Gẹnẹsisi 4
4
1ADAM sọ yọ́n Evi, asi etọn é sọ mọhò, bo ji Kaini, bo sọ dọmọ, Yẹn mọ sunnu de yí gbọn alọgọna OKLUNỌ tọn mẹ. 2E sọ ji Abeli nọvisunnu etọn. Abeli sọ yín yìnyìntọ lẹngbọ tọn, Kaini yín pipọ̀tọ aigba tọn.
3To nukọnyìyì ojlẹ tọn mẹ é wá jọ, bọ Kaini yí sọn sinsẹ́n aigba tọn mẹ wá na núnina hlan OKLUNỌ. 4Podọ Abẹli, ewọ ga sọ yí plọnji sọn kanlinpa etọn mẹ podọ sọn ojó tẹnmẹ yetọn lẹ mẹ. OKLUNỌ sọ pọ̀nnukundagbe Abẹli po nunina etọn po. 5Ṣigba hlan Kaini podọ hlan núnina etọn ewọ ma pènnukundagbe. Hòmẹgble Kaini talala, nukunmẹ etọn kusiọ. 6OKLUNỌ sọ dọ hlan Kaini, dọmọ, Etẹwutu wẹ hòmẹgble we? etèwutu nukunmẹ towe kusiọ? 7Eyín hiẹ wà dagbe, yè ma na kẹalọyi we? eyín hiẹ ma sọ wà dagbe, ylando pàvà, to hòntonu. Podọ hlan hiẹ de wẹ ojlo etọn na te, hiẹ nasọ dugán to e ji.
8Kaini sọ dọ hlan Abẹli nọvisunnu etọn, dọmọ, Gbọ mí ni yi biọ danji. E sọ wá jọ to enẹgodo, whenuena yé tin to danji, bọ Kaini fọ́n do Abẹli nọvisunnu etọn ji bo hù i.
9OKLUNỌ sọ dọ hlan Kaini, dọmọ, Fie Abẹli nọvisunnu towe te? E sọ dọmọ, Yẹn ma yọ́nẹn: bé yẹn wẹ nọvisunnu ṣie gopọ̀ntọ? 10E sọ dọmọ, Eté wẹ hiẹ ko basi? Ogbè ohùn nọvisunnu towe tọn tọn dawhá hlan mi sọn aigba de. 11To dinvie mẹhodèdo wẹ hiẹ sọn aigba de he kènù etọn nado nù ohùn nọvisunnu towe tọn sọn alọ towe mẹ. 12Whenuena hie pò aigba, é ma na sọ́n huhlọn etọn hlan we ba; gbéjinu de podo dánpetọ de wẹ hiẹ na yín to aigba mẹ. 13Kaini sọ dọ hlan OKLUNỌ, dọmọ, Yadonamẹ ṣie klohú ehe yẹn sọgan doakọnna. 14Dayi e go, hiẹ ko yàn mi jegbonu to egbé sọn aigba ji; yẹn nasọ yín mẹwhiwhlá sọn nukun towe mẹ; yẹn nasọ yín gbéjinu de podọ dánpétọ de to aigba mẹ: é nasọ wá jọ do mẹdepope he mọ mi nasọ hù mi.
15OKLUNỌ sọdọ hlan ẹn, dọmọ, Enewutu mẹdepope he hù Kaini yè na yíahọsu to e go whla ṣinawe. OKLUNỌ dè ohia de na Kaini, na mẹdepope mọ ẹn nikã linu i.
16Kaini sọ tọ́n sọn OKLUNỌ nukọn, bo nọnọ̀ aigba Nodi tọn ji, to whèzẹtẹn Edẹni tọn dali. 17Kaini yọ́n asi etọn; é so mọhò, bo ji Enọku: é do tòdaho de, bo ylọ oyín tòdaho lọ tọn dọ Enọku, di oyín visunnu etọn Enọku tọn. 18Hlan Enoku wẹ yè ji Iladi: Iladi sọ ji Mehujaeli: Mẹhujaeli ji Mẹtusaeli: Mẹtusaeli sọ ji Lẹmẹki.
19Lẹmẹki sọ mọ yọnnu awe: oyín tintan tọn wẹ Ada, oyín awetọ tọn wẹ Zilla. 20Ada sọ ji Jabali: ewọ sọ wẹ oto na yé mẹhe nọnọ̀ ogohò mẹ lẹ, bo tindo whékanlin lẹ. 21Oyín nọvisunnu eton tọn wẹ Jubali: ewọ sọ wẹ otọ mẹhe nọ hẹn ajalen po hànjinu okannọ po go lẹpo tọn. 22Zilla, ewọ ga sọ ji Tubali-Kaini, tùntùntọ asiawànu sinsán sọn gànvẹ po gànyù po mẹ tọn lẹpo: nọviyọnnu Tubali-Kaini tọn wẹ Naama. 23Lẹmẹki sọ dọ hlan asi etọn lẹ, dọ:
Ada po Zilla po, Mi sè ogbè ṣie;
Mì asi Lẹmẹki tọn emi, mì dotó hógbe ṣie;
Na yẹn ko hù dawe de na awúkinkọ́n ṣie,
Odẹpẹ winyanwinyan de na awúgble ṣie.
24Eyín yè na yíahọsu Kaini go donu ṣinawe,
Nugbo Lẹmẹki go donu kandegbàn whla ṣinawe.
25Adam sọ vẹ́ asi etọn yọ́nẹn: é sọ ji visunnu de, bo ylọ oyín etọn dọ Sẹti: Na, é dọmọ, Jiwheyẹwhe ko dè okún devo na mi do oten Abẹli tọn mẹ; na Kaini ko hù i. 26Podọ hlan Sẹti, ewọ ga wẹ yè sọ ji visunnu de; é sọ ylọ oyín etọn dọ Enọsi: whenẹnu wẹ gbẹtọ lẹ ge nado to avàleyàn oyín OKLUNỌ tọn.
Tans Gekies:
Gẹnẹsisi 4: BWL23
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Holy Bible in Gun-Alada © Bible Society of Benin and Bible Society of Nigeria, 1923.
