Yauhas 3:1-21

Cov Yudais muaj ib tug thawjcoj hu ua Nikaudemaus, nws yog ib tug hauv cov Falixais. Muaj ib hmos nws tuaj cuag Yexus thiab hais rau Yexus hais tias, “Lanpis, peb paub tias Koj yog tus xibhwb uas los ntawm Vajtswv los. Vim tsis muaj leejtwg yuav ua tau tej txujci tseemceeb uas Koj ua no, tsuas yog tus uas Vajtswv nrognraim xwb thiaj ua tau.” Yexus teb tias, “Kuv qhia tseeb rau koj hais tias: yog leejtwg tsis yug dua tshiab, tus ntawd yuav tsis pom Vajtswv lub Tebchaws li.” Nikaudemaus nug Yexus hais tias, “Ib tug neeg uas twb laus lawm, yuav ua licas rov yug dua tshiab tau? Nws yeej yuav mus tsis tau rau hauv nws niam plab thiab rov yug dua zaum thib ob hlo li!” Yexus teb tias, “Kuv qhia tseeb rau koj hais tias, yog leejtwg tsis yug los ntawm dej thiab ntawm Vaj Ntsujplig, tus ntawd yuav mus tsis tau Vajtswv lub Tebchaws li. Tus uas yug los ntawm sab nqaijtawv yeej yog nqaijtawv, tiamsis tus uas yug los ntawm Vaj Ntsujplig yog ntsujplig. Koj tsis txhob nyuajsiab rau tej lus uas Kuv hais rau koj hais tias, nej yuavtsum yug dua tshiab. Cua yuav ntsawj mus sab twg los yeej tau; koj hnov cov cua ntawd lub suab, tiamsis koj yeej tsis paub tias xyov cua tuaj qhovtwg tuaj thiab yuav mus rau qhovtwg. Txhua tus uas yug hauv Vaj Ntsujplig ces zoo ib yam nkaus li ntawd.” Nikaudemaus nug hais tias, “Yuav ua licas thiaj ua tau li ko?” Yexus teb tias, “Koj twb yog cov Yixalayees ib tug xibhwb, ua licas koj tseem tsis totaub tej no thiab? Kuv qhia tseeb rau koj hais tias: peb hais tej uas peb paub thiab tshabxo txog tej uas peb pom, txawm li ntawd los nej yeej tsis muaj ib tug ntseeg tej lus uas peb hais li. Kuv qhia txog tej uas nyob hauv lub ntiajteb no xwb, nej twb tsis ntseeg; yogli ntawd, nej yuav ua licas ntseeg Kuv yog Kuv qhia txog tej uas nyob saum ntuj ceebtsheej? Thiab yeej tsis tau muaj dua leejtwg mus txog saum ntuj ceebtsheej li, tsuas yog Neeg Leejtub xwb, thiaj yog tus uas nqis saum ntuj ceebtsheej los.” Mauxes tsa tus nab tooj rau saum tus ncej tom tiaj suabpuam licas, Neeg Leejtub yuav raug muab tsa ib yam li ntawd, kom txhua tus uas ntseeg Nws thiaj yuav tau txojsia ntev dhawv mus ibtxhis. Rauqhov Vajtswv hlub neeg ntiajteb kawg li, Nws thiaj tau pub Nws tibleeg Tub, kom txhua tus uas ntseeg Nws Leejtub thiaj tsis tuag, tiamsis tau txojsia ntev dhawv mus ibtxhis. Qhov uas Vajtswv txib Nws Leejtub los rau hauv ntiajteb, tsis yog los txiavtxim rau ntiajteb, tiamsis los ua ntiajteb tus cawmseej. Cov uas ntseeg Leejtub yeej tsis raug txiavtxim; tiamsis cov uas tsis ntseeg twb raug txiavtxim lawm, rauqhov lawv tsis ntseeg Vajtswv tibleeg Tub. Qhov kev txiavtxim ntawd yogli no: qhov kaj twb los rau hauv lub ntiajteb lawm, tiamsis neeg xum nyiam qhov tsausntuj tshaj li nyiam qhov kaj, rauqhov lawv nyiam ua phem ua qias. Cov uas nyiam ua phem ua qias yeej ntxub qhov kaj thiab tsis kam los nyob rau ntawm qhov kaj, rauqhov lawv tsis xav kom lawv tej kev phem kev qias ntawd tshwm los. Tiamsis cov uas ua rawsli qhov tseeb yeej los nyob rau ntawm qhov kaj, kom qhov kaj thiaj ci qhia tau hais tias tej uas lawv ua yeej yog rawsli Vajtswv lub siab nyiam.