Popular Bible Verses from Aafisanko'en 5

Nde onon ngoni ɓiɓɓe ɓe Allah yiɗi, ekkitee iri ngikku maako nder jonde mooɗon. Ngaɗee jonde yidde, non no Almasiihu yiɗiri'en hokki yonki muuɗum ngam meeɗen. O wartii cakkiri ndi Allah nani belɗum mayri bo urde welnde.

Ngam non paamee no njooɗoriiɗon. To' on ngaɗu jonde bo haaŋaaɓe, ammaa ngaɗee jonde bo yimɓe ɓe andal. Fuu carel ngel keɓɗon ngam waɗuki boɗɗum, ngaɗeeɗum, ngam balɗe ɗe ngonɗen ɗe kalluɗe.

To' on nattin ko'e mooɗon njaru, ngam ɗum laawol lallere. Ammaa alee Ruuhu Allah heewa'on. Cembiɗinee koo moye nder mooɗon e gimi Jabuura, e gimi mantuki Joomiraawo, e gimi ɗi Allah hokki'on nder ɓerɗe. Ngimee gimi manton Allah e ɓerɗe mooɗon fuu. Koo ndeye ngettee Allah Nyaako meeɗen Mo Dow ngam koo ɗume nder inde Joomiraawo meeɗen Yeesu Almasiihu.

Ngam maajum, to' on ngartu haaŋaaɓe, ammaa ɗaɓɓitee andon ko Joomiraawo yiɗi ngaɗon.

Onon worɓe, ngiɗee rewɓe mooɗon no Almasiihu yiɗiri kawtal tokkuɓemo hokki yonki muuɗum ngam maɓɓe.

Ngam ndenno nder nyiwre ngonɗon, ammaa jooni nde on ngartii yimɓe Joomiraawo, on nder jayngol. Ngam maajum sey ngaɗon jonde iri nde yimɓe gonɓe nder jayngol.

Kokkindiree mangu ngam mawninki Almasiihu.

Onon rewɓe teegal, kokkee worɓe mooɗon mangu non no mawninirton Joomiraawo.

Fuu e non, koo moye nder mooɗon yiɗa debbo muuɗum no yiɗiri hoore muuɗum, nden koo moye debbo hokka gorko muuɗum mangu.

No aayaare wi'i, “Ngam maajum sey neɗɗo ala nyaako muuɗum e maduujo muuɗum takkanoo debbo muuɗum, ɓe fuu ɗiɗo ɓe ngarta ɓandu go'o.”

Ngoɗɗitee kuuɗe meere ɗe nyiwre ɗe yimɓe ngaɗata, ammaa kollee ko ɓe ngaɗata ɗum wooɗaa.