Matthew 6
6
Jesus miyutuutamaachewiniyuu kaa ayimitutahk
1“Ayaakwaamiikw taan e ishi miyutuutamaacheyekw. Ekaawii naashch wii nanehtuhtenaakuhiisukw anite e mihchetinaanuuhch mikw e iteyihtamekw chechii waapamitaakuch awenichii, wesh uu ihtuutamekwe, ekaawii pukuseyihtamukw chechii tipahamaataakw Kuuhtaawaau kihchikiishikuhch kaa ihtaat.”
2“Ekw maak e miyat awen chekwaayuu e ishi nuuhtepayit, ekaawii ihtuut uu misiwe awen chechii chischeyihtahk, wesh wiyawaau anichii kaa ayimihehkaasutwaau naashch wii kaa chescheyihtaakuhuuch taan e ishi miyutuutahkwaau. Mikw e iteyihtamihiikutwaau chechii maamihchimikutwaau aweyuuh. Chiwiihtamaatinaawaau taapwe, shaash chiisaach miyaakanuuch utipahamaakusiiwinawaau. 3Maak e wiichihiit awen e chistimaatisiit, ekaawii papaamaachimuh taan kaa ishi wiichihat. 4Mikw chiya chipaa chischeyihten taan e ishi miyutuutaman. Ekw maak Chuuhtaawii kihchikiishikuhch kaa ihtaat che tipahamaask wesh Chishemanituu misiwe waapahtam taan e ihtuut.”
Jesus kaa chiskutamaachet taan chipaa ishi ayimihaanuuyuu
Luke 11.2-4
5“Kaye maak e ayimihaayin, ekaawii ihtih e ihtitwaau anichii utayimihehkaasuch. Naashch e miyeyihtahkwaau e naaniipuutwaau e ayimihaatwaau anite ayimiheukamikuhch kaye anite wiyesh misiwe aweyuu chechii waapamikutwaau. Chiwiihtamaatin shaash ayaauch utipahamaakusiiwinawaau uchii. 6Maak e ayimihaayin, chinipeukamikuhch chipaa chipahuusun, iskutak maak chii chipahuusuyine ekw che ayimihiit Kuuhtaawii kaatinihch kaa ihtaat. Chiwaapamukw wii taan e ihtuut ekaa kutak awen waapamiskw, wiya maak chika tipahamaakw.”
7“Kaye maak e ayimihaayin, ekaawii aapachihtaah ayimuwin ekaa chekwaan mitun itwemakahch muyaam e ihtitwaau anichii ekaa kaa taapweyimaatwaau Chishemanituu, e iteyihtahkwaau che pehtaakutwaau Chishemanituu mikw aniyuu chineush e ayimihaatwaau. 8Ekaawii nispituwaahkuch uchii. Wesh Kuuhtaawii chischeyihtam shaash taan e ishi nituweyihtaman pwaamis e kakwechimat. 9Eukw uu che ishi ayimihaayekw. Nuuhtaawiinaan kihchikiishikuhch kaa ihtaayin, nitayimihaanaan chitishinihkaasuwin chechii chischeyihtaakunuuhch e chisteyihtaakuhch. 10Nitayimihaanaan kaye chuuchimaawin che utihchipayihch, kaye chititeyihtamuwin chechii ihtuutaakanuuhch utah aschiihch muyaam e ishi ihtuutaakanuuhch anite kihchikiishikuhch. 11Miinaan aaihkunaau anuhchiish kaa chiishikaach taan e ishi nituweyimachiht. 12Wepeyihtamuunaan nimachihtwaawinaanh muyaam taan kaa ishi wepeyihtamuwachihtwaau anichii kaa wanituutuuyimihtwaau. 13Ekaawii maak ituhtahiinaan anite chechii kakwechihiikuyaahch. Pechi kanuweyiminaan taan waa ishi kakwechihiikuyaahch machimanituu. Wesh chiya chitipiyeusiyin chuuchimaawin kaye chiya chitayaan suuhkaatisiiwin kaye chisteyihtaakusuwin kaachiche kaye kaachiche. Eukw maak uyuu Jesus kaa ishi chiskutamaachet che ishi ayimihaanuyich.”
14“Ekw maak miin kaa itwet wepeyihtamuutwaawenich kutakach taan kaa ishi wanituutaaskwaau, Kuuhtaawii kihchikiishikuhch kaa ihtaat chika wepeyihtamaakw. 15Ekw maak ekaa wepeyihtamuutwaawenich kutakach namui kaye Kuuhtaawii kihchikiishikuhch kaa ihtaat chika uhchi wepeyihtamaakw taan kaa ishi wanituutaman.”
Jesus kaa ayimitutahk ekaa e utinahk awen miichimiyuu mikw e wii ayimihaat
16“Iskutak maak ekaa utinamekwe miichim mikw e wii ayimihaayekw, ekaawii misimeyihtaminaakuhiisukw muyaam e ihtitwaau anichii kaa ayimihehkaasutwaau. Papaamuhteuch naashch e nanehkaashinaakuhiisutwaau muyaam naashch e wawaanihkatetwaau e ishinaakuhiisutwaau chechii waapamikutwaau kaye chechii chischeyimikutwaau aweyuuh ekaa miichisutwaau mikw ushaa e ayimihaatwaau. Chiwiihtamaatinaawaau shaash mitun tekash miskamuch utipahamaakusiiwinawaau e chii ihtuutuwaakanuutwaau aniyuu taan kaa ishi nituweyihtahkwaau chechii ishi chistimaacheyimaakanuutwaau. 17Ihtiyine maak ekaa miichisuyin kaasiihkwe kaye shiikahuu. 18Ekaawii chischeyihtaakuhuuh uu e ihtiyin. Mikw Kuuhtaawii kaatinihch kaa ihtaat chika chischeyihtam. Wiya chika waapamukw uyuu e ihtuut ekaa waapamisk kutak awen, wiya maak chika tipahamaakw.”
Miisitisiiwin kihchikiishikuhch kaa ihtakuhch
Luke 12.33, 34
19“Ekaawii maauchihtamaasukw miisitisiiwin utah aschiihch, chechii wanaachihtaatwaau manichuushach kaye chechii akwaakwaapischipayihch kaye chimutiskach chechii kachemutitwaau. 20Teyakuch maak anite kihchikiishikuhch ekute ishi maauchihtamaasukw miisitisiiwin anite ekaa chechii wanaachihtaatwaau manichuushach kaye ekaa chechii akwaakwaapischipayihch kaye ekaa chechii kachemutitwaau chimutiskach. 21Wesh taanite e kanuweyihtaakuhch chimiisitisiiwin ekute e ihtakuhch chitehii.”
Miyuu waashtewin
Luke 11.34-36
22“Chischiishikw eukw uyuu uwaashtenamaakan chiiyuu. E miywaayich maak awen uschiishikw tekash chika waashteyuu wiiyuu. 23Ekw maak ekaa miywaauche chischiishikw, tekash kata ukaashteyaau chiiyuuhch. Ekw maak ekaa ihtakuhche waashtewin anite chiiyuuhch, taapwe kiipaa nuwach ukaashteyaau.”
Chishemanituu kuuhchistamaakunuu misiwe chekwaayuu
Luke 16.13; 12.22-31
24“Namui awen chika chii atushkuweu niishu uchimaau, wesh peyakw aniyuu chika uhkaateu, ekw aniyuu kutak che saachihaat. Aniyuu peyakw suuhk chika atushkuweu, ekw aniyuu kutak namui chika uhchi naheyimeu chechii atushkuwaat. Namui chika chii atushkuweu Chishemanituu eyuu maak suuhk e aapatisit e wii miisitisiit.”
25“Eukw maak wehchi ititakuch ekaa chechii mukushkaateyihtamekw miichim kaye chekwaan che minihkweyekw taan an e ishi nituweyihtamekw chechii uhchi pimaatisiyekw maak kaye chekwaan che chichishkamekw. Wesh pimaatisiiwin uste chisteyihtaakun ishpishaat miichim, kaye maak miiyuu uste chisteyihtaakun ishpishaat aniyuuh chichekwaanimh kaa chichishkaman. 26Maamituneyimich maa piyeshiishach, namui nihtaauchihtaauch chekwaayuu kaye namui maauchihtaauch miichimiyuu, yaapach maak Kuuhtaawiih kihchikiishikuhch kaa ihtaayich kanuweyimikuuch. Chiyawaau maak uste chititeyihtaakusinaawaau ishpishaat piyeshiishach. 27Wesh aat naashch aayimeyihtamihiikuyine chekwaan namui etituu yaapach chika chii yahchihtaan chipimaatisiiwin.”
28“Chekwaan wehchi aayimeyihtamekw chekwaan che chichishkamekw. Maamituneyihtamukw maa waapikunh taan e ishpish miywaashikwaauh kaye e ishi miyu nihtaauchihkwaau. Namui aapatisiimakanh, namui kaye waaspisuumakanh. 29Ekw maak chiwiihtamaatinaawaau, aat aniyuu e chii ishpish miisitisiit aniyaa chisheuchimaau Solomon namui uhchi ishpish miywaashiyuuh uchekwaanimh e ishpish miywaashiyikwaauh waapikunh. 30Kaye maak Chishemanituu nihtaauchihtaau mashkushuuh. An maak kaa nihtaauchihkwaauh mashkushuuh anuhchiish kaa chiishikaach, waapahche shaash katachii ishkwaasikanuuh, namui aa chiyawaau uste chiwii miikuwaau chekwaayuu che pushchishkamuwekw, chiyawaau kaa apishaashich chitaapwehtamuwinawaau.”
31“Ekaawii maak muush maamituneyihta chechii iteyihtaman, ‘Chekwaan che miichiyaan.’ Maak chechii iteyihtaman ‘Chekwaan che minihkweyaan.’ Maak kaye chechii iteyihtaman, ‘Chekwaan che chichishkamaan.’ 32Wesh eukw uyuu chekwaayuu muush e iteyihtamihiikutwaau anichii kutakach awenich ekaa kaa taapweyimaatwaau Chishemanituu. Ekw maak chiyawaau Kuuhtaawaau kihchikiishikuhch kaa ihtaat chischeyihtam misiwe taan e ishi nituweyihtamekw. 33Uste iteyihtaakun suuhk chechii naanituweyihtamuwekw Chishemanituu uchisheuchimaawin kaye ukuiskutaatisiiwin, ekw maak che miitaakw misiwe taan e ishi nuuhtepayiwekw. 34Shaash wesh ihtakun chekwaan anuhchiish che ushtaapayihiikuyin, ekaawii aayimeyihta anuhchiish taan che ispayihch waapahche, wesh chika ihtakun che ishi aayimeyihtaman waapahche. Namui maak iteyihtaakun chechii aayimeyihtamihiikuyin anuhchiish taan che ishi ushtaapayin waapahche.”
Tans Gekies:
Matthew 6: crjrNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
