Matthew 14
14
John usiikahaahtaacheu kaa nipahaakanuut
Mark 6.14-29; Luke 9.7-9
1An maak mekwaach an chisheuchimaau Herod chii pehtam taan e itaachimaakanuyich Jesus, 2ekw kaa itaat aniyuu utaapachihaakanh, “Maaskuuch taapwe eukun an aniyaa John siikahaahtaacheu. Chii wanishkaache nipuwinihch uhchi. Eukw aniyuu wehchi ayaat maskaushiiwiniyuu chechii ihtuutahk maamishkaach ihtuwinh.”
3Wesh wiya Herod chii itashuwekupane chechii maakunaakanuyich aniyaa John, kaye chechii maahkupitaakanuyich, ekw maak chechii chipahwaakanuyich. Eukw wehchii ihtuutuwaat uyuu aniyuu wiichishaanh Philip wiichiskweuyuuh Herodias kaa ishinihkaasuyich e chii itikut uyuu chechii itashuwet. 4Wesh Herod chii wiichimeu Herodias aniyuu wiichishaanh Philip wiichiskweuyuuh, ekw John siikahaahtaacheu muush kaa itaat Herod, “Chipiikunen wiishuwewin e wiichiskwewiyin chiichiinuu wiichiskeu.” 5Ekw Herod kaa wii nipahaat aniyuu John, mikw maak chii kushteu aniyuu Jewa iinuu, wesh chii taapwehtamuch e uchischiwehiichesuyich John.
6Iskutak maak chisheuchimaau Herod tepiskahk chii makusheu ekw aniyuu Herodias utaanisiyuu chii niimiyuu anit uhchishkuu e mihchetinaanuyich. Herod maak naashch chii nahiiwehiikuu aniyuu ishkwesha kaa ihtiyich. 7Ekw kaa itaat, “Cheshtinaash che miyaat chekwaayuu mikw taan che ishi nituweyihtamiikwen.”
8Ekw an ishkwesh kaa nituwaapamaat aniyuu ukaawiih, ekw kaa itikut chechii itwet, chechii chimakwehwaakanuyich John siikahaahtaacheu ekw aniyuu ustikwaaniyuu wiyaakanihch chechii ashtaakanuyich chechii petaakanuyich maak anit e ihtaat.
9Naashch chii macheyihtam chisheuchimaau Herod iskutak kaa pehtahk taan e ishi nituweyihtamiyich aniyuu ishkwesha, mikw maak yaapach chii miyeu aniyuu kaa ishi nituweyihtamiyich wesh misiwe aniyuu umaanitemh chii pehtaakuu e chii itaat aniyuu ishkwesha cheshtinaash che miyaat taan che ishi nituweyihtamiikwenh. 10Ekw maak kaa itashuwet chechii chimakwehwaakanuyich John anite chipahutuukamikuhch e ihtaayich. 11Ekw kaa petaakanuyich aniyuu ustikwaaniyuu wiyaakanihch e chii ashtaakanuyich, kaa miyaakanuut an ishkwesh, kaa ituhtutawaat aniyuu ukaawiih aniyuu mistikwaaniyuu. 12Ekw John uchischinuhamuwaakanh kaa takushiniyich, kaa utinamuwaatwaau aniyuu wiiyuuyuu, kaa nahiihkamuwaatwaau, ekw kaa nituu wiihtamuwaatwaau Jesus.
Niyaayinwaau chishemitaahtumitanuu aweyuuh kaa ashamaat Jesus
Mark 6.30-44; Luke 9.10-17; John 6.1-14
13Iskutak maak Jesus kaa pehtahk aniyuu John e chii nipahaakanuyich chii puusuu utiyuu e peyakushit ekw anite kaa isichimet ekaa mitun ihtaanuyich. Anichii maak iinuuch iskutak chescheyihtahkwaau taanite e ihtaayich chii chistuhteuch anit ihtaawinihch uhchi ekw kaa nituwaapamaatwaau. 14Iskutak maak kepaat Jesus, wiyaapamaat maak aniyuu mihchetu iinuu, chii chistimaacheyimeu, kaye chii miinuwaachiheu aniyuu kaa aahkusiitwaau kaa peshuwaakanuyich.
15Aniyuu maak e ati utaakushiyich aniyuu uchischinuhamuwaakanh chii pechi nituwaapamikuu, ekw kaa itikut, “Shaash chihchiwe utaakushuu kaye maak namui ihtakun ihtaawin utah nihaau kaa ihtaayihkw. Itishahuuch maa anite ihtaawinihch anichii iinuuch che nituu naanituweyihtahkwaau chekwaayuu che miichitwaau.”
16Ekw Jesus kaa itaat, “Ekut utah che ihtaatwaau, chiyawaau miyaahkuch chekwaayuu che miichitwaau.”
17Uchischinuhamuwaakan maak chii itikuu Jesus, “Mikw niyaayin aaihkunaauch niishu maak namesach ekun e ishpish ihtakuhch chekwaan e miichinaanuuhch.”
18Ekw Jesus kaa itaat, “Petaakw an miichim.” 19Ekw Jesus kaa itaat aniyuu iinuuh chechii apiyich anite mashkushiihch. Ekw kaa utinaat aniyuu niyaayin aaihkunaau kaye aniyuu niishu namesa, ishpimihch kaa ishi tastasaapit e nanaaskumaat Chishemanituu. Chii papihkwepiteu misiwe aniyuuh aaihkunaauh, ekw kaa miyaat uchischinuhamuwaakan chechii maatinamuwaayich aniyuu iinuu. 20Misiwe maak awen chii miichisuu kaye chii tepimiichisuu. Ekw aniyuu uchischinuhamuwaakanh kaa maamuushtinamiyich aniyuu ishkushtawaaniyuu. Niishushaap maak utipiiwath chii saakashchinihtaauch. 21Mikw maak naapeuch e achimaakanuutwaau niyaayinwaau chishemitaahtumitanuu chii tashuuch ekaa asitachimaakanuutwaau iskweuch ekw maak awaashach.
Jesus kaa pimuhtet nipiihch
Mark 6.45-52; John 6.15-21
22Ekw Jesus kaa itashumaat aniyuu uchischinuhamuwaakanh chechii puusiyich aniyuu utiyuu, shaash chechii niikaan isichimeyich anite kwestehchekaam aniyuu saakahiikaniyuu, ekw wiya pitamaa kaa chiiwetishihwaat aniyuu iinuu. 23Iskutak maak kaa chiiwetishihwaat aniyuu iinuu, ekw kaa shaakachuwet anite wachiyuu chechii peyakushit e ayimihaat. Iskutak maak wetaakushiyich eshkw chii peyakushuu Jesus anite. 24Aniyuu maak kaa ishpish ihtaat anit shaash taauch chii ihtakuniyuu aniyuu utiyuu anit kaa puusiyich aniyuu uchischinuhamuwaakanh, naashch e sasemitaahukutwaau e nayimihahkwaauh.
25Chekaat maak chii petaapaniyuu, wiyesh chistuuch nishtu ekw maak kutwaashch e ispayiyich ekw Jesus kaa nituwaapamaat aniyuu uchischinuhamuwaakanh, nipiihch e pimuhtet. 26Iskutak maak wiyaapamaatwaau e pimuhteyich nipiihch chii mista kushtaachuuch, e ishpish kushtaachitwaau maak chii taachikwemaatuuch e itwetwaau, “Chiipai an.”
27Mikw maak tiiwehch Jesus chii ayimiheu e itaat, “Chiyaameyihtamukw, eukw wesin niya, ekaawii kushtaachikw.”
28Ekw Peter kaa itaat, “Utipeyihchikeu, taapwe e aawane chiya, pechi iishih chechii nituwaapamitaan nipiihch e pimuhteyaan.”
29Ekw Jesus kaa itaat, “Aashtam.” Ekw Peter kaa kapaat che nituwaapamaat aniyuu Jesus nipiihch e pimuhtet. 30Iskutak Peter wiyaapahtahk taan ishpish mistayuutiniyich chii kushtaachuu, ekw kaa ati kushaapet. Chii tepweu maak e itwet, “Utipeyihchikeu, pechi wiichihiih.”
31Tiiwehch maak Jesus chii suwanischeyuu, kaa maakunaat ekw kaa itaat, “Chekwaan wehchi puuniyin e taapwehtaman chechii ihtuutaataan chechii pimuhteyin nipiihch.”
32Iskutak maak taapishkun kaa puusitwaau aniyuu utiyuu, ekw mitun kaa ati ywaashtiniyich. 33Anichii maak chischinuhamuwaakanich anite utihch kaa ihtaatwaau chii nuuchiishtuweuch Jesus e itaatwaau, “Taapwe Chishemanituu Ukusisa chiya.”
Gennesaretihch kaa miinuwaachihaat aweyuuh Jesus
Mark 6.53-56
34Chii aashuuhamuch maak aniyuu saakahiikaniyuu ekw anite Gennesaret kaa ishinihkaateyich ihtaawiniyuu kaa misakaatwaau. 35Chii nisituunaakuu maak Jesus aniyuu iinuuh anit kaa ihtaayich. Ekw kaa itwetwaau misiwe aniyuu kaa aahkusiyich anite aniyuu waaskaa aschiiyuu kaa ihtaayich chechii peshuwaakanuyich Jesus e ihtaayich. 36Ekw anichii kaa aahkusitwaau kaa nitutamuwaatwaau Jesus chechii pachishtinikutwaau mikuchik chechii taahtinamuwaatwaau e wanishkwekaniyich utakuhpiyuu. Misiwe maak aweyuuh kaa taahtinamiyich utakuhp chii miinuwaatisiyuuh.
Tans Gekies:
Matthew 14: crjrNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
