Matio 15
15
Nyi̍ɔ̍-a telě bɔ̌ Nyɔsoa naɛ sìì-ɛ
(Maɛ 7.1-13)
1Wɛ̀ Fɛlesii nyɔ̍ ke telě nǎ poe nyɔ̍ sɔ dǒ Juluslɛn u̍h mu̍ dě Jusu we̍. Iě u̍h tèle ɔ̍ i̍, 2u̍h la̍a̍, “Dɛ̍nu̍ àn kòà-a wa̍ à baaᵻá telě ɛ? Dɛ̍nu̍ɛ, u̍h-u dle kwa̍ iě u̍h-a di̍ dɛ̍.”
3Wɛ̀ ɔ̍ la̍a̍, “Nɛ̀ dɛ̍nu̍ mɔ̀-a tù mɔ̀-a nu̍-dɛ̍ᵻá tìh ke wɛ̀ mɔ̀-a wa̍ Nyɔsoa-a telě ɛ? 4Dɛ̍nu̍ɛ, Nyɔsoa la̍a̍, ‘Tè ìn de̍ ke ìn baa ja̍. Nɛ̀ nyɔ̍ jɔ mu̍-a ɔ̍ baa àe̍e̍ ɔ̍ de̍ chlèe-ɛ, nɛ̀ ɔ̍ kɔn ɔ̍ iě dbǎ-ɛ.’ 5Jɛ mɔ̀ la̍ pò nyɔ̍ blě dɛ̍ ɔ̍ iě ɔ̍ de̍ ke ɔ̍ baa nyǐ-ɛ, nɛ̀ ɔ̍ la̍a̍, ‘Dɛ̍ ǎn mu̍-a mɔ̀ nyǐ de-ɛ, ɛ̍ kɔn dǒ Nyɔsoa we̍ wɛ̀,’ pò ɔ̍ nu̍ la̍a̍n-a, nɛ̀ ɔ̍ se̍ u̍h wɔ̍n blaɛ. 6Nɛ̀ mɔ̀-a chɛ̀-a telě-a tìh bo mɔ̀-ɔ tè-o Nyɔsoa-a telě i̍. 7Mɔ̀-ɔ la ùh nɛ-a mɛɔ sɔɔ̌n wɔ̍ɔ̍n-ɛ, dɛ̍ Nyɔsoa-a tu̍owli po̍ nyɔ̍ Asaia bla̍-a dǒ mɔ̀ pùn-ɛ, ɛ̍ blaɛ i̍. Ɔ̍ la̍a̍,
8‘Nyɔ̍ la u̍h-a wɔ̍n-a sǔh bo u̍h-a tè-e ǐn ja̍,
jɛ u̍h-a wlùh ti̍ɛ̍ɛn ǐn we̍ i̍.
9U̍h-a sà ǐn wɛɛ bu̍ɛ̍i̍.
Wlɔ̀ nyi̍ɔ̍-a telě bo u̍h-a poe nyɔ̍ nǎ u̍h-a dǎɛ naɛ̍.’ ”
Ìh la bo ìh-a nyni nyɔ̍ dě Nyɔsoa jlǐh i̍
(Maɛ 7.14-23)
10Wɛ̀ Jusu dǎ nyɔ̍ tlùgbei̍ laa̍ iě ɔ̍ la̍a̍ dě u̍h we̍, “Mɔ̀ pu̍e̍e dounᵻ i̍ wɛ̀ mɔ̀ iě dɛ̍ɛ̍ i̍ wɔ̌n. 11Dɛ̍ ɛ̀ mu̍-a dě nyɔ̍ wɔ̍ɔ̍n-ɛ, ɛ̍-ɛ nyni nyɔ̍ dě Nyɔsoa jlǐh i̍. Jɛ dɛ̍ ɛ̀ sɔ-a dě wɔ̍ɔ̍n-ɛ, ɛ̍ bo ɛ̀ nyni nyɔ̍ dě Nyɔsoa jlǐh i̍.”
12Wɛ̀ ɔ̍ kòà ji̍ dǒ ɔ̍ we̍ u̍h la̍a̍, “Dɛ̍ la àn bla̍-aɛ, wɛ̀ Fɛlesii nyɔ̍-a wɔ̌n-a àn wlu̍-ɛ, nɛ̀ ɛ̍ nyaɛ-a u̍h wɔ̍i̍n-ɛ, ìn se̍ i̍h juo ae?”
13Wɛ̀ Jusu la̍a̍, “Ǐn Baa nɛ-a dě ja̍i̍wlɔ̀-ɛ, dɛ̍ jɛ ɔ̍ chɛ̀ se̍-a tù-ɛ, ɛ̍ mu̍ wlù tlǔn i̍-ɛ. 14Mɔ̀ sà dě u̍h we̍ dounᵻ, u̍h dɔ̌-ɛ iě u̍h-a naɛ dɔ̌-nyɔ̍-ɔ. Pò dɔ̌-nyɔ̍ ja dɔ̌-nyɔ̍-ɔ naɛ-ɛ, nɛ̀ u̍h nɛ-a sɔɔ̌n-ɛ, u̍h-a mu̍ biě gbǎ.”
15Wɛ̀ Pitɛ la̍a̍, “Sèàɛ̍ nɛnǎ la we̍ i̍ dě à we̍.”
16Wɛ̀ Jusu tèle u̍h i̍, ɔ̍ la̍a̍, “Mɔ̀ se̍ dɛ̍ɛ̍ i̍ wɔ̌n ke̍ sǔh ae? 17Mɔ̀ se̍ i̍h juo ka dɛ̍ ɛ̀ gbǎ-a dě nyɔ̍ wɔ̍ɔ̍n-ɛ, nɛ̀ ɛ̍ mu̍-a dě nyɔ̍-a wùò di̍i̍ wɛ̀ ɛ̍ sǐ-a sɔ̀n-ɛ, mɔ̀ se̍ i̍h juo ae? 18Jɛ dɛ̍ᵻ ìh-a jii-a dě nyɔ̍ wɔ̍ɔ̍n-ɛ, nɛ̀ dǒ wlùh kɛ̍n bo i̍h sɔ. Nɛ̀ i̍h laa̍ bo ìh-a nyni nyɔ̍ dě Nyɔsoa jlǐh i̍. 19Dɛ̍nu̍ɛ, dǒ nyɔ̍ wlùh kɛ̍n bo dɛ̍ᵻ sɔ̀nᵻ wlùh i̍ naɛ-ɛ sɔ. I̍h-a nu̍ ɛ̍ àn poe nyɔ̍ gbe̍ja̍a̍, àn nu̍ nynɛ̌à, àn nu̍ gbǎn, àn jlǐ, àn tmɔ̌ si̍h, ɛ̍ ke nyɔ̍-a nynɛ̌ jii̍ nyni-ɛ ke. 20Ìh la i̍h bo ìh-a nyni nyɔ̍ dě Nyɔsoa jlǐh i̍. Jɛ se̍ kwa̍ dle di̍ dɛ̍ nɔ̀ɔ̍, ɛ̍-ɛ nyni nyɔ̍ dě Nyɔsoa jlǐh i̍.”
Nynɔ̌-a wlùh gbaɛ pǔh-i ɔ̍ jǔ
(Maɛ 7.24-30)
21Jusu wlǔh-ia gbààn-ɛ, wɛ̀ ɔ̍ klɛɛn dě Taiɛ ke Saidɔn fɔɔ. 22Dǒ-o bo Kɛna nynɔ̌ ɔ̀ tǐn-a dě fɔ̌ laa̍ we̍-ɛ ji̍ dǒ ɔ̍ we̍. Wɛ̀ ɔ̍ wǐ, ɔ̍ la̍a̍, “Nyɔ̍ klaa, Depe-a Jǔ, jě ǐn wɔɛ lě. Ǎn jǔ nynɔ̌gbaɔ jeědih nɛ-a dǒ de̍e̍-ɛ, ɔ̍ sàɛ̀-a jua̍i̍ sǔh-ɛ ɛ̍ se̍ dɛ̍ka nɛ wa.”
23Jɛ Jusu se̍ ɔ̍ tɔ̍n-ɔ sà. Ɛ̍ bo ɛ̀ nu̍ ɛ̍ wɛ̀ ɔ̍ kòà ji̍ dǒ ɔ̍ we̍. U̍h la̍a̍, “Nɛ̀ ìn sèàɛ̍ ɔ̍ wlùh ɔ̍ iě mu̍, jɛ ɔ̍ bɔ̌ à de̍e̍ i̍ flǔi-ɛ sǔh.”
24Wɛ̀ ɔ̍ la̍a̍, “Ǐn Baa dbo̍ m nɔ̌ Eslɔɛ nyɔ̍ nɛ due we̍, ùh wɔ̀-a blawɛ̌ᵻ ìh sie-a kwlǎ-ɛ.”
25Wɛ̀ nynɔ̌ mu̍ iě ɔ̍ chlìi i̍ dǒ ɔ̍ jǔ. Wɛ̀ ɔ̍ la̍a̍, “Nyɔ̍ klaa, gbǎ ǐn we̍ lě.”
26Wɛ̀ Jusu la̍a̍, “Ɛ̍ se̍ i̍ slɛ̌ nyɔ̍ iě nynuu̍plìh-a di̍-dɛ̍ᵻ dǒ gbèᵻ jǔ i̍ wèla.”
27Nynɔ̌ la̍a̍, “I̍i̍n, nyɔ̍ klaa, kǎ ɛ̍ nɛ, jɛ di̍h gbàɛ̀ jih-a sɔ-a dǒ i̍h-a dlǔtu-a teble̍ kɛ̍n-ɛ, i̍h bo gbèᵻá chɛ̀-ɛ di̍ ke.”
28Wɛ̀ Jusu la̍a̍, “Nynɔ̌ la àn wlùh gbaɛ ku̍ wɔ̍n. Dɛ̍ àn pɔ̀n-aɛ, ɛ̍ mu̍ nɛ dǒ ìn we̍.” Sɔ dǒ tàdùè laa̍ bo ɔ̍ jǔ nynɔ̌gbaɔ nyna ɔ̍ pǔh.
Jusu pǔh-i nyɔ̍ dɔu
29Wɛ̀ Jusu wlǔh-i gbààn, iě ɔ̍ blě pɛ̍nu̍ klaa nɛ-a Kaladii-ɛ wɔ̍i̍n naɛ ɔ̍ mu̍ dě tlu̍hᵻ di̍i̍, iě ɔ̍ tè i̍. 30Wɛ̀ nyɔ̍ tlùgbei̍ mu̍ dě ɔ̍ we̍. U̍h gba̍ klɔ-nyɔ̍ ke, dɔ̌-nyɔ̍ ke, i̍ kɔ̌-nyɔ̍ ke bo̍bo̍ᵻ, ɛ̍ ke wɛ̌ᵻ nyɔ̍ dɔu duuh ke. Wɛ̀ u̍h pɛ̌n-ɛ u̍h i̍ dǒ ɔ̍ jǔ. Iě ɔ̍ pǔh-i u̍h kli̍hgbɛ̍. 31Sɔ ɛ̍ wlǔh i̍ nyɔ̍ laa̍ de̍e̍, wɛ̀ bo̍bo̍ᵻ iě wlu, wɛ̀ i̍ kɔ̌-nyɔ̍-a ku̍ iě beɛ̍ɛ dode̍, wɛ̀ klɔ-nyɔ̍ iě na, iě dɔ̌-nyɔ̍-a jě ka i̍. Iě u̍h-a po̍ Eslɔɛ nyɔ̍-a Nyɔsoa tìhwe̍.
Jusu nyǐ jɔ̍gbauᵻá wlǔ nyìɛ̍ di̍-dɛ̍
(Maɛ 8.1-10)
32Wɛ̀ Jusu dǎ ɔ̍ kòà dǒ ɔ̍ we̍, ɔ̍ la̍a̍, “Nyɔ̍ la u̍h-a po̍ ǐn wɔɛ. Wǐh ta̍a̍n bo u̍h nu̍ wɛ̀ da̍a ǐn we̍, iě u̍h-a di̍-dɛ̍ᵻ wɛ̀ ka. Ǐn se̍ pɔ̀n mɔ̌ iě u̍h nu̍-ɛ blě wɛ̀ u̍h iě de̍ i̍ mu̍. Pò ǐn nu̍ la̍a̍n-ɛ, nɛ̀ u̍h-a mu̍ jlɛ̌wɛ dǒ wìè-i.”
33Wɛ̀ ɔ̍ kòà la̍a̍, “Tàwe̍ à mu̍ di̍-dɛ̍ᵻ sà nɔ̀ɔ̍ tɔ̀ɔ̀n la wɛ̀ à iě nyɔ̍ tlùgbei̍ la nyǐ ɛ?”
34Wɛ̀ Jusu tèle u̍h i̍, ɔ̍ la̍a̍, “Blèe̍ gba̍nᵻ tìèwe̍ mɔ̀ blě ɛ?”
U̍h la̍a̍, “Gba̍nᵻ mɛ̀sɔɔ̌n ke smìi̍ plìh jɔ̌ wei bo à blě.”
35Iě ɔ̍ la̍a̍ dě nyɔ̍ tlùgbei̍ laa̍ we̍, “Mɔ̀ tìèe̍ i̍ dǒ bloɔ̍.” 36Wɛ̀ ɔ̍ dǔ blèe̍ gba̍nᵻ mɛ̀sɔɔ̌n ke smìi̍ laa̍, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn i̍h i̍, iě ɔ̍ nyǐ i̍h ɔ̍ kòà. Wɛ̀ u̍h gblè i̍h nyɔ̍ laa̍ jii̍. 37Nyɔ̍ kli̍hgbɛ̍ di̍ dɛ̍ wɛ̀ u̍h dbo̍. U̍h wɔ̀-aɛ, iě ɔ̍ kòà tɛ̌n blèe̍ chɛblih sie-a i̍-ɛ, wɛ̀ i̍h jǐ taaᵻ mɛ̀sɔɔ̌n. 38Jɔ̍gbauᵻ ùh di̍-a dɛ̍-ɛ, u̍h nu̍ wlǔ nyìɛ̍ (4,000). Nynɔ̌gbaɔᵻ ke nynuu̍plìh nɔ̀ɔ̍, u̍h se̍ slè-ɛ.
39Jusu wɔ̀-a nyɔ̍ laa̍ de̍ i̍ dbo̍-ɛɛ, iě ɔ̍ gbǎ dě blǎgbè di̍i̍, wɛ̀ ɔ̍ mu̍ dě Makadaɛn fɔɔ.
Tans Gekies:
Matio 15: KDNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The New Testament in Western Krahn published as KU̍O̍ DELEE © The Bible Society in Liberia, 1999.
