Ibeb 5
5
Mfufuk owot iman kè Adam
(I Mfuf 1:1-4)
1Mfufuk owot iman kè Adam ìje ikeyi:
Me mgbọ Awaji orombe ebilene, ìrom ema me mbet kan̄. 2Awaji ìrom ema enerieen̄ mè enenwaan̄. Mgbọ îrombe ema, îgbana ema, mè igwen ema ebilene.
3Mgbọ Adam osobe efit acha mè akọp ita, inenibon gwun̄ enerieen̄ ge òbet lek kan̄, mè ikup kubọk kan̄, mè inyi erieen̄ Set. 4Adam îluk efit acha jeeta bene me mgbọ îbonbe Set. Me etete mgbọ ya, îbon si ofifi bọn ebirieen̄ mè ebibaan̄. 5Otutuuk otu ifuk acha Adam olukbe ugwem ìre efit acha onaan̄ge mè akọp ita. Adam onenikwu.
6Mgbọ Set osobe efit acha mè go, inenibon Enọs. 7Set îluk efit acha jeeta mè jaaba bene me mgbọ îbonbe Enọs. Me etete mgbọ ya, îbon si ofifi bọn ebirieen̄ mè ebibaan̄. 8Otutuuk otu ifuk acha Set olukbe ugwem ìre efit acha onaan̄ge mè akọp mè iba. Set onenikwu.
9Enọs îluk akọp acha onaan̄ge sabum înibon Keyinan. 10Enọs îluk efit acha jeeta mè akọp mè go bene me mgbọ îbonbe Keyinan. Me etete mgbọ ya, îbon si ofifi bọn ebirieen̄ mè ebibaan̄. 11Otutuuk otu ifuk acha Enọs olukbe ugwem ìre efit acha onaan̄ge mè go. Enọs onenikwu.
12Mgbọ Keyinan osobe akọp acha jaaba, inenibon Mayalalen. 13Keyinan îluk efit acha jeeta mè akọp ini bene me mgbọ îbonbe Mayalalen. Me etete mgbọ ya, îbon si ofifi bọn ebirieen̄ mè ebibaan̄. 14Otutuuk otu ifuk acha Keyinan olukbe ugwem ìre efit acha onaan̄ge mè akọp. Keyinan onenikwu.
15Mgbọ Mayalalen osobe akọp acha gweregwen mè go, inenibon Jaredi. 16Mayalalen îluk efit acha jeeta mè akọp ita bene me mgbọ îbonbe Jaredi. Me etete mgbọ ya, îbon si ofifi bọn ebirieen̄ mè ebibaan̄. 17Otutuuk otu ifuk acha Mayalalen olukbe ugwem ìre efit acha jeeta mè akọp onaan̄ge mè go. Mayalalen onenikwu.
18Mgbọ Jaredi osobe efit acha mè akọp gweregwen mè iba, inenibon Enọk. 19Jaredi îluk efit acha jeeta bene me mgbọ îbonbe Enọk. Me etete mgbọ ya, îbon si ofifi bọn ebirieen̄ mè ebibaan̄. 20Otutuuk otu ifuk acha Jaredi olukbe ugwem ìre efit acha onaan̄ge mè akọp gweregwen mè iba. Jaredi onenikwu.
21Mgbọ Enọk osobe akọp acha gweregwen mè go, inenibon Metusela. 22Enọk îluk ijaan̄ melek Awaji efit acha ita bene me mgbọ îbonbe Metusela. Me etete mgbọ ya, îbon si ofifi bọn ebirieen̄ mè ebibaan̄. 23Otutuuk otu ifuk acha kè Enọk ìre efit acha ita mè akọp gweregwen mè go. 24Enọk îluk ijaan̄ melek Awaji. Eya orọ, Awaji obeben ọmọ ifo. Ebilene kpeyaka imun̄ ọmọ.
25Mgbọ Metusela osobe efit acha mè akọp jeeta mè jaaba, inenibon Lemek. 26Metusela îluk efit acha jaaba mè akọp jeeta mè iba bene me mgbọ îbonbe Lemek. Me etete mgbọ ya, îbon si ofifi bọn ebirieen̄ mè ebibaan̄. 27Otutuuk otu ifuk acha Metusela olukbe ugwem ìre efit acha onaan̄ge mè akọp gweregwen mè onaan̄ge. Metusela onenikwu.
28Mgbọ Lemek osobe efit acha mè akọp jeeta mè iba, inenibon gwun̄ enerieen̄ ge, 29mè inyi erieen̄, Nuwa,#5:29 Nuwa ìsibi ‘ukarajit.’ mije ìbe ke ogwugwu obonikat ema ejit me lek ikwaan̄ kiban̄ mè kwulukwulu ema ekimun̄ mije Awaji ofieekbe otu inyi ijọn̄. 30Lemek îluk efit acha go mè akọp onaan̄ge mè go bene me mgbọ îbonbe Nuwa. Me etete mgbọ ya, îbon si ofifi bọn ebirieen̄ mè ebibaan̄. 31Otutuuk otu ifuk acha Lemek olukbe ugwem ìre efit acha jaaba mè akọp jaaba mè jaaba. Lemek onenikwu.
32Mgbọ Nuwa orakabe efit acha go, inenibon Sem, mè Am, mè Jefet.
Tans Gekies:
Ibeb 5: Obolo
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
