လံာ်တၢ်ကဲထီၣ်အခီၣ်ထံး 12
12
ကစၢ်ယွၤအတၢ်ကိးထီၣ်စီၤအၤဘြၣ်
1ဒီးယွၤစံးဘၣ်စီၤအၤဘြၣ်, “ဟးထီၣ်နဲလၢနထံနကီၢ်, နဘူးနတံၢ်အအိၣ်, ဒီးနပၢ်အဟံၣ်, ဒီးလဲၤဆူထံကီၢ်တဘ့ၣ်လၢ ယကဒုးနဲၣ်နၤတက့ၢ်. 2ယကဟ့ၣ်လီၤနၤလၢနစၢၤနသွဲၣ်အါအါဂီၢ်ဂီၢ်, ဒီးအဝဲသ့ၣ်ကကဲထီၣ်ပှၤတကလုာ်ဖးဒိၣ်န့ၣ်လီၤ. ယကဆိၣ်ဂ့ၤနၤဒီးမၤဟူထီၣ်သါလီၤနမံၤဒ်သိးနကကဲ ထီၣ်တၢ်ဆိၣ်ဂ့ၤတမံၤလီၤ.
3ဒီးပှၤလၢအဆိၣ်ဂ့ၤနၤန့ၣ်ယကဆိၣ်ဂ့ၤအီၤဒီးပှၤလၢအဆိၣ်အၢနၤ န့ၣ်ယကဆိၣ်အၢအီၤလီၤ. ဒီးခီဖျိနၤန့ၣ်ယကဆိၣ်ဂ့ၤကယဲၢ်ပှၤကလုာ်တဖၣ်ခဲလၢာ်န့ၣ်လီၤ.”
4ဒီးဖဲစီၤအၤဘြၣ်အသးအိၣ်ဝဲနွံဆံယဲၢ်နံၣ်န့ၣ်အဝဲဟးထီၣ် ကွံာ်လၢဝ့ၢ်ဟၤရၣ်ဒ်ယွၤစံးဘၣ်တ့ၢ်အီၤလၢကမၤဝဲအသိးန့ၣ် လီၤ. ဒီးစီၤလိာ်လဲၤဃုာ်တၢ်ဒီးအီၤလီၤ. 5ဒီးစီၤအၤဘြၣ်ကိးန့ၢ်အမါနီၢ်စၤရဲ, အဖိဒိၣ်စီၤလိာ်ဒီး ကယဲၢ်အတၢ်ဖိတၢ်လံၤဒီးအကုၢ်ခဲလၢာ်လၢအမၤန့ၢ်ဘၣ်ဝဲ လၢဝ့ၢ်ဟၤရၣ်အပူၤဒီးစးထီၣ်လဲၤတၢ်ဆူကီၢ်ကနၤဧၣ်န့ၣ်လီၤ.
ဒီးဖဲအဝဲသ့ၣ်လဲၤတုၤဆူကီၢ်ကနၤဧၣ်အပူၤန့ၣ်, 6စီၤအၤဘြၣ်လဲၤခီဖျိထံကီၢ်န့ၣ်တုၤအဟဲတုၤဖဲသ့ၣ်စီဆှံ တထူၣ်လၢကစၢၢ်မိၤရံယၤ, တၢ်လီၢ်စီဆှံတတီၤလၢဝ့ၢ်ၡက့ၣ်န့ၣ် လီၤ. (အကတီၢ်ဖဲန့ၣ်ပှၤကနၤဧၣ်ဖိသ့ၣ်တဖၣ်အိၣ်ဒံးဝဲလၢကီၢ်န့ၣ် အပူၤလီၤ.) 7ယွၤလီၣ်ဖျါထီၣ်အသးလၢစီၤအၤဘြၣ်ဒီးစံးဘၣ်အီၤ, “အဝဲအံၤမ့ၢ်ထံကီၢ်တဘ့ၣ်လၢယကဟ့ၣ်လီၤနစၢၤနသွဲၣ်တဖၣ်န့ၣ် လီၤ.” တုၤနုၤတစုစီၤအၤဘြၣ်မၤထီၣ်တၢ်လုၢ်လီၢ်ဖဲန့ၣ်ဆူယွၤလၢ အလီၣ်ဖျါထီၣ်အသးလၢအီၤအဂီၢ်န့ၣ်လီၤ. 8အန့ၣ်ဝံၤဒီး, အဝဲသုးအလီၢ်ဆူကလံၤထံးခိခိၣ်ကစၢၢ်ကလိ လၢဝ့ၢ်ဘ့ၤသ့လးအမုၢ်ထီၣ်န့ၣ်လီၤ. ဒီးသူၣ်လီၤအဒဲလၢတၢ်ဘၢၣ်စၢၤဖဲမုၢ်နုာ်တခီဝ့ၢ်ဘ့ၤသ့လး အိၣ်ဝဲဒီးမုၢ်ထီၣ်တခီဝ့ၢ်ဂဲအိၣ်ဝဲဒၣ်န့ၣ်လီၤ. ဖဲန့ၣ်စ့ၢ်ကီးအဝဲသူၣ်ထီၣ်တၢ်လုၢ်လီၢ်တတီၤဒီးဘူၣ်ထီၣ်ဘါထီၣ်ယွၤန့ၣ်လီၤ. 9ဒီးသုးအလီၢ်ဆူညါတတီၤဘၣ်တတီၤဒီးလဲၤဝဲဆူကီၢ်ကနၤဧၣ် အကလံၤထံးတခီန့ၣ်လီၤ.
စီၤအၤဘြၣ်အိၣ်လၢကီၢ်အဲၤကူပတူးအပူၤ
10ဘၣ်ဆၣ်ဒီး, တၢ်သၣ်ဝံၤလီၤဒိအိၣ်ထီၣ်ဝဲဒၣ်လၢကီၢ်ကနၤဧၣ်အပူၤ ဒီးတၢ်န့ၣ်အၢနးမးတုၤဒၣ်လဲာ်စီၤအၤဘြၣ်လဲၤယံၤထီၣ်ဆူ ကလံၤထံးဆူကီၢ်အဲၤကူပတူးလၢကအိၣ်ဝဲဖဲန့ၣ်တစိၢ်တလီၢ်အဂီၢ်န့ၣ်လီၤ. 11ဖဲအဝဲဘူးကခီဃီၤဝဲကီၢ်ဆၢဆူကီၢ်အဲၤကူပတူးအပူၤန့ၣ်အဝဲ စံးဘၣ်အမါနီၢ်စၤရဲ, “နမ့ၢ်ပိာ်မုၣ်အဃံအလၤတဂၤလီၤ. 12တုၤပှၤအဲၤကူပတူးဖိသ့ၣ်တဖၣ်ထံၣ်ဘၣ်နၤဒီးအဝဲသ့ၣ်ကစံးဝဲ, ‘တၢ်အံၤမ့ၢ်အမါလီၤ.’ မၤသးဒ်န့ၣ်ဒီးအဝဲသ့ၣ်ကမၤသံယၤဒီးပျဲမူနၤန့ၣ်လီၤ. 13တဲဘၣ်အဝဲသ့ၣ်လၢနမ့ၢ်ယဒီပုၢ်ဝဲၢ်မုၣ်တက့ၢ်. ဒီးလၢနဃိအဝဲသ့ၣ်ကပျဲမူယၤဒီးကတူၢ်လိာ်ယၤဂ့ၤဂ့ၤဘၣ်ဘၣ်လီၤ.” 14ဒီးဖဲအဝဲခီဂာ်ကီၢ်ဆၢဆူကီၢ်အဲၤကူပတူးအပူၤန့ၣ်ပှၤအဲၤ ကူပတူးဖိတဖၣ်ထံၣ်စဲဃဲၤဝဲဒၣ်လၢအမါန့ၣ်ဃံလၤဝဲန့ၣ်လီၤ. 15ဒီးစီၤပၤဖၤရိၤအပဒိၣ်ဖးဒိၣ်တနီၤထံၣ်ဝဲနီၢ်စၤရဲဒီးတဲ ဘၣ်စီၤပၤလၢအဃံလၤဝဲထဲလဲၣ်န့ၣ်လီၤ. လၢတၢ်န့ၣ်အဃိအဝဲဘၣ်တၢ်က့ၤစိာ်အီၤဆူစီၤပၤအနီပူၤလီၤ. 16မ့ၢ်လၢနီၢ်စၤရဲအဃိစီၤပၤတူၢ်လိာ်မၤဘျုးစီၤအၤဘြၣ်ဂ့ၤဂ့ၤဘၣ်ဘၣ် ဒီးဟ့ၣ်အီၤလၢသိဒီးမဲာ်တဲးလဲး, ဂီၤဖံး, ကသ့ၣ်ယီၤ, ကုၢ်ဒီးကီၤလၤအူးသ့ၣ်တဖၣ်န့ၣ်လီၤ.
17ဘၣ်ဆၣ်မ့ၢ်လၢစီၤပၤဟံးန့ၢ်နီၢ်စၤရဲအဃိယွၤဒုးအိၣ်ထီၣ်တၢ် ဆူးတၢ်ဆါလီၤပျံၤလီၤဖုးလၢစီၤပၤဒီးအပှၤဂီၢ်မုၢ်လၢအနီ ပူၤတဖၣ်န့ၣ်လီၤ. 18တုၤနုၤတစုစီၤပၤကိးန့ၢ်စီၤအၤဘြၣ်ဒီးသံကွၢ်အီၤ, “နမၤတ့ၢ်ယၤလၢတၢ်မနုၤတမံၤလဲၣ်. ဘၣ်မနုၤနတတဲယၤလၢအဝဲမ့ၢ်နမါန့ၣ်လဲၣ်. 19ဘၣ်မနုၤအဃိနစံးလၢအဝဲမ့ၢ်နဒီပုၢ်ဝဲၢ်မုၣ်, ဒီးပျဲယဟံးန့ၢ်အီၤဒ်ယမါအသိးန့ၣ်လဲၣ်. ဟံးက့ၤနမါန့ၣ် ဒီးဟးထီၣ်ကွံာ်တက့ၢ်.” 20ဒီးစီၤပၤဟ့ၣ်လီၤအကလုၢ်ဆူအခ့အပှၤသ့ၣ်တဖၣ်အအိၣ်, ဒီးအဝဲသ့ၣ်ဒုးဟးထီၣ်ကွံာ်စီၤအၤဘြၣ်လၢထံကီၢ်အပူၤဃုာ် ဒီးအမါ, ဒီးကယဲၢ်တၢ်လၢအအိၣ်ဒီးအီၤခဲလၢာ်န့ၣ်လီၤ.
Tans Gekies:
လံာ်တၢ်ကဲထီၣ်အခီၣ်ထံး 12: KSWC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Sgaw Karen Common Bible © Bible Society of Myanmar, 1992.
