UMOZHIGO 2
2
Ụjita Ucenje
1Gabata azuba keeni unyizo hwuwowu tɛnda, ti iyi elele nɛ zweni nu bwa. 2Agwatana kwunanjɛ ugondu na baa njɛ, nụ ụjita ucenje, nụ ụjita ata ucenje, boo to du ụhinjaŋụ nu ugondu we elele na baa njɛ.#Ehib 4:4; 9:10 3Nazhɛ Agwatana peni ụjita ata ucenje uwebiye, baa njɛ uŋ tijilo, iwɛnɛ ti yaa shɛ nụ ụjita ata baa kwunanjɛ ugondu we elele na baa njɛ, ibɛ po boo to ụhinjaŋụ.
Bụtụ ne Biyikwo ni Itimɛ Idɛn
4Gana na aa njɛ azuba tu unyizo hwɛɛ ta.
Ibɛ shɛ nụ ụjita na AGWANGWAMA na shɛ Agwatana njɛ cɛnjɛ tu unyizo keeni azuba.
5Ambɛ elele keeni i'wɛ'wɛ swoswoswo ta unshɛ shɛ la nu unyizo na aka ata o, iwɛnɛ ta AGWANGWAMA na shɛ Agwatana ta njɛ shɛ la maa eshilo ngbi na cɛnjɛ tu unyizo, bụtụ kaa du ta zasaba la maa bu na hwaŋ itimɛ o. 6Ama uzhikwozhikwo ubwa mwe na cɛnjɛ, wee lemicinji cɛnjɛ kpaaŋ. 7Na aba ibɛ nazhɛ AGWANGWAMA na shɛ Agwatana mo bụtụ#2:7Bụtụ:N-ndumwa ma bụtụ, na cɛnjɛ, mɛ shɛ iyi ike ike na rɛjɛmɛ ra atwa oko i shɛ Adam. nu upwupwutu cɛnjɛ, bee hwulupeni bu ihwungwɛ ni inyɛnu ibwɛ, ibɛ po bụtụ shɛ ya buumwa.
8Nazhɛ AGWANGWAMA na shɛ Agwatana jwe itimɛ ni Idɛn, zalụ bu uwaŋna-banụ, bee shiri bụtụ ata boo mo apata. 9AGWANGWAMA na shɛ Agwatana njɛ maa ga ụ'wụ'wụ we elele na pilanụ igbɛtɛtɛ, tu unaa na zhɛmɛ iwɛ iyimɛyɛ unshɛ. Ụ'wụ'wụ uraiŋ keeni ụ'wụ'wụ na wa nda maa bụtụ mepi iyi ibiye keeni iyi iwɛ shikeni du na ashashɛ itimɛ ɛtɛ.#N-ndu 2:7; 22:2,14,19
10Urefu uko banɛ ni Idɛn maa u no zwogono itimɛ ɛtɛ meni, te kwuni apata woo bogotogwu, waa shɛ erefu eneshi. 11Ɛ hiɛŋ izeci una uko Pison, ubwa shɛ una ata rungwutwonu cɛnjɛ tu Havila no ofwo na azhɛnarɛya namɛ. 12Azhɛnarɛya cɛnjɛ ta ata zhɛmɛ, bdɛlium na shɛ gana utayɛ, keeni onikis namɛ apata. 13Ɛ hiɛŋ izeci Urefu uyebi Gihon, una ata ubwa rungwutwonu cɛnjɛ tu Kush kpaaŋ. 14Ɛ hiɛŋ izeci Urefu ụtatụ Hidɛkɛl, una ata ubwa wa fwunga geri bu uwaŋna-banụ ba Asiria. Ɛ hiɛŋ izeci Urefu uneshi Yufretis.
Ụ'wụ'wụ na Shɛ shɛ Aa Ya
15Nazhɛ AGWANGWAMA na shɛ Agwatana shiri bụtụ ata ni itimɛ Idɛn iwɛ maa bu na hwaŋ iŋ, keeni maa bu na ngbaraka iŋ. 16Nazhɛ AGWANGWAMA na shɛ Agwatana peni bụtụ ata unu, bɛɛ hiɛŋ, M bu leneni maa na ya tụ'walụ ti i'wɛ'wɛ ye elele nɛ namɛ ni itimɛ gɛ na ahaŋsa oko. 17Ama ta ya tụ'walụ tu u'wụ'wụ ata wa nda maa bụtụ mepi iyi ibiye keeni iyi iwɛ kwukwuŋ, iwɛnɛ po nụ ụjita na abɛ yɛ ma tuta bi zhɛ bo 'wo tilɛɛ.
Gana na Aa Njɛ Biyikwo
18Nazhɛ AGWANGWAMA na shɛ Agwatana hiɛŋ, I zhɛshɛ maa butubwenyi nama bwooko gba o, N zhɛ ma ndana bụ bụtụ timbiyono na teni cɛŋ nu bwa.
19Nazhɛ AGWANGWAMA na shɛ Agwatana mo Isundɛ ehilo ye elele, ta shanụnụ sha azuba she elele na cɛnjɛ, bee suje iŋ pa bụtụ ata maa pagana iŋ izeci, izeci elele nɛ bụtụ ata po iyi-uumwa ye elele, asha izeci ibɛ tɛ ya. 20Ibɛ po bụtụ ata po iyimabiga, ta shanụnụ, ti isundɛ ehilo ye elele kpaaŋ izeci, ama bụtụ ata zasa bụtụ bi yebi na teni cɛŋ nu bwa maa bu no mbiyono bu o.
21Nazhɛ AGWANGWAMA na shɛ Agwatana keri bụtụ ata malabụ mụ 'wụtụ, baa vwɛ ikpɛngɛ bụtụ ata tu boo woto malabụ, bee gwuricinje tu'waba bee urigeni. 22Nazhɛ AGWANGWAMA na shɛ Agwatana njɛ biyikwo ni ikpɛngɛ ebe bɛɛ vwɛ na tu'waba ta bụtụ ata, baa shapɛ bụ pa bụtụ ata. 23Nazhɛ bụtụ ata hiɛŋ,
Hwuwayɛ go inɛ gɛ shɛ ya u'umpwo na banɛ no o'umpwo mi,
keeni usunda-tu'waba na banɛ nu usunda-tu'waba mu,
ɛ zhɛ ɛ hiɛŋ bụ,
Biyikwo, iwɛnɛ tɛ ɛ bɛcinjɛ bụ no olugwo butubwenyi.
24Iwɛbɛ po bụtụ ba ganga bishi bwa no bino bwa maa togwu ne biyikwo bwa, maa a shɛ usunda-tu'waba uko.#Mat 19:5; Mak 10:7,8; 1 Kor 6:16; Ɛfɛ 5:31 25Ebe yebi ata namɛ mohondo, ta bụtụ ata ne biyikwo bwa, aba kaa njɛ shɛ ezuye o.
Tans Gekies:
UMOZHIGO 2: RBT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Rubassa Bible © Bible Society of Nigeria, 2008
