Chivkeeb 19:1-25

Thaum yuav tsausntuj ob tug timtswv mus txog rau ntawm lub nroog Xaudoos, Lauj tseem tabtom nyob ntawm roojloog. Thaum nws pom dheev nkawd, nws txawm sawvtsees mus tostxais nkawd. Nws mus txhoscaug ntua ntawm nkawd xubntiag thiab hais tias, “ob tug tswv, kuv nyob ntawm no yog yuav tiam neb. Thov neb mus hauv kuv tsev, mus ntxuav kotaw thiab pw ib hmos hauv kuv tsev. Tagkis kajntug neb mamli sawvntxov mus.” Tiamsis nkawd teb tias, “Tau lawm lau, hmo no wb yuav pw ntawm tshavpuam no xwb.” Tiamsis Lauj caw nkawd heev li, thaum kawg nkawd thiaj nrog Lauj mus so hauv nws tsev. Lauj kom nws cov tubtxib ci ncuav tsis xyaw keeb thiab ua ib pluag zaub-mov qab-qab rau ob tug qhua ntawd noj. Thaum ua tau siav lawm nkawd thiajli noj hmo. Uantej nkawd yuav mus pw, tagnrho tej txivneej uas nyob hauv lub nroog Xaudoos, tsis hais laus thiab hluas, txawm tuaj vij nkaus Lauj lub tsev. Lawv qw rau Lauj thiab nug hais tias, “Ob tug txivneej uas hmo no tuaj so hauv koj tsev nyob qhovtwg? Ciali coj nkawd tawm tuaj rau peb, kom peb thiaj tau nrog nkawd ua nkauj ua nraug!” Lauj txawm tawm mus rau sabnraud thiab muab qhovrooj kaw nkaus rau. Nws hais rau lawv tias, “Cov kwvtij, thov nej tsis txhob ua phem li no! Nej mloog kuv hais nawb, kuv muaj ob tug ntxhais tseem yog nkaujxwb. Thov cia kuv coj nkawd tawm tuaj rau nej, es nej xav ua licas rau nkawd los nyob ntawm nej siab nyiam. Tiamsis thov nej tsis txhob ua licas rau ob tug txivneej no hlo li, nkawd tuaj ua qhua txog hauv kuv tsev, kuv yuavtsum tivthaiv nkawd.” Tiamsis lawv qw hais tias, “Nyuag tibneeg txawv tebchaws ko, ciali txav kev rau peb! Koj yog leejtwg es koj tseem yuav txiavtxim rau peb thiab? Ciali txav kev, yog tsis li ntawd, peb yuav ua phem rau koj tshaj peb ua rau nkawd thiab.” Lawv ciali thawb ntiag Lauj rovqab thiab nam zog mus tsoo kom qhovrooj tawg. Tiamsis ob tug txivneej uas nyob hauv tsev qhib hlo qhovrooj mus rub kiag Lauj rovqab los rau hauv tsev thiab muab qhovrooj kaw nkaus rau. Ces nkawd txawm ua rau cov txivneej uas nyob sabnraud digmuag tag huv tibsi, lawv thiaj tsis pomkev nrhiav lub qhovrooj lawm. ob tug txivneej ntawd hais rau Lauj tias, “Yog koj tseem tshuav tej tub, tej ntxhais, tej vauv, lossis kwvtij neejtsa uas nyob hauv lub nroog no, koj ciali coj lawv khiav tawm ntawm thaj chaw no mus, rauqhov wb tabtom yuav ua kom lub nroog no puastsuaj mus. Tus TSWV twb hnov tej suab quaj qw loj heev uas tawmtsam txog cov neeg no tej kev phem kev qias lawm, Nws thiaj txib wb los rhuav lub nroog Xaudoos no kom puastsuaj.” Ces Lauj txawm mus hais rau ob tug hluas uas tau qhaib nws ob tug ntxhais lawm hais tias, “Neb ciali tsuag-tsuag thiab khiav tawm ntawm thaj chaw no mus, rauqhov tus TSWV tabtom yuav rhuav lub nroog no kom puastsuaj!” Tiamsis nkawd xav tias yog Lauj lam tso dag xwb. Thaum kajntug txoog ob tug timtswv tau los txhib kom Lauj majnroos. Nkawd hais tias, “Tsuag-tsuag maj! Ciali coj koj pojniam thiab koj ob tug ntxhais tawm tamsim no mus, nej thiaj yuav tsis tuag thaum lub nroog no raug kev puastsuaj.” Lauj tseem pheej ua xyemxyav, ces ob tug timtswv thiaj ntsiab nkaus Lauj tes, nrog rau nws pojniam thiab ob tug ntxhais, thiab coj lawv tawm hauv lub nroog mus vim tus TSWV tabncuab Lauj heev. Ces ib tug timtswv txawm hais tias, “Khiav tiag kom dim nawb! Tsis txhob tig saib qab thiab tsis txhob nres hauv lub hav ib qho twg hlo li. Khiav mus rau saum cov ncov roob nej thiaj yuav tsis tuag!” Tiamsis Lauj teb tias, “Tus tswv, thov tsis txhob cia peb khiav mus rau tid. Koj yeej ua zoo rau kuv kawg nkaus li lawm uas yog cawm kuv txojsia, tiamsis cov ncov roob ntawd nyob deb heev; ntshai tsam kev puastsuaj los caum cuag kuv, ua rau kuv tuag uantej mus txog tid. Koj puas pom lub nyuag moos me-me tid? Lub zos ntawd thiaj nyob ze mentsis xwb. Thov cia kuv mus lawm tid, koj yeej pom tias nws yog ib lub nyuag moos me-me xwb, kuv thiaj yuav tsis tuag.” Nws thiaj teb tias, “Tau kawg, ua li ntawd. Kuv yuav tsis rhuav lub moos tid. Tsuag-tsuag! Ciali mus! Kuv yuav tsis ua ib yam dabtsi txog thaum uas koj khiav mus txog tid tso.” Vim Lauj hais tias lub moos tid yog ib lub moos uas me, thiaj muab lub moos ntawd hu ua Xau-as. Thaum Lauj khiav mus txog tim lub moos Xau-as, hnub tabtom tawm plaws tim npoo ntuj. Tamsim ntawd tus TSWV txawm tso hluavtaws leejfaj poob saum ntuj los kub lub nroog Xaudoos thiab lub nroog Kaumaulas, ua rau ob lub nroog ntawd thiab tagnrho lub tiajnrag, nrog rau tej neeg uas nyob rau hauv thiab txhua yam nrojtsuag qoobloo raug puastsuaj tag.