Aafisanko'en 6
6
Sukaaɓe e Danyooɓe
1Onon sukaaɓe, nde on tokkuɓe Yeesu, kokkee danyooɓe mooɗon mangu, ngam non e wooɗi.#Kol 3.20. 2“Hokku nyaako maaɗa e maduujo maaɗa mangu.” Nder ko Allah wi'i ɗum waɗa, kanjum woni arandejum gooduɗum alkawal. 3Alkawal ngal woni, “A jooɗoto jam, neeɓaa e duuniyaaru.”#Wur 20.12; TA 5.16.
4Onon danyooɓe, to' on ngaɗu ɓiɓɓe mooɗon monna, ammaa ekkitineeɓe ngikku boɗɗum ɓe mawna nder laawol Joomiraawo.#Kol 3.21.
Maccuɓe e Jeyɓeɓe
5Onon maccuɓe, ngaɗanee jeyɓe'on gonɓe nder duuniyaaru ndu'u ko ɓe mbi'i'on nder mangu. Ngaɗeeɗum e ɓernde go'o bo Almasiihu ngaɗanton. 6Ngaɗaneeɓe non naa' e carel ngel ɓe ngi'ata'on tan, koo boo ngam ɓe ɓeyda yiɗuki'on. Ammaa e ɓernde go'o ngaɗee ko Allah yiɗi bo maccuɓe Almasiihu. 7Kuwanee jeyɓe'on nder ɓernde belnde bo Joomiraawo kuwanton, naa' yimɓe. 8On andi Joomiraawo waatanay koo moye koo ɗume fii boɗɗum ɗum waɗi, koo o maccuɗo, koo naa' o maccuɗo.#Kol 3.22‑25.
9Onon maa jeyɓe maccuɓe ɓen, doole ngaɗanonɓe ko haani. To' on mbi'u on piyayɓe, ngam on andi onon e maccuɓe mooɗon on ngoodi mawɗo go'oto gonɗo dow, o walaa yidde hoore.#Kol 4.1; TA 10.17; Kol 3.25.
Honuki Ceyɗan
10Ko mbi'aymi cakitiiɗum woni alee bawɗe mawɗe ɗe Joomiraawo meeɗen sembiɗina'on. 11Ɓornee fuu kolte konu ɗe Allah hokki'on ngam mbaawon daraaki, nganyon ƴoyre Ceyɗan. 12Ngam naa' yimɓe kondeten, ammaa en konda e ginni gonɗi dow, laamotooɗi, e gooduɗi bawɗe, e jogiiɗi laamu duuniyaaru ndu'u ndu jaamanu nyiwre. 13Ngam non, ɓornee fuu kolte konu ɗe Allah, ngam to nyalnde kallunde warii, mbaawon daraaki nganyon ƴoyre Ceyɗan. Gaɗa on njottinii koo ɗume, ɗum tawa on ndarii.
14Ngam non, ndaree on ciryii. Goonga warta taadorde mooɗon, aadilaaku warta toggoore njamndi mooɗon nde konu.#Ica 11.5; Ica 59.17. 15Siryaaki yaaruki Habaru Belɗum dow Yeesu Almasiihu ɗum jam warta bo paɗe to koyɗe mooɗon.#Ica 52.7. 16Gaɗa maajum maa, hoolaaki Yeesu warta ko njogotooɗon taɓɓoo nyifa hiite piɗille ɗe ganyo kalluɗo on ɗon fiɗoyi. 17Kumnee humneere njamndi nde konu, waato kisndam. Koccee kaafahi Ruuhu Allah, waato Wolde maako.#Ica 59.17. 18Koo ndeye ngaɗee ka waɗuki do'aare no Ruuhu Allah holliri'on nder koo ɗume ɗum ngaɗoton. Kadin ngaɗon ka toraaki Allah walla'on. Ngam fii ɗu'um, paamee, to' on njaɓu comon, koo ndeye ngaɗee ka waɗanki yimɓe Allah fuu do'aare. 19Min maa, ngaɗaneeyam do'aare Allah hokkayam boliiɗe ɗe mbi'aymi, mi andina yimɓe sirru Habaru Belɗum dow Yeesu Almasiihu kulol walaa. 20Ngam hokkuki Habaru ɗum ngartumi lilaaɗo Yeesu, koo nde jooni e mi nder suudu cural. Ngaɗee do'aare ngam mi waɗa ka hokkuki Habaru ɗum no haani kulol walaa.
Kownol Cakitiingol
21Tiikikus, bandiraawo meeɗen mo ngiɗɗen, maccuɗo mo goonga nder kuugal Joomiraawo, o hokkay'on fuu habaru njamu am e no ngontindirmi.#KL 20.4; 2Tim 4.12. 22Kanjum waɗi liloymoomi to mooɗon, ngam o wi'a'on no koo moye amin wontindiri o sembiɗina ɓerɗe mooɗon.#Kol 4.7,8.
23Allah Nyaako meeɗen Mo Dow e Joomiraawo meeɗen Yeesu Almasiihu hokka fuu tokkuɓe Yeesu jam e yidde e hoolaare. 24Allah barkiɗina koo moye giɗɗo Joomiraawo meeɗen Yeesu Almasiihu yidde nde re'ataa.
Currently Selected:
Aafisanko'en 6: fuv
Highlight
Share
Copy
Want to have your highlights saved across all your devices? Sign up or sign in
© 2010, Bible League. All rights reserved.