Dit gaan goed met die mense wat heeltemal reg lewe,
die mense wat lewe soos die Here vir hulle geleer het.
Dit gaan goed met mense wat doen wat die Here sê
en wat met hulle hele hart naby Hom wil wees.
Hulle is ook mense wat nie verkeerde dinge doen nie
en wat lewe soos die Here wil hê.
U het self vir ons gesê wat ons moet doen,
en ons moet dit presies so doen.
Ek bid dat ek sal aanhou om te lewe soos u wette sê.
Wanneer ek gehoorsaam is aan al u gebooie,
dan sal ek altyd weet wat om te doen.
Wat U besluit, is altyd reg.
Wanneer ek dit geleer het,
dan sal ek vir U dankie sê met my hele hart.
Ek sal doen wat u wette sê,
U moet my nie heeltemal alleen los nie.
Wat moet jongmense doen
sodat hulle kan weet hoe hulle moet lewe?
Hulle moet doen wat U sê.
Ek wil naby U wees met my hele hart,
U moet keer dat ek nie
ongehoorsaam is aan u gebooie nie.
Ek dink altyd aan wat U gesê het,
dit keer my dat ek nie sonde doen teen U nie.
Here, ek prys U,
U moet vir my leer wat u wette sê.
Ek wil vir die mense alles sê wat U besluit het.
Dit maak my bly om te lewe soos U sê,
so bly soos wanneer 'n mens alles het wat hy nodig het.
Ek sal dink aan wat U beveel het,
ek sal goed luister na wat U wil hê.
Ek sal altyd bly wees oor u wette,
ek sal nie vergeet wat U gesê het nie.
As U goed is vir my, u dienaar,
dan sal ek lewe en ek sal doen wat U gesê het.
U moet my oë oopmaak,
sodat ek kan sien hoe wonderlik
die dinge is wat U vir ons leer.
Ek sal nie lank hier op die aarde wees nie,
U moet vir my leer wat u gebooie sê.
My hart is seer, want ek verlang altyd
om te hoor wat U besluit het.
U praat kwaai met die hoogmoedige mense,
U het hulle vervloek.
Hulle is die mense wat nie wil doen
wat u gebooie sê nie.
U moet keer
dat mense my nie spot en verneder nie,
want ek doen wat U sê.
Ook wanneer belangrike mense
saam planne maak teen my,
dan sal ek, u dienaar, altyd aan u wette dink.
Wat U sê, maak my bly,
dit sê vir my wat ek moet doen.
Wanneer dit sleg gaan met my,
dan moet U my laat aanhou lewe, soos U gesê het.
Toe ek vir U vertel het van my lewe,
toe het U my geantwoord.
U moet vir my leer wat u wette sê.
U moet my help om te verstaan wat U beveel,
sodat ek oor u wonderwerke kan dink.
Ek smelt weg van die pyn,
U moet my regop hou, soos U gesê het.
U moet keer dat ek nie vals lewe nie,
U moet genadig wees vir my en vir my leer.
Ek het gekies om eerlik te lewe,
ek het onthou wat U besluit het.
Here, ek hou vas aan wat U sê,
U moet my help om te weet wat ek moet doen.
Ek wil graag lewe soos u gebooie sê,
want U sal my help om dit te verstaan.
U moet vir my leer wat u wette beteken,
sodat ek altyd kan doen wat die wette sê.
U moet my help om te verstaan,
sodat ek kan doen wat U vir my leer
en sodat ek daaraan gehoorsaam kan wees
met my hele hart.
U moet my laat lewe soos u gebooie sê,
want dit is vir my lekker.
U moet my help
sodat ek graag sal wil doen wat U sê
en nie sal kies om ryk te word nie.
U moet my help sodat ek nie dinge wil hê
wat niks beteken nie,
U moet my laat lewe soos U wil hê.
U moet vir my doen wat U belowe het,
vir my, u dienaar,
want U het dit belowe vir mense wat vir U dien.
U moet keer dat mense my nie spot nie,
ek is bang daarvoor, want wat U besluit, is goed.
U moet dit weet, ek wil graag hoor wat U beveel,
U sal reg doen en my laat aanhou lewe.
Here, U moet vir my doen wat U belowe het,
U moet my red, U het dit belowe.
Dan sal ek die mense kan antwoord wat my spot,
want ek glo dat U sal doen wat U gesê het.
En U moet my help om altyd die waarheid te praat,
want ek glo dat U sal doen wat U besluit het.
En ek sal aanhou doen wat U vir my leer,
altyd en altyd.
En ek sal lewe soos 'n vry mens,
want ek het probeer doen wat U beveel het.
En ek sal vir konings vertel wat U sê,
ek sal weet wat om te sê.
Ek sal aanhou bly wees oor u gebooie,
ek is lief vir hulle.
Ek respekteer u gebooie, ek is lief vir hulle,
ek sal aanhou dink oor u wette.
U moenie vergeet wat U vir my gesê het nie,
vir my, u dienaar.
Dit het my laat hoop dat U my sal help.
Toe dit sleg gegaan het met my,
het u woorde dinge verander vir my,
want die dinge wat U belowe het, het my laat aanhou lewe.
Toe hoogmoedige mense my baie gespot het,
het ek nie opgehou om te doen wat U vir my geleer het nie.
Here, wanneer ek dink aan wat U lank gelede besluit het,
dan voel ek beter.
Die mense wat verkeerd doen, maak my kwaad,
dit is húlle wat nie doen wat U vir ons geleer het nie.
Ek sal sing oor u wette,
so lank soos ek op hierdie aarde lewe.
Here, ek dink ook in die nag aan u Naam,
en ek doen wat U vir ons geleer het.
Dit het met my gebeur
omdat ek doen wat U beveel het.
Here, ek het net vir U,
ek het belowe dat ek sal doen wat U gesê het.
Ek soebat en vra vir U met my hele hart,
U moet genadig wees vir my, soos U belowe het.
Wanneer ek dink aan hoe ek lewe,
dan dink ek altyd weer aan wat U gesê het.
Ek is haastig, ek wag nie,
ek wil gehoorsaam wees aan u gebooie.
Wanneer mense wat verkeerd doen,
vir my in hulle vangnet wil vang,
dan vergeet ek nie wat U vir ons geleer het nie.
Ek staan in die middel van die nag op
om vir U dankie te sê, want alles wat U besluit het, is reg.
Ek is 'n vriend van al die mense wat vir U dien
en wat doen wat U beveel.
Here, U doen wat U belowe het,
oral op die aarde,
U moet vir my leer wat u wette sê.
Here, U het goed gedoen aan my, u dienaar,
dit is soos U gesê het.
U moet vir my leer om te weet
wat is reg en wat is verkeerd,
want ek glo dat u gebooie reg is.
Voordat dit met my so sleg gegaan het,
het ek verkeerd gelewe,
maar nou doen ek wat U sê.
U is goed en U doen goed,
U moet vir my leer wat u wette sê.
Hoogmoedige mense lieg
en hulle praat sleg van my,
maar ek doen wat U beveel
met my hele hart.
Hulle wil nie verstaan wat U vir ons sê nie,
maar ek geniet wat U vir ons leer.
Dit was vir my goed dat U my laat swaarkry het,
want so het ek geleer wat u wette sê.
Die dinge wat U vir my leer, is beter
as duisende stukke goud en silwer.
Ú het my gemaak en Ú het my laat lewe,
U moet vir my leer sodat ek u gebooie kan ken.
Die mense wat vir U dien, sal na my kyk
en hulle sal bly wees,
want hulle sal sien ek glo
dat U sal doen wat U gesê het.
Here, ek weet dat U reg besluit,
en dat U my laat swaarkry het
omdat U gesê het U sal dit doen.
U moet doen wat U belowe het,
dit sal dinge beter maak vir my.
U het dit vir my gesê, vir my, u dienaar.
U moet jammer wees vir my sodat ek kan lewe,
want ek geniet wat U vir my leer.
U moet die hoogmoedige mense laat verloor,
want hulle het vir my gelieg en hulle het my verlei.
Ék wil dink aan wat U beveel het.
U moet die mense wat vir U dien,
na my toe laat kom,
sodat hulle kan leer wat U gesê het.
Ek wil heeltemal gehoorsaam wees aan u wette,
sodat niemand my kan verneder nie.
Ek wag en verlang daarna dat U my sal red,
ek is seker dat U sal doen wat U gesê het.
My oë is moeg, want ek hou aan om te kyk
wanneer U dit weer goed sal laat gaan met my
soos U belowe het.
Ja, ek het geword soos 'n velsak
wat in die rook hang,
maar ek vergeet nie u wette nie.
Ek is u dienaar.
Hoe lank sal ek nog lewe?
Wanneer straf U die mense
wat my volg en jaag?
Die hoogmoedige mense het gate gegrawe
sodat ek daarin moet val,
húlle is die mense wat nie doen
wat U vir ons geleer het nie.
Al u gebooie staan vas, dit verander nooit.
Ek het niks verkeerd gedoen nie,
maar mense volg my en jaag my.
U moet my help.
Ek het gedoen wat U beveel het,
maar hulle het my amper doodgemaak.
U moet my laat aanhou lewe, soos U belowe het,
sodat ek kan doen wat U sê.
Here, die dinge wat U vir ons gesê het,
is altyd waar,
dit staan vas in die hemel, dit verander nooit.
U bly dieselfde vir elke geslag.
U het die aarde gesit waar dit is,
en dit is nog altyd daar.
Alles is vandag nog daar, soos U besluit het,
want almal doen wat U sê.
Ek het geniet wat U vir ons leer.
As dit nie so was nie,
dan het ek gesterf, want ek kry swaar.
Ek sal nooit vergeet wat U beveel het nie,
want U het my so laat lewe.
Ek behoort aan U, en U moet my red,
want ek probeer om te doen wat U beveel.
Die mense wat verkeerd doen,
is gereed om my dood te maak,
maar ek dink net aan wat U gesê het.
Ek het gesien dat niks vir altyd aanhou nie,
alles het 'n einde,
maar u gebooie is oral en altyd daar.
Ek is baie lief vir die dinge wat U vir my leer,
ek dink die hele dag daaroor.
U gebooie gee vir my wysheid,
meer wysheid as wat my vyande het,
want ek onthou altyd u gebooie.
Ek is verstandiger as almal
wat vir my geleer het,
want ek dink aan wat U gesê het.
Ek is slimmer as mense wat ouer is as ek,
want ek doen wat U beveel het.
Ek doen niks wat verkeerd is nie,
ek wil doen wat U gesê het.
Ek hou aan om te doen wat U besluit,
want U self leer vir my.
Dit is lekker om te praat oor die dinge
wat U belowe het,
dit is lekkerder as heuning.
Ek verstaan wat U beveel het,
daarom haat ek alles wat vals is.
Die dinge wat U vir ons gesê het,
is vir my soos 'n lamp
wanneer ek in die donker loop,
dit wys vir my hoe ek moet lewe.
Ek het belowe, en ek sal dit doen:
Ek sal doen wat U besluit, want U besluit reg.
Dit gaan baie baie sleg met my,
U moet my laat aanhou lewe, soos U gesê het.
Here, die dinge wat ek vir U sê,
is offers wat ek graag vir U bring.
U moet dit asseblief aanvaar en U moet vir my leer
om te verstaan wat U besluit.
Daar is altyd mense wat my wil doodmaak,
maar ek vergeet nie wat U vir ons geleer het nie.
Die mense wat verkeerd doen, wil my vang
soos 'n mens voëls vang in 'n vangnet,
maar ek hou aan om te doen wat U beveel.
Ek wil altyd onthou wat U sê,
want dit maak my baie bly.
Ek het besluit om altyd te doen
wat u wette sê, so lank soos ek lewe.
Ek hou nie van mense wat skynheilig is nie,
maar ek is lief vir wat U vir ons geleer het.
By U is ek veilig, U beskerm my,
ek weet U sal doen wat U gesê het.
Slegte mense moenie naby my kom nie,
sodat ek kan doen wat die gebooie
van my God sê.
U moet my regop hou, soos U belowe het,
dan sal ek aanhou lewe,
U moet my help, sodat ek kan aanhou hoop.
Wanneer U my regop hou, dan is ek veilig
en dan kyk ek altyd wat u wette sê.
U hou nie van mense wat ongehoorsaam is
aan u wette nie,
want hulle is vals, hulle wil mense bedrieg.
U los al die mense
wat verkeerd doen, hulle is soos skuim
wat niks beteken nie.
Daarom is ek lief vir wat U sê.
Ek is bang vir U, ek bewe,
ek is bang vir wat U besluit.
Ek het reg gedoen aan mense
en ek het gelewe soos U wil hê.
U moenie vir my los sodat mense my verdruk nie.
U moet vir my, u dienaar, belowe
dat U dit goed sal laat gaan met my.
U moenie dat hoogmoedige mense my verdruk nie.
My oë is moeg, want ek hou aan om te kyk
wanneer U my sal red.
Ek hou aan om te luister na wat U sê,
want wat U sê, is reg.
U moet vir my, u dienaar, doen wat U belowe het,
U moet vir my leer wat u wette sê.
Ek is u dienaar, U moet my verstandig maak
sodat ek kan verstaan wat U sê.
Here, U moet nou iets doen aan die mense
wat nie doen wat U vir ons geleer het nie.
Waarlik, ek is meer lief vir u gebooie
as vir goud, ja, goeie goud.
Waarlik, ek probeer altyd om alles te doen wat U beveel,
ek hou nie van iets wat vals is nie.
Wat U sê, is wonderlik,
daarom doen ek wat U sê.
Wanneer mense verstaan wat U gesê het,
dan is dit vir hulle soos 'n lig,
dit wys vir jongmense wat hulle moet doen.
Ek is honger vir u gebooie,
so honger soos 'n dier wat sy bek wyd oopmaak
omdat hy honger is.
U moet luister en genadig wees vir my,
soos U altyd doen vir die mense
wat lief is vir u Naam.
U moet my help, sodat ek kan aanhou
om te lewe soos U sê.
U moenie dat sonde oor my regeer nie,
nie een sonde nie.
U moet keer, mense moenie vir my verdruk nie,
dan sal ek kan doen wat U beveel.
U moet naby my wees,
naby my, u dienaar,
en U moet vir my leer wat u wette sê.
My trane loop soos strome water
omdat mense nie doen wat U vir ons geleer het nie.
Here, U doen reg, U besluit reg.
Alles wat U gesê het, is reg,
mense kan dit altyd glo.
Ek word baie kwaad wanneer my vyande
vergeet wat U gesê het.
Die dinge wat U sê, is baie waar.
Ek, u dienaar, is lief vir wat U sê.
Ek is klein en onbelangrik
maar ek het nie vergeet wat U beveel het nie.
U doen reg en U sal altyd reg doen,
die dinge wat U vir ons geleer het,
bly dieselfde.
Toe ek swaargekry het
en toe dit sleg gegaan het met my,
was dit vir my lekker om u gebooie te hou.
Wat U sê, is altyd reg,
U moet my help om dit te verstaan,
sodat ek kan aanhou lewe.
Here, ek roep en ek vra
dat U my moet help,
ek vra dit met my hele hart.
U moet my antwoord,
ek wil doen wat u wette sê.
Ek roep en ek vra
dat U my moet red,
sodat ek kan doen wat U sê.
Ek staan op voordat die son opkom
en ek vra dat U my moet help,
ek weet U sal doen wat U gesê het.
Ek bly die hele nag wakker,
sodat ek kan dink aan wat U belowe het.
Here, U doen wat U belowe het
en wat U besluit het.
U moet luister na wat ek vra,
U moet my laat aanhou lewe.
Die mense is naby wat my volg en jaag
om my seer te maak,
maar hulle is ver van wat U vir ons geleer het.
Here, U is naby en u gebooie verander nie.
Ek weet van die begin af wat U gesê het,
want u woorde bly altyd waar.
U moet kyk hoe sleg dit met my gaan
en U moet my red,
want ek het nie vergeet wat U vir ons geleer het nie.
U moet my help wanneer mense my beskuldig,
U moet my vrymaak, soos U belowe het,
U moet my laat aanhou lewe.
U sal nie die mense red wat verkeerd lewe nie,
want hulle probeer nie om te doen wat u wette sê nie.
Here, U is baie genadig, U het so besluit,
U moet my laat aanhou lewe.
Daar is baie vyande wat my volg en jaag,
maar ek hou aan om te doen wat U sê.
Wanneer ek sien hoe ontrou mense is,
dan wil ek naar word.
Hulle is mense wat nie doen wat U sê nie.
Here, U moet kyk
hoe lief is ek vir wat U beveel,
U moet my laat aanhou lewe,
soos U belowe het.
Alles wat U gesê het, bly dieselfde,
alles wat U besluit, is altyd reg.
Ek het niks verkeerd gedoen nie,
maar belangrike mense volg my en jaag my.
Ek is nie bang vir hulle nie,
ek is bang vir wat U gesê het.
Ek is so bly oor wat U belowe het,
so bly soos wanneer ek baie goed kry
wat ek vir my kan vat.
Ek haat dit wanneer mense vals is,
ek hou niks daarvan nie.
Ek is lief vir wat U vir ons geleer het.
Ek prys U sewe maal elke dag
omdat alles wat U besluit, reg is.
Dit gaan baie goed met mense
wat lief is vir wat U vir ons geleer het.
Daar gebeur niks wat sleg is met hulle nie.
Here, ek weet U sal my red
en ek doen wat u gebooie sê.
Ek hou aan om te doen wat U sê,
ek is baie lief daarvoor.
Ek hou aan om te doen wat U beveel
en wat U sê,
want U sien altyd hoe ek lewe.
Here, U moet hoor wat ek bid,
U moet my help om te verstaan wat U sê.
U moet luister wanneer ek tot U bid,
U moet my red, soos U belowe het.
Ek sal aanhou om U te prys,
want U leer vir my u wette.
Ek sal sing oor wat U belowe het,
want al u gebooie is reg.
U moet my help,
want ek het gekies om te doen wat U beveel het.
Here, ek verlang daarna dat U my moet red,
ek geniet wat U vir ons geleer het.
U moet my laat aanhou lewe,
sodat ek U kan prys.
Die dinge wat U besluit het, moet my help.
Ek het verdwaal soos 'n skaap wat weggeraak het,
U moet my soek, vir my, u dienaar,
want ek het nie u gebooie vergeet nie.
Bybeltoep
Bybel App vir Kinders
