رحمات جديدة كل صباح؛ أبريلعينة

العبادة مع مؤمنين آخرين كتعاونك باش تشوف الحياة كلها من وجهة نظر قيامة الرب يسوع المسيح.

هي ماشي غير أهم معجزة گاع وصافي. هي ماشي غير أهم حدث رائع في حياة المسيح. هي ماشي غير عنصر أساسي في النقط العريضة ديال العقيدة ديالك. هي ماشي غير السبب ديال أهم عيد كتحتفل بيه الكنيسة. هي ماشي غير الأمل ديالك للمستقبل. لا، القيامة هي كل هادشي وكتر. هي حتى من المفروض تكون النضاضر اللّي كتشوف بيهم الحياة كلها. كورنثوس التانية 4: 13-15 كتورّينا هاد الحق مزيان: "وْرَاهْ حْنَا عَارْفِينْ بْلِّي هَادَاكْ اللِّي بْعَتْ الرَّبّْ يَسُوعْ مْنْ الْمُوتْ، غَيْبْعَتْنَا حْتَّى حْنَا مْنْ الْمُوتْ مْعَ يَسُوعْ، وْغَيْجِيبْنَا مْعَاكُمْ عَنْدُه. حِيتْ ݣَاعْ هَادْشِّي رَاهْ هُوَ عْلَى وْدّْكُمْ، بَاشْ كُلّْمَا وْصْلَاتْ النِّعْمَة لْنَاسْ كْتَارْ، كَيْتّْزَادْ الشُّكْرْ اللِّي كَيْعْطِي الْعَزّْ لْلَّهْ." ولكن كيفاش كتبان الحياة من خلال المنضور ديال القيامة؟ وأنا كندير تقييم لحياتي هنا ودابا، شنو خاصني نتدكّر على القيامة؟ خلّيوني نقترح خمسة ديال الحوايج.

1. قيامة يسوع كتضمن قيامتك حتّى نت. الحياة هي ماشي شي دورة ديال نفس الحوايج كتعاود ديما. لاّ، تحت الحكم ديال الله، راه هاد العالم غادي للنهاية. وحياتك غادية لواحد النهاية زوينة. غايجي واحد الوقت غيخرجك فيه الله من هاد العالم المكسور، وماغتبقاش الخطية والمعاناة.
2. القيامة كتقول ليك شنو كيدير يسوع دابا. يسوع كيملك دابا. كتقول رسالة كورنثوس اللّولة 15 بلّي هو غيزيد في الحكم حتى يولّي العدو الأخير تحت رجليه. كيما كتشوف، العالم ديالك ماشي خارج على السيطرة، ولكن هو تحت السيطرة الدقيقة ديال هادك اللّي مازال كيدير خدمته باش يهزم الخطية.
3. القيامة كتواعدك بكل النعمة اللّي نت محتاجها في الوقت بين قيامة يسوع وقيامتك نت. إلا كانت نهايتك ديجا مضمونة، فراه كل النعمة اللّي نت محتاجها على طول الطريق راها مضمونة حتّى هي، وإلّا راك ماعمّرك غتوصل للوجهة النهائية ديالك. النعمة المستقبلية ديما هازا معاها الوعد ديال النعمة الحاضرة.
4. قيامة يسوع كتحفزك باش تدير داكشي اللّي صحيح بغض النظر على شنو كتواجه. القيامة كتقول ليك بلّي راه الله غينتصر. الحق دياله غيسود. الخطة دياله غتكمل. الخطية غتنهزم. التقوى غتغلب الشر. هادشي كيعني بلّي كل حاجة كتديرها باسم الله راها كتستحق كل هاد العناء، بغض النظر على شحال غتكلفك.
5. القيامة كتقول ليك بلّي راه ديما عندك سبب باش تكون شاكر. بغض النظر من أي حاجة ربحتيها، فراه عندك دخول في أكبر قصة رائعة وتعطاك مستقبل ديال الفرح والسلام للأبد.

بغض النظر على شنو كيوقع اليوم، شوف في الحياة من خلال هاد المنضور.

من أجل دراسة وتشجيع كتر: كورنثوس اللّولة 15: 1-11