigìlùk, wene ero helal waganek atì ba nen pìlìngìrogo yogorìk pisike. 36Yogorìk motok ebekwe pìkì logolìk he, i were'ma pisukwasik, at ap kain a'nogo nen he,
“I werek yì han. An ima pela'nabusak akìkì lagì. Ì a? At he, kì mene oan welagì akegen,” [37ìlùk yogosikomo, at Pilipùt en he,
“Noe. Hetaùken omakeat logolìk, Yesùt oba hìpìrethegetik egen halok he, ima pelakhabusagat o,” ìlùk yogosikomo, at ap a'nogo nen he,
“At Yesùt Karìsùt atì, eberogoat Ala apurat o, ìlùk na'la akìgì,” ìlùk yogosike.] 38Atì'nogo yogosikesik he, atitigeke mene nen kereta oto hake kuda nen lisogo wolok pisike mene atì aremnogo menhouagalùk yogosikesik he, Pilipùt eperagat i aik oba pisukwasik, ima kìlìk pelakhesike. 39Ima pelakhesikesik, aik oba wùlìbi waganem, at Ala Areagùn nen he, Pilipùt a'nogo hapok hogo wolok o ninmo hei wagaikomo re, ap kain a'nogo nen Pilipùt ebe hobuk eileken hìgì'lek. Atì'nogo hìgì'lek meneat he, a'la hai hakìlìk kwe pigìlùk pisikekwe a'nogo pìkìt pisike. 40Nen, at Pilipùt Ala Areagùn nen wolok o Asitot atoma hei wagaikomo logolìk, epe hebelagaikesik, o atoma nen he, o sili obogat oumakwe ya kìgìk, ta kìgìk, wene hano wene yogoisìlìk, o kota Kaisarea lagai wagaike.
Tans Gekies:
LAKSASIKE 8: LAIDNI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
