KAMERS - WEEK 1

16 Feb: Met die deur in die huis (Ester 1 & 2) – Arno Meiring Ons gebruik kamers as ’n metafoor vir al die dinge wat vanjaar vir jou voorlê: Jy gaan jouself nuut en beter leer ken en daarom val ons met die deur in die huis deur te praat oor jou identiteit. Ons gesels dan oor jou vriende in die sitkamer; bak en brou, wen en verloor in die kombuis; en groei en leer in die studeerkamer. Uiteindelik nooi ons jou om ook stil te word in die slaapkamer en om op ’n besondere manier saam met die Here deur hierdie jaar te stap. (Ons eerste reeks fokus dus op jou en jou dinge. Later vanjaar kyk ons na die groter omgewing en waarvoor die Here jou in die wêreld wil gebruik.) Ons gids deur jou kamers is Ester. Die boek Ester is dalk minder bekend, maar baie interessant, insiggewend en hope pret! Ester is heel waarskynlik die Ou Testamentiese boek wat heel laaste geskryf is en is dus die jongste, mees moderne boek in die Ou Testament. Dit is ’n wysheidsboek, wat beteken dat dit nie voorgee om ’n historiese weergawe van gebeure aan te bied nie, maar eerder vir ons praktiese lesse wil leer (soos die verhale van Josef, Daniël en Jona ook doen). Dit is ook snaaks en oordrewe geskryf – soos ’n komedie – en jy moet hardop lag as jy dit lees. Die Jode lees Ester elke jaar tydens die Purimfees, en skree dan opmerkings en maak grappe as hulle weer die storie hoor. Jy kan ook jou oë rol vir ’n koning wat ses maande lank feesvier, of ’n wet maak dat elke man die baas van sy huis moet wees. Jy kan selfs ’n opmerking of twee skree … Die mees uitstaande kenmerk van Ester is dat God se naam nêrens in die boek genoem word nie. Dit is ’n baie slim tegniek wat die skrywers gebruik het om jou te laat soek vir God in hierdie storie. As jy begin soek, sien jy dat daar hope “toevallige” dinge gebeur. Só, vertel Ester, is God agter die skerms aan die werk; sy tekens is in alles wat gebeur. Ons gebed is dat jy ook in hierdie reeks God in al die kamers van jou lewe sal raaksien.